രണ്ട് 5ജി മോഡലുകള്‍ അടക്കം സാംസങ് പുതിയ നാല് സ്മാര്‍ട് ഫോണുകള്‍ പുറത്തിറക്കി. ഗാലക്സി എ 51, ഗാലക്സി എ 71 എന്നിവയാണ് 5 ജി പിന്തുണ നല്‍കുന്നത്. പുതിയ ഫോണുകള്‍ സാംസങ്ങില്‍ നിന്നുള്ള ഗാലക്സി എ ലൈനപ്പിന്റെ ഭാഗമാണ്. പുതിയ ഹാന്‍ഡ്‌സെറ്റുകള്‍ യുഎസിലാണ് ഔദ്യോഗികമായി അവതരിപ്പിച്ചിട്ടുള്ളത്.
കഴിഞ്ഞ വര്‍ഷം ഡിസംബറില്‍ അവതിപ്പിച്ചതാണ് ഈ ഫോണുകള്‍. ഫീച്ചറുകള്‍ സമാനമാണെങ്കിലും പഴയവയില്‍ നിന്ന് പുറംഭാഗങ്ങളില്‍ വ്യത്യാസപ്പെട്ടിരിക്കുന്നു.ഗാലക്സി എ 71 5 ജി പ്രിസം ക്യൂബ് ബ്ലാക്ക്, പ്രിസം ക്യൂബ് സില്‍വര്‍, പ്രിസം ക്യൂബ് ബ്ലൂ എന്നിങ്ങനെ മൂന്ന് നിറങ്ങളിലാണ് വരുന്നത്. ഗാലക്സി എ 51 5 ജി പ്രിസം ക്യൂബ് ബ്ലാക്ക്, പ്രിസം ക്യൂബ് വൈറ്റ് എന്നിവയില്‍ ലഭ്യമാണ്. സാംസങ് ഗാലക്സി എ 71 5ജി മോഡലിന് 599.99 ഡോളറാണ് വില. ഗാലക്സി എ 51 യുടെ 5ജി വേരിയന്റിന്റെ വില 499.99 ഡോളറുമാണ്.
ഗാലക്സി എ 71ല്‍ 6.7 ഇഞ്ച് എഫ്എച്ച്ഡി + സൂപ്പര്‍ അമോലെഡ് ഡിസ്പ്ലേയാണുള്ളത്. 8 ജിബി റാമും 128 ജിബി സ്റ്റോറേജും എക്സിനോസ് 980 ചിപ്സെറ്റും ഉണ്ട് – മൈക്രോ എസ്ഡി കാര്‍ഡ് ഉപയോഗിച്ച് 1 ടിബി വികസിപ്പിക്കാം. 64 മെഗാപിക്‌സല്‍ പ്രൈമറി സെന്‍സര്‍, 12 മെഗാപിക്‌സല്‍ അള്‍ട്രാ വൈഡ് ആംഗിള്‍ ലെന്‍സ്, 5 മെഗാപിക്‌സല്‍ ഡെപ്ത് സെന്‍സര്‍, 5 മെഗാപിക്‌സല്‍ മാക്രോ സെന്‍സര്‍ എന്നിവയുള്ള നാല് ലെന്‍സുകളാണ് ക്യാമറയിലുള്ളത്. സെല്‍ഫികള്‍ക്കായി ഫോണിന് 32 മെഗാപിക്‌സല്‍ ലെന്‍സും ലഭിക്കും. 25ണ ഫാസ്റ്റ് ചാര്‍ജിങ് ശേഷിയുള്ള 4,500 എംഎഎച്ച് ബാറ്ററിയാണ് ഈ ഹാന്‍ഡ്‌സെറ്റിന്റെ കരുത്ത്.
ഗാലക്സി എ 51 ന്റെ 5ജി വേരിയന്റില്‍ 6.5 ഇഞ്ച് ഫുള്‍ എച്ച്ഡി + ഇന്‍ഫിനിറ്റി-ഒ അമോലെഡ് ഡിസ്പ്ലേ, മുന്‍ ക്യാമറയ്ക്കായി ഒരൊറ്റ പഞ്ച്-ഹോള്‍ കട്ട് ഔട്ട് നല്‍കുന്നു. കമ്പനിയുടെ എക്സിനോസ് 980 5ജി ചിപ്സെറ്റാണ് സാംസങ് ഗാലക്സി എ 51 5ജി നല്‍കുന്നത്. റാം 6 ജിബി ആണ്.
48 മെഗാപിക്‌സല്‍ പ്രൈമറി ലെന്‍സ്, 12 മെഗാപിക്‌സല്‍ അള്‍ട്രാ വൈഡ് ലെന്‍സ്, 5 മെഗാപിക്‌സല്‍ മാക്രോ ക്യാമറ, 5 മെഗാപിക്‌സല്‍ ഡെപ്ത് സെന്‍സര്‍ എന്നിവയുള്ള ക്വാഡ് റിയര്‍ ക്യാമറ സജീകരണമാണ് സാംസങ് ഗാലക്സി എ 51 5ജിയില്‍ ഉള്ളത്. മുന്‍വശത്ത് 32 മെഗാപിക്‌സല്‍ ലെന്‍സ് സെല്‍ഫി സ്‌നാപ്പറും ഇതിലുണ്ട്. ഫാസ്റ്റ് ചാര്‍ജിങ് പിന്തുണയ്ക്കുന്ന 4,000 എംഎഎച്ച് പായ്ക്കാണ് സാംസങ് ഗാലക്സി എ 51 5ജിയിലെ ബാറ്ററി.
