ബാഹുബലി എന്ന ബ്രഹ്‌മാണ്ഡ ചിത്രത്തിന്റെ വിജയത്തിന് ശേഷം രാജമൗലി സംവിധാനം ചെയ്ത ചിത്രമാണ് ആര്‍ആര്‍ആര്‍. ആരാധകരുടെ പ്രതീക്ഷകള്‍ തെറ്റിക്കാതെ തന്നെ ആര്‍ആര്‍ആറും 2022-ലെ ബോക്സ് ഓഫീസ് ഹിറ്റായി മാറിയിരുന്നു. ചിത്രം ഒ.ടി.ടി റിലീസായതോടെ ലോകശ്രദ്ധയാകർഷിച്ചു. ബോക്സ് ഓഫീസ് കളക്ഷൻ റെക്കോർഡുകൾ ഭേദിച്ച ചിത്രത്തേക്കുറിച്ച് തുടർച്ചയായി വിമർശനം ഉന്നയിക്കുകയാണ് സംവിധായകൻ രാംഗോപാൽ വർമ. നേരത്തെ ആർ.ആർ.ആർ ഗേ ചിത്രമാണെന്ന വർമയുടെ പരാമർശം ഏറെ വിവാദങ്ങൾക്ക് വഴിവെച്ചിരുന്നു.
ആർ.ആർ.ആർ തന്നത് ഒരു സർക്കസ് കാണുന്ന പ്രതീതിയാണെന്ന് രാംഗോപാൽ വർമ പറഞ്ഞു. ഒരു ദേശീയ മാധ്യമത്തിന് നൽകിയ അഭിമുഖത്തിലായിരുന്നു അദ്ദേഹത്തിന്റെ ഈ പരാമർശം. നായകന്മാരായ ജൂനിയർ എൻ.ടി.ആറും രാംചരൺ തേജയും പ്രൊഫഷണൽ ജിംനാസ്റ്റിക് കലാകാരന്മാരാണെന്ന് തോന്നി. അവരുടെ സംഘട്ടനരംഗങ്ങൾ സർക്കസിലെ പ്രകടനമായാണ് തോന്നിയതെന്നും രാംഗോപാൽ വർമ പറഞ്ഞു. അതേസമയം, ചിത്രത്തിലെ തീവണ്ടി അപകടരംഗത്തെ രാം ഗോപാൽ വർമ പുകഴ്ത്തുകയും ചെയ്തു.
