ചൊവ്വാഴ്ച നടന്ന ഗാലക്‌സി അൺപാക്ക്ഡ് 2021 വെർച്വൽ ഇവന്റിൽ സാംസങ് ഗാലക്‌സി ബുക്ക് പ്രോ സീരീസ് ലാപ്‌ടോപ്പുകൾ അവതരിപ്പിച്ചു. സാംസങ് ഗാലക്‌സി ബുക്ക് പ്രോ, ഗാലക്‌സി ബുക്ക് പ്രോ 360 ലാപ്‌ടോപ്പുകൾ എന്നിവയാണ് ഈ സീരിസിൽ ഉൾപ്പെടുന്നത്. ഇവ രണ്ടും 13.3 ഇഞ്ച്, 15 ഇഞ്ച് വലുപ്പത്തിലാണ് വിപണിയിൽ വരുന്നത്. ഐറിസ് എക്സ് ഗ്രാഫിക്സിനൊപ്പം ഇലവൻത്ത് ജനറേഷൻ ഇന്റൽ കോർ പ്രോസസറുകളുമായാണ് പുതിയ മോഡലുകൾ വരുന്നത്. ഈ സീരിസിൽ സാംസങ് ഗാലക്‌സി ബുക്ക് പ്രോ 360 ൽ 5 ജി കണക്റ്റിവിറ്റിയും എസ് പെൻ സ്റ്റൈലസ് സപ്പോർട്ടുമുണ്ട്. ഗാലക്‌സി ടാബിലേക്ക് ലാപ്ടോപ്പ് സ്‌ക്രീൻ മിറർ ചെയ്യാൻ ഉപയോക്താക്കളെ സഹായിക്കുന്ന സെക്കൻഡ് സ്‌ക്രീൻ എന്ന സവിശേഷതയും സാംസങ് നൽകിയിട്ടുണ്ട്.
ആളുകൾ ഇപ്പോൾ വർക്ക്-ഫ്രം-ഹോം ആയതിനാൽ ലാപ്ടോപ്പുകളുടെ ആവശ്യം ഇപ്പോൾ പതിവിലും കൂടുതലായി വർദ്ധിച്ചുകഴിഞ്ഞു. പുതിയ ട്രെൻഡിനെ സ്വാധീനിക്കാനും പുതിയ ഗാലക്‌സി ബുക്ക് പ്രോ മോഡലുകൾ ഉപയോഗിച്ച് ഉയർന്ന നിലവാരമുള്ള ലാപ്‌ടോപ്പുകൾ തിരയുന്ന ഉപഭോക്താക്കളെ ആകർഷിക്കാനും സാംസങ്ങിന് കഴിഞ്ഞേക്കും.
