മഹിഷ്മതി സാമ്രാജ്യത്തെ അടക്കിഭരിച്ച് ബാഹുബലിയെ ബുദ്ധികൂര്‍മത കൊണ്ട് കീഴ്‌പ്പെടുത്തിയ ഭല്ലാല്‍ ദേവനായ
റാണ ദഗുപതി ഹോളിവുഡ് ചിത്രത്തിന്റെ തെലുഗ് പതിപ്പിന്റെ ഭാഗമാവുന്നു. അവഞ്ചേഴ്‌സ്: ഇന്‍ഫിനിറ്റി വാര്‍ യൂണിവേഴ്‌സിന്റെ തെലുഗ് പതിപ്പില്‍ തന്റെ ശബ്ദം നല്‍കിയാണ് റാണ ഹോളിവുഡിന്റെ ഭാഗമാകുന്നത്.
താനോസ് എന്ന പ്രധാനപ്പെട്ട കഥാപാത്രത്തിനാണ് അദ്ദേഹം ശബ്ദം നല്‍കിയത്. സൂപ്പര്‍ഹീറോസിന് ഏറെ വെല്ലുവിളിയായ താനോസ് എന്ന വില്ലന് ശബ്ദം നല്‍കുന്നതിന്റെ ത്രില്ലിലാണ് റാണ ദഗുപതി. ‘അയണ്‍ മാനും കാപ്റ്റന്‍ അമേരിക്കയുമാണ് തന്റെ ഇഷ്ടപ്പെട്ട കഥാപാത്രങ്ങളെന്നും അതുകൊണ്ട് തന്നെ അവഞ്ചേഴ്‌സിനായി ശബ്ദം നല്‍കുന്നതില്‍ സന്തോഷമുണ്ടെന്നും റാണ പറഞ്ഞു.
ഏപ്രില്‍ 27-നാണ് ചിത്രം റിലീസ് ചെയ്യുക. ഡിസ്‌നി ഇന്ത്യയാണ് റാണയെ ഇതിനായി തിരഞ്ഞെടുത്തത്. ചിത്രത്തിലെ വില്ലന് കഥാപാത്രത്തിന് വേണ്ടിയാണ് റാണ സംസാരിക്കുക. സൂപ്പര്‍ഹീറോ ചിത്രങ്ങള്‍ കണ്ടാണ് താന്‍ വളര്‍ന്നതെന്നും ഇതിന്റെ ഭാഗമാവാന്‍ കഴിഞ്ഞതില്‍ സന്തോഷമുണ്ടെന്നും റാണ ദഗുപതി പറഞ്ഞു. താനോസിന് റാണയുടെ ശബ്ദം നല്‍കുന്നതിലൂടെ ഇന്ത്യയിലൊട്ടാകെ ചിത്രത്തിന് സ്വീകാര്യം കിട്ടുമെന്നാണ് ഡിസ്‌നി ഇന്ത്യയുടെ പ്രതീക്ഷയും.
നേരത്തേ, ജംഗിള്‍ ബുക്കിനായി 2016-ല്‍ ബോളിവുഡ് താരങ്ങളെ കൊണ്ട് ഹിന്ദി പതിപ്പില്‍ ഡബ്ബ് ചെയ്തിരുന്നു. പ്രിയങ്ക ചോപ്ര, ഇര്‍ഫാന്‍ ഖാന്‍, നാനാ പടേകര്‍, ഓം പുരി, ഷെഫാലി ഷാ എന്നിവരായിരുന്നു അന്ന് ചിത്രത്തിനായി ശബ്ദം നല്‍കിയത്. ക്യാപ്റ്റന്‍ അമേരിക്കയ്ക്കായി വരുണ്‍ ധവാനും നേരത്തേ ശബ്ദം നല്‍കിയിരുന്നു.
