തിരുവനന്തപുരം: സംസ്ഥാനത്ത് കോവിഡ് പരിശോധനകളുടെ എണ്ണം വര്‍ധിപ്പിക്കാന്‍ ആരോഗ്യമന്ത്രി വീണ ജോര്‍ജ് നിര്‍ദേശം നല്‍കി. ദിവസം രണ്ട് ലക്ഷം പരിശോധനകളെങ്കിലും നടത്താനാണ് നിര്‍ദേശം. ആരോഗ്യമന്ത്രിയുടെ അധ്യക്ഷതയില്‍ ചേര്‍ന്ന അവലോകന യോഗത്തിലാണ് ഇതുസംബന്ധിച്ച നിര്‍ദേശമുണ്ടായത്.
പരിശോധന വര്‍ധിപ്പിക്കുന്നതിനൊപ്പം വാക്‌സിനേഷനും കൂട്ടും. ആള്‍ക്കൂട്ടം നിയന്ത്രിക്കുന്നതിനുള്ള കടുത്ത നടപടികള്‍ സ്വീകരിക്കാനും ആരോഗ്യമന്ത്രി നിര്‍ദേശം നല്‍കി. ഓണാഘോഷത്തിന് പിന്നാലെ സംസ്ഥാനത്ത് കോവിഡ് രോഗികളുടെ എണ്ണം വര്‍ധിക്കുമെന്ന് ആരോഗ്യവകുപ്പ് വ്യക്തമാക്കിയിരുന്നു. വരുന്ന ആഴ്ചകളില്‍ ചികിത്സയിലുള്ള രോഗികളുടെ എണ്ണം നാല് ലക്ഷം കടക്കുമെന്നാണ് വിലയിരുത്തല്‍.
