തിരുവനന്തപുരം: സിപിഎം വിടില്ലെന്ന് ദേവികുളം മുന് എംഎല്എ എസ് രാജേന്ദ്രന്. പാര്ട്ടി എന്ത് നടപടിയെടുത്താലും അംഗീകരിച്ച് പാര്ട്ടിയില് തുടരും. നടപടിയെടുക്കുന്നത് പാര്ട്ടി കീഴ്വഴക്കമാണ്. മറ്റ് പാര്ട്ടികളിലേക്ക് ഇല്ലെന്നും രാജേന്ദ്രന് പറഞ്ഞു. സിപിഎം ഇടുക്കി ജില്ലാ സമ്മേളനത്തില് എസ് രാജേന്ദ്രനെതിരെ രൂക്ഷ വിമര്ശനങ്ങള് ഉയര്ന്നിരുന്നു.
തെരഞ്ഞെടുപ്പ് യോഗങ്ങളില് ദേവികുളത്തെ എല്ഡിഎഫ് സ്ഥാനാര്ത്ഥി എ രാജയുടെ പേര് പറയാന് രാജേന്ദ്രന് തയ്യാറായില്ല. പറയണമെന്ന് നേതാക്കള് നിര്ദ്ദേശിച്ചിട്ടും അനുസരിച്ചില്ല. രാജേന്ദ്രന്റെ പാര്ട്ടിവിരുദ്ധ പ്രവര്ത്തനങ്ങള് അന്വേഷണ കമ്മീഷനും ശരിവച്ചതോടെയാണ് പുറത്താക്കാന് ശുപാര്ശ നല്കിയതെന്നും ജില്ലാ സെക്രട്ടറി കെ കെ ജയചന്ദ്രന് സമ്മേളനത്തില് പറഞ്ഞിരുന്നു.
ജില്ലാ സമ്മേളനത്തില് രാജേന്ദ്രന് പങ്കെടുത്തിരുന്നില്ല. അച്ചടക്ക നടപടിയില് ഇളവെന്ന അപേക്ഷയോട് സംസ്ഥാനനേതൃത്വം മുഖം തിരിച്ചതോടെയാണ് രാജേന്ദ്രന് സമ്മേളനത്തില് നിന്ന് വിട്ടുനിന്നത്.