റോയല്‍ എന്‍ഫീല്‍ഡ് ഇന്റര്‍സെപ്റ്റര്‍ 650, കോണ്‍ടിനന്റല്‍ ജിടി 650 ബൈക്കുകള്‍ പുതിയ രണ്ടു റെട്രോ നിറങ്ങളിലായിരിക്കും പുറത്തിറങ്ങുന്നതെന്ന് സൂചന. കഴിഞ്ഞ ദിവസം പുറത്തുവന്ന ചിത്രങ്ങള്‍ കണ്ട് ബൈക്കുകള്‍ വിപണിയില്‍ ഇന്ദ്രജാലം കാട്ടുമെന്ന വിശ്വാസത്തിലാണ് ബൈക്ക് പ്രേമികള്‍.
ചുവപ്പിലും വെള്ളയിലുമാണ് റോയല്‍ എന്‍ഫീല്‍ഡ് ഇന്റര്‍സെപ്റ്റര്‍ 650 ഒരുക്കിയിരിക്കുന്നത്. റോയല്‍ എന്‍ഫീല്‍ഡ് കോണ്‍ടിനന്റല്‍ ജിടി 650 കാണപ്പെടുന്നത് കറുപ്പിലും ചാരനിറത്തിലുമാണ്. ഇന്റര്‍സെപ്റ്ററിന് എകദേശം 5 ലക്ഷം രൂപയും കോണ്ടിനെന്റല്‍ ജിടിക്ക് 4.5 ലക്ഷം രൂപയുമാണ് ഓസ്‌ട്രേലിയന്‍ വിപണിയിലെ വില. എന്നാല്‍ ഇന്ത്യയില്‍ പുറത്തിറങ്ങുമ്പോള്‍ ബൈക്കുകള്‍ക്ക് വില കുറയും എന്നാണ് സൂചന.
റോയല്‍ എന്‍ഫീല്‍ഡിന്റെ തന്നെ ഇന്റര്‍സെപ്റ്റര്‍ മാര്‍ക്ക് 1 നെ അനുസ്മരിപ്പിച്ചാണ് പുതിയ ഇന്റര്‍സെപ്റ്ററിനെ പുറത്തിറക്കിയിരിക്കുന്നത്. 648 സിസി കപ്പാസിറ്റിയുള്ള പാരലല്‍ ട്വിന്‍ എയര്‍ കൂള്‍ഡ് എന്‍ജിന്‍ 7100 ആര്‍പിഎമ്മില്‍ 47 ബിഎച്ച്പി കരുത്തും 4000 ആര്‍പിഎമ്മില്‍ 52 എന്‍എം ടോര്‍ക്കും ഉത്പാദിപ്പിക്കും. ആറു സ്പീഡാണ് ഗിയര്‍ബോക്‌സ്. മണിക്കൂറില്‍ 160 കിലോമീറ്റര്‍ വരെ കുതിക്കാന്‍ പുതിയ എന്‍ഫീല്‍ഡ് 650 സഹോദരങ്ങള്‍ക്ക് സാധിക്കുമെന്നാണ് റിപ്പോര്‍്ട്ട്.
