രൺവീർ സിങ്ങിനെ നായകനാക്കി കബീർ ഖാൻ ഒരുക്കിയ സ്പോർട്സ് ചിത്രം ’83’ ഈ വർഷം ജൂണിൽ പ്രദർശനത്തിനെത്തുമെന്ന് റിപ്പോർട്ട്. ഇന്ത്യൻ ടീം ആദ്യമായി ക്രിക്കറ്റ് ലോകകപ്പ് സ്വന്തമാക്കിയ ദിവസത്തിൽ തന്നെ ചിത്രം റിലീസ് ചെയ്യുമെന്നും സൂചനയുണ്ട്. തിയറ്ററുകൾ തുറന്നു പ്രവത്തിക്കാൻ തുടങ്ങിയ സാഹചര്യത്തിൽ ചിത്രം തിയറ്ററിലെത്തിക്കാനാണു റിലയൻസ് എൻറർടൈൻമെൻറ് ലക്ഷ്യമിടുന്നത്. 1983 ജൂൺ 25നായിരുന്നു കപിൽ ദേവിന്റെ നേതൃത്വത്തിൽ ഇന്ത്യൻ ടീം കന്നിക്കപ്പിൽ മുത്തമിട്ടത്.
ചിത്രത്തിൽ കപിൽ ദേവിന്റെ വേഷത്തിലാണ് രൺവീറെത്തുന്നത്. ഇന്ത്യയുടെ ലോകകപ്പ് നേട്ടം തന്നെയാണ് ചിത്രത്തിന്റെ ഇതിവൃത്തം. തമിഴ് നടൻ ജീവ ചിത്രത്തിൽ മുൻ താരം കൃഷ്ണമാചാരി ശ്രീകാന്തിന്റെ വേഷത്തിലെത്തുന്നുണ്ട്. താഹിർ രാജ് ഭാസിൻ, അമ്മി വിർക്, സാഖിബ് സലീം, ഹാർദേ സന്ദു, സാഹിൽ ഖട്ടർ എന്നിവരും മറ്റ് ഇന്ത്യൻ താരങ്ങളായി എത്തും. കപിൽ ദേവിന്റെ പത്നിയായി ദീപിക പദുകോണാണ് വേഷമിടുന്നത്.
