തിരുവനന്തപുരം : പെട്രോള്/ ഡീസല് ഉത്പന്നങ്ങളുടെ വില കുതിച്ചു കയറി ജനജീവിതം മഹാദുരിതത്തിലായപ്പോള് കേന്ദ്ര ബജറ്റില് ഇളവ് പ്രതീക്ഷിച്ചെങ്കിലും അതുണ്ടായില്ലെന്ന് ഉമ്മന് ചാണ്ടി. എക്സൈസ് നികുതി അല്പം കുറച്ചെങ്കിലും സെസ് ഏര്പ്പെടുത്തിയതോടെ വില ഉയര്ന്നു നില്ക്കുന്നു. ഇതു വലിയ ജനദ്രോഹം തന്നെയാണെന്നും ഉമ്മന് ചാണ്ടി പറഞ്ഞു.കോവിഡ് വാക്സിന് സൗജന്യമായി ലഭിക്കുമെന്ന പ്രതീക്ഷയും അസ്ഥാനത്തായി.
കോവിഡ് കാലത്ത് ജനങ്ങള്ക്കു നേരിട്ടു പണം ലഭിക്കുന്ന ഒരു പദ്ധതിയും പ്രഖ്യാപിച്ചില്ല. കോണ്ഗ്രസ് സര്ക്കാരുകള് പടുത്തുയര്ത്തിയ പൊതുമേഖലാ സ്ഥാപനങ്ങളെ വിറ്റഴിക്കുന്ന പരിപാടി പൂര്വാധികം ഊര്ജിതമാക്കി. ദേശീയ പാതകള് ജനങ്ങളുടെ പണം ഉപയോഗിച്ച് നിര്മിച്ച ശേഷം ടോള് പിരിവ് വിദേശ കുത്തകകളെയാണ് ഏല്പിക്കുന്നത്. കഴിഞ്ഞ മാസം മാത്രം ഏഴ് തവണയാണ് പെട്രോള് വില കൂട്ടിയത്. അന്താരാഷ്ട്ര വിപണിയില് ബെന്റ് ഇനം ക്രൂഡിന് വില 2020 ജനുവരിയില് 63.65 ഡോളറായിരുന്നത് ഇപ്പോള് 55.61 ഡോളറായി കുറഞ്ഞു നില്ക്കുമ്പോഴാണ് രാജ്യത്ത് വില കുതിക്കുന്നത്.