സാമൂഹ്യനീതി വകുപ്പിന്റെ ഭാഗമായ കേരള സാമൂഹ്യ സുരക്ഷാ മിഷന് വി കെയര് പദ്ധതി വഴി സജനയ്ക്ക് സാമ്പത്തിക സഹായം നല്കുമെന്ന് ആരോഗ്യ വകുപ്പ് മന്ത്രി കെ.കെ. ശൈലജ അറിയിച്ചു. സജനയെയും സുഹൃത്തുക്കളെയും അപമാനിച്ച അക്രമികള്ക്കെതിരെ നടപടികള് സ്വീകരിക്കുന്നതോടൊപ്പം സ്വന്തമായി ജോലി ചെയ്തു ജീവിക്കാനുള്ള അവസരം ഒരുക്കി കൊടുക്കാനും സര്ക്കാര് കൂടെയുണ്ടാകും. സജനയെ ഫോണില് വിളിച്ച് സംസാരിക്കുകയും ആവശ്യമായ സഹായവും സുരക്ഷയും നല്കുമെന്ന് ഉറപ്പ് നല്കുകയും ചെയ്തിട്ടുണ്ട്.
സമൂഹത്തില് സ്ത്രീയും പുരുഷനും എന്നപോലെ ട്രാന്സ്ജെന്ഡര് വ്യക്തികളും തുല്യ അവകാശമുള്ള പൗരന്മാരാണ്. അവരെ അവഹേളിക്കാന് ആരെയും അനുവദിക്കില്ല. ഈ സര്ക്കാര് വന്നതിനുശേഷം ട്രാന്സ്ജെന്ഡര് വ്യക്തികള്ക്ക് ഐഡി കാര്ഡ് നല്കിയും ട്രാന്സ്ജെന്ഡര് കൗണ്സില് ഇതില് രൂപീകരിച്ചതുമടക്കം നിരവധി പദ്ധതികളാണ് ആവിഷ്കരിച്ചിട്ടുള്ളത്. മഴവില്ല് എന്ന പദ്ധതി രൂപീകരിച്ചു കൊണ്ട് സ്കില് ഡെവലപ്മെന്റ് പദ്ധതി, സ്വയം തൊഴില് വായ്പാ സൗകര്യങ്ങള്, തുല്യതാ വിദ്യാഭ്യാസം മുതല് ഉപരിപഠനം വരെ അടക്കമുള്ള നിരവധി പദ്ധതികളാണ് നടപ്പിലാക്കുന്നത്. കേരളത്തില് ട്രാന്സ്ജെന്ഡര് വിഭാഗത്തിന് കുടുംബത്തിലും സമൂഹത്തിലും ആദരവും അംഗീകാരവും പ്രകടിപ്പിച്ചു തുടങ്ങിയ അവസരത്തില് ഇത്തരത്തിലുള്ള അതിക്രമങ്ങള് ഒരിക്കലും അംഗീകരിക്കില്ലെന്നും മന്ത്രി വ്യക്തമാക്കി.