ദില്ലി: മാര്‍ച്ചിലെ ജിഎസ്ടി വരുമാനം എക്കാലത്തെയും ഉയര്‍ന്ന നിലവാരമായ 1.24 ലക്ഷം കോടി രൂപയ്ക്ക് സമീപമെത്തി. കഴിഞ്ഞ വര്‍ഷം ഇതേ മാസത്തെ വരുമാനമായി താരതമ്യംചെയ്യുമ്പോള്‍ 27 ശതമാനമാണ് വരുമാന വര്‍ധന. ജിഎസ്ടി നടപ്പാക്കിയതിനു ശേഷം ഇത്രയും ഉയര്‍ന്ന വരുമാനം ലഭിക്കുന്നത് ഇതാദ്യമായാണ്.
‘കഴിഞ്ഞ അഞ്ച് മാസത്തിനിടെ ജിഎസ്ടി വരുമാനത്തില്‍ വീണ്ടെടുക്കല്‍ പ്രവണതയ്ക്ക് അനുസൃതമായി, 2021 മാര്‍ച്ച് മാസത്തെ വരുമാനം കഴിഞ്ഞ വര്‍ഷത്തെ ഇതേ മാസത്തെ ജിഎസ്ടി വരുമാനത്തേക്കാള്‍ 27 ശതമാനം കൂടുതലാണ്,’ ധനമന്ത്രാലയം പ്രസ്താവനയില്‍ പറഞ്ഞു.
കഴിഞ്ഞ ആറു മാസമായി ജിഎസ്ടി വരുമാനം ഒരു ട്രില്യണ്‍ രൂപയ്ക്ക് മുകളിലാണെന്നും ഈ കാലയളവില്‍ കുത്തനെ വര്‍ദ്ധിക്കുന്ന പ്രവണത ദ്രുതഗതിയിലുള്ള സാമ്പത്തിക വീണ്ടെടുക്കലിന്റെ വ്യക്തമായ സൂചകങ്ങളാണെന്നും മന്ത്രാലയം അറിയിച്ചു.
വ്യാജ ബില്ലിംഗിനെതിരായ സൂക്ഷ്മ നിരീക്ഷണം, ജിഎസ്ടി, ആദായനികുതി, കസ്റ്റംസ് ഐടി സംവിധാനങ്ങള്‍ എന്നിവയുള്‍പ്പെടെ ഒന്നിലധികം സ്രോതസ്സുകളില്‍ നിന്നുള്ള ഡാറ്റ ഉപയോഗിക്കുന്ന ആഴത്തിലുള്ള ഡാറ്റാ അനലിറ്റിക്‌സ്, ഫലപ്രദമായ ടാക്‌സ് അഡ്മിനിസ്‌ട്രേഷന്‍ എന്നിവയും കഴിഞ്ഞ കുറച്ച് മാസങ്ങളായി നികുതി വരുമാനത്തില്‍ ക്രമാനുഗതമായ വര്‍ദ്ധനവിന് കാരണമായിട്ടുണ്ട്.
മാര്‍ച്ച് മാസത്തെ ആകെ നികുതി വരുമാനം 1,23,902 കോടി രൂപയാണ്. ശേഖരിച്ച മൊത്തം വരുമാനത്തില്‍ സിജിഎസ്ടി 22,973 കോടി രൂപയും എസ്ജിഎസ്ടി 29,329 കോടി രൂപയും ഐജിഎസ്ടി 62,842 കോടി രൂപയുമാണ് (ചരക്ക് ഇറക്കുമതിയുമായി ബന്ധപ്പെട്ട 31,097 കോടി രൂപ ഉള്‍പ്പെടെ) സെസ് 8,757 കോടി രൂപയുമാണ് ( ചരക്ക് ഇറക്കുമതിയുമായി ബന്ധപ്പെട്ട 935 കോടി രൂപ ഉള്‍പ്പെടെ).
മാര്‍ച്ചിലെ അഡ്‌ഹോക് സെറ്റില്‍മെന്റുകള്‍ക്ക് ശേഷം കേന്ദ്രത്തിന്റെയും സംസ്ഥാനങ്ങളുടെയും ആകെ വരുമാനം സിജിഎസ്ടിക്ക് 58,852 കോടി രൂപയും എസ്ജിഎസ്ടിക്ക് 60,559 കോടി രൂപയുമാണ്. 2021 മാര്‍ച്ച് മാസത്തില്‍ 30,000 കോടി രൂപ ജിഎസ്ടി നഷ്ടപരിഹാരവും കേന്ദ്രം വിതരണം ചെയ്തിട്ടുണ്ട്.
ചരക്ക് ഇറക്കുമതിയില്‍ നിന്നുള്ള വരുമാനം 70 ശതമാനം കൂടുതലാണ്. ആഭ്യന്തര ഇടപാടുകളില്‍ നിന്നുള്ള വരുമാനം (സേവന ഇറക്കുമതി ഉള്‍പ്പെടെ) കഴിഞ്ഞ വര്‍ഷം ഇതേ മാസത്തില്‍ ഈ സ്രോതസ്സുകളില്‍ നിന്നുള്ള വരുമാനത്തേക്കാള്‍ 17 ശതമാനം കൂടുതലാണ്.
ഈ സാമ്പത്തിക വര്‍ഷത്തിന്റെ മൂന്നാമത്തെയും നാലാമത്തെയും പാദങ്ങള്‍, യഥാക്രമം, കഴിഞ്ഞ വര്‍ഷത്തെ ഇതേ കാലയളവിനെ അപേക്ഷിച്ച്, ജിഎസ്ടി വരുമാനവും സമ്പദ് വ്യവസ്ഥയും വീണ്ടെടുക്കുന്നതിന്റെ വ്യക്തമായ സൂചന നല്‍കുന്നു.
