മോസ്കോ: യുക്രൈന്റെ നാല് പ്രദേശങ്ങള് സ്വന്തമാക്കി റഷ്യ. യുക്രൈന്റെ നാല് വിമത പ്രദേശങ്ങളെ റഷ്യയോട് കൂട്ടിചേര്ത്തുള്ള ഉടമ്പടിയില് പ്രസിഡന്റ് വ്ളാദിമിര് പുതിനും അതാത് പ്രദേശങ്ങളിലെ ഭരണാധികാരികളും ഒപ്പുവെച്ചു. ക്രെംലിനിലെ സെയ്ന്റ് ജോര്ജ് ഹാളില് ഇന്ത്യന് സമയം വൈകീട്ട് 5.30-നായിരുന്നു ചടങ്ങ്. നാല് പ്രാദേശിക നേതാക്കള് ഒരു ടേബിളിലും അതില് നിന്ന് ഏറെ അകലത്തില് മറ്റൊരു ടേബിളിലും ഇരുന്നാണ് ഉടമ്പടിയില് ഒപ്പുവെച്ചത്.
എട്ട് വര്ഷം മുമ്പ് ക്രൈമിയയന് മുനമ്പ് പിടിച്ചെടുത്ത് പുതിന് റഷ്യയോട് ചേര്ത്തതിന്റെ സമാനമായ അന്തരീക്ഷമായിരുന്നു ചടങ്ങിലെന്ന് ബിബിസി അടക്കമുള്ള മാധ്യമങ്ങള് റിപ്പോര്ട്ട് ചെയ്തു. ലുഹാന്സ്ക്, ഡൊണെറ്റ്സ്ക്, ഹേഴ്സന്, സാഫോറീസിയ എന്നീ പ്രദേശങ്ങളാണ് റഷ്യ കൂട്ടിച്ചേര്ക്കുന്നത്. ഇവിടങ്ങളില് ഹിതപരിശോധന ചൊവ്വാഴ്ച പൂര്ത്തിയായിരുന്നു. ഭൂരിപക്ഷം ജനങ്ങളുടെയും താത്പര്യപ്രകാരമാണ് കൂട്ടിച്ചേര്ക്കലെന്ന് റഷ്യ വിശദീകരിക്കുന്നു.