തിരുവനന്തപുരം: സര്ക്കാരിന്റെ ദുര്വൃത്തികളെ പി എസ് സി ചെയര്മാന് വെള്ളപൂശുകയാണെന്ന് പ്രതിപക്ഷ നേതാവ് രമേശ് ചെന്നിത്തല. ഒരു കാലത്തും ഉണ്ടാകാത്ത വിധത്തില് പി.എസ്.സി റാങ്ക് ലിസ്റ്റുകളെ നോക്കു കുത്തിയാക്കി കരാര് നിയമനങ്ങളും പിന്വാതില് നിയമനങ്ങളും പൊടി പൊടിക്കുമ്പോള് അതിനെതിരെയുള്ള ഉദ്യോഗാര്ത്ഥികളുടെ പ്രതിഷേധം തെറ്റിദ്ധാരണ കൊണ്ടെണെന്ന് പറയുന്ന പി എസ് സി ചെയര്മാന്റെ നിലപാട് പ്രതിഷേധാര്ഹമാണെന്നും ചെന്നിത്തല പറഞ്ഞു.
‘ജോലിയില് കരാര് നിയമനങ്ങള് ഒന്നും നടക്കുന്നില്ലെന്ന ചെയര്മാന്റെ വാദം അത്ഭുതകരമാണ്. കണ്സള്ട്ടന്സികള് വഴി കരാര് നിയമനം നടത്തുന്ന കാര്യം സര്ക്കാര് തന്നെ സമ്മതിക്കുമ്പോള് പി.എസ്.സി ചെയര്മാന് അത് നിഷേധിക്കുന്നത് രാജാവിനെക്കാള് വലിയ രാജഭക്തി കാരണമാണ്. കോവിഡിന്റെ മറവില് സംസ്ഥാനത്ത് പി.എസ്.സി വഴിയുള്ള നിയമനങ്ങള് മാസങ്ങളായി നിര്ത്തി വച്ചിരിക്കുകയാണ്.
കഴിഞ്ഞ ഏതാനും മാസങ്ങളില് നൂറിലധികം റാങ്കു ലിസ്റ്റുകളാണ് ലാപ്സായത്. നാമമാത്രമായ നിയമനങ്ങള് മാത്രമേ അതില് നടന്നിട്ടുള്ളൂ. സിവില് പൊലീസ് ഓഫീസര്, ലാസ്റ്റ് ഗ്രേഡ്, ഇംഗ്ലീഷ് ലക്ച്ചറര് തുടങ്ങിയ ഒട്ടേറെ ലിസ്റ്റുകളില് പേരിന് മാത്രം നിയമനം നടന്നു. നഴ്സുമാരുടെ റാങ്ക് ലിസ്റ്റ് വെറുതെ കിടക്കുമ്പോള് താത്ക്കാലികരെ നൂറു കണക്കിനാണ് നിയമിക്കുന്നത്.
അതിനാല് താത്ക്കാലിക നിയമനങ്ങളും പിന്വാതില് നിയമനങ്ങളും അവസാനിപ്പിച്ച് പി.എസ്.സി വഴി നിയമനങ്ങള് നടത്താന് സര്ക്കാര് തയ്യാറാവണം. അതിന് വേണ്ടി റാങ്കു ലിസ്റ്റുകളുടെ കാലാവധി നീട്ടണമെന്നും ചെന്നിത്തല ആവശ്യപ്പെട്ടു.