തിരുവനന്തപുരം: ബിജെപി സംസ്ഥാന ജനറല് സെക്രട്ടറി കെ സുരേന്ദ്രനെ നിലയ്ക്കലില് പൊലീസ് കസ്റ്റഡിയിലെടുത്തതില് പ്രതിഷേധിച്ച് ബിജെപി ഇന്ന് സംസ്ഥാന വ്യാപകമായ പ്രതിഷേധദിനം ആചരിക്കുന്നു. പ്രതിഷേധത്തിന്റെ ഭാഗമായി സംസ്ഥാനത്തിന്റെ വിവിധ ഭാഗങ്ങളില് പ്രതിഷേധ പരിപാടികള് സംഘടിപ്പിക്കുമെന്നും ഹൈവേകളില് വാഹനം തടയുമെന്നും ബിജെപി സംസ്ഥാന പ്രസിഡന്റ് പിഎസ് ശ്രീധരന്പിള്ള പറഞ്ഞു.
സന്നിധാനത്തേക്ക് പോകുന്നതിനായി നിലയ്ക്കലില് എത്തിയപ്പോഴാണ് ബിജെപി നേതാവ് കെ. സുരേന്ദ്രന് അടക്കമുള്ളവരെ പോലീസ് കസ്റ്റഡിയിലെടുത്തത്. സന്നിധാനത്തേക്ക് പോകുമെന്നും നെയ്യഭിഷേകം കഴിഞ്ഞേ മടങ്ങൂവെന്നും വ്യക്തമാക്കിക്കൊണ്ടാണ് കെ. സുരേന്ദ്രന്റെ നേതൃത്വത്തില് അഞ്ചംഗ സംഘം കാറില് നിലയ്ക്കലില് എത്തിയത്. എന്നാല്, ക്രമസമാധാന പ്രശ്നങ്ങള് ചൂണ്ടിക്കാട്ടി എസ്.പി യതീശ് ചന്ദ്രയുടെ നേതൃത്വത്തിലുള്ള പോലീസ് സംഘം അദ്ദേഹത്തെ കസ്റ്റഡിയിലെടുക്കുകയായിരുന്നു.
ഇന്ന് പുലര്ച്ചെ ഏകദേശം നാല് മണിയോടെ സുരേന്ദ്രനെ മജിസ്ട്രേറ്റിന് മുന്നില് ഹാജരാക്കാനായി കൊണ്ടുപോയി. ചിറ്റാറില് നിന്നും പത്തനംതിട്ടയിലേക്കാണ് കൊണ്ടുപോയത്. സുരേന്ദ്രനെതിരെ ജാമ്യമില്ലാ വകുപ്പുകള് ചുമത്തിയാണ് കേസെടുത്തിരിക്കുന്നത്.