വാഷിങ്ടണ്: യുക്രൈന് – റഷ്യ യുദ്ധം മുറുകുന്നതിനിടെ റഷ്യയില് നിന്നുള്ള എണ്ണ ഇറക്കുമതി നിരോധിച്ച് അമേരിക്ക. എണ്ണയും പ്രകൃതി വാതകവും ഇറക്കുമതി ചെയ്യുന്നത് നിര്ത്തുമെന്ന് അമേരിക്ക അറിയിച്ചു. അമേരിക്കന് പ്രസിഡന്റ് ജോ ബൈഡന്റേതാണ് പ്രഖ്യാപനം. വില നിയന്ത്രിക്കാന് പരമാവധി ശ്രമിക്കുമെന്ന് ബൈഡന് പറഞ്ഞു. യുക്രെയ്ന് ലോകത്തെ പ്രചോദിപ്പിക്കുന്നെന്നും ബൈഡന് കൂട്ടിച്ചേര്ത്തു. റഷ്യയില് നിന്നുള്ള എണ്ണ ഇറക്കുമതി ബ്രിട്ടനും നിരോധിക്കുമെന്നാണ് റിപ്പോര്ട്ട്.
യുക്രെയ്ന് അധിനിവേശത്തിനെതിരെ റഷ്യയെ കൂടുതല് സമ്മര്ദത്തിലാക്കുന്നതിന്റെ ഭാഗമായാണ് റഷ്യന് എണ്ണ ഇറക്കുമതി നിരോധിക്കാന് അമേരിക്കന് പ്രസിഡന്റ് ജോ ബൈഡന് തീരുമാനിച്ചത്. റഷ്യയ്ക്ക് മേലുള്ള സാമ്പത്തിക ഉപരോധം കടുപ്പിക്കുന്നതിന്റെ ഭാഗമായിട്ടാണ് നിരോധനം. റഷ്യയില് നിന്നുള്ള എണ്ണയുടെയും അനുബന്ധ ഉല്പന്നങ്ങളുടെയും ഇറക്കുമതി 2022 അവസാനത്തോടെ പൂര്ണമായി ഒഴിവാക്കുമെന്ന് ബ്രിട്ടനും അറിയിച്ചു. പ്രഖ്യാപനം ഉടനുണ്ടാകുമെന്നാണ് റിപ്പോര്ട്ടുകള് പറയുന്നത്.