കാഠ്മണ്ഡു: എവറസ്റ്റില്‍ കാണാതായ ഇന്ത്യന്‍ പര്‍വതാരോഹകന്റെ മൃതദേഹം കണ്ടെത്തി.
ഉത്തർപ്രദേശിലെ മൊറാദാബാദ് സ്വദേശിയായ രവികുമാറിന്റെ മൃതദേഹമാണ് രണ്ടു ദിവസത്തിനുശേഷം ഷെർപകൾ കണ്ടെത്തിയത്.
ശനിയാഴ്ചയാണ് രവി കുമാറിനെ കാണാതാകുന്നത്. ടോപ്പ് സ്‌റ്റേഷനില്‍ എത്തിയ രവി കുമാറുമായുള്ള ആശയവിനിമയ ബന്ധം നഷ്ടമാവുകയായിരുന്നു.
തുടര്‍ന്ന് നടത്തിയ അന്വേഷണത്തിലാണ് മൃതദേഹം കണ്ടെത്തിയത്. പ്രധാന പാതയില്‍ നിന്നും 200 മീറ്റര്‍ അകലെയാണ് രവി കുമാറിന്റെ മൃതദേഹം കണ്ടെത്തിയിരിക്കുന്നത്.
മൃതദേഹം വീണ്ടെടുക്കാനുള്ള സാധ്യതകള്‍ രക്ഷാപ്രവര്‍ത്തന സംഘം പരിശോധിച്ചുവരികയാണെന്ന് വാര്‍ത്താ ഏജന്‍സികള്‍ റിപ്പോര്‍ട്ട് ചെയ്യുന്നു.
രവി കുമാറിന്റെ നേപ്പാള്‍ സ്വദേശിയായ ഗൈഡ് ടോപ്പ് സ്‌റ്റേഷന് താഴെയുള്ള ക്യാംപ് 4-ല്‍ തിരിച്ചെത്തിയിരുന്നു. മലയിറങ്ങുന്നതിനിടെ ഇരുവരും രണ്ടുവഴിക്കായിപ്പോയതാണെന്നാണ് സൂചന. കടുത്ത ശൈത്യമേറ്റതിനെ തുടര്‍ന്ന് ഗുരുതരമായ നിലയിലാണ് ഇയാള്‍.
ഒരാഴ്ചയ്ക്കിടെ അമേരിക്ക, സ്ളോവാക്യ, ഓസ്ട്രേലിയ എന്നിവിടങ്ങളിൽനിന്നുള്ള പർവതാരോഹകർ എവറസ്റ്റിൽ അപകടത്തിൽ മരിച്ചിരുന്നു.
എവറസ്റ്റില്‍ അടുത്ത ദിവസങ്ങളില്‍ മരിക്കുന്ന നാലാമത്തെ ആളാണ് രവി കുമാര്‍. ഉയര്‍ന്ന പ്രദേശത്ത് എത്തുമ്പോഴുണ്ടാകുന്ന ആരോഗ്യ പ്രശ്‌നങ്ങള്‍ മൂലമാണ് മരണങ്ങളെന്നാണ് വിവരം.
