തിരുവനന്തപുരം: പ്രതിപക്ഷ നേതാവ് രമേശ് ചെന്നിത്തല നയിക്കുന്ന ‘പടയൊരുക്കം’ യാത്രയ്ക്കും തടയിട്ട് ഓഖി ചുഴലിക്കാറ്റ്.
കനത്ത മഴയും കടല്‍ ക്ഷോഭത്തേയും തുടര്‍ന്ന് ശംഖുമുഖത്ത് 10 മീറ്ററോളം കടല്‍ കരയിലേക്ക് കയറി.
ഇതോടെ തീരദേശ വാസികള്‍ ഭീതിയിലാണ്.
പ്രതിപക്ഷ നേതാവ് രമേശ് ചെന്നിത്തല നയിക്കുന്ന ‘പടയൊരുക്കം’ യാത്രയുടെ സമാപന സമ്മേളനത്തിനായി ശംഖുമുഖത്ത് ഒരുക്കികൊണ്ടിരുന്ന വേദിയുടെ നിര്‍മ്മാണം താല്‍ക്കാലികമായി നിര്‍ത്തി വച്ചിട്ടുണ്ട്.
പിന്നാലെ നാളെ നടത്താനിരുന്ന സമാപന സമ്മേളനവും മാറ്റിവെച്ചു.
കോണ്‍ഗ്രസ്സ് ഉപാധ്യക്ഷന്‍ രാഹുല്‍ ഗാന്ധി മുഖ്യാതിഥിയായി എത്തുന്ന സമ്മേളനത്തില്‍ ഒരു ലക്ഷം പേര്‍ പങ്കെടുക്കുമെന്നാണ് കോണ്‍ഗ്രസ്സ് വൃത്തങ്ങള്‍ നേരത്തെ അറിയിച്ചിരുന്നത്.
മഴ ഇനിയും കനക്കുകയാണെങ്കില്‍ നിര്‍മ്മാണ പ്രവര്‍ത്തനങ്ങള്‍ തുടരാനാവാത്ത സാഹചര്യമുണ്ടാവും.
കടല്‍ നല്ല തോതില്‍ പ്രക്ഷുബ്ധമായതിനാല്‍ തീരത്തേക്ക് പോകരുതെന്ന് ജില്ലാ ഭരണകൂടം മുന്നറിയിപ്പ് നല്‍കിയിട്ടുണ്ട്.
