കടുവ സിനിമയില് ഡൗണ് സിന്ഡ്രോമുള്ള കുട്ടിയെ പറ്റിയുള്ള വിവാദ രംഗത്തില് പരസ്യമായി മാപ്പുപറഞ്ഞ് അണിയറ പ്രവര്ത്തകര്. ചിത്രത്തിലെ നായകന് പൃഥ്വിരാജും സംവിധായകന് ഷാജികൈലാസും തിരക്കഥകൃത്ത് ജിനു എബ്രഹം, നിര്മ്മാതാവ് ലിസ്റ്റിന് സ്റ്റീഫന് എന്നിവര് ചേര്ന്ന് നടത്തിയ വാര്ത്താസമ്മേളനത്തിലാണ് അണിയറ പ്രവര്ത്തകര് മാപ്പു പറഞ്ഞത്.ചിത്രത്തിലെ വിവാദമായ പരാമര്ശം എഡിറ്റ് ചെയ്ത് മാറ്റുമെന്നും പുതിയ പതിപ്പ് സെന്സര് ബോര്ഡിന്റെ അംഗീകാരത്തിനായി നല്കുമെന്നും പൃഥ്വിരാജ് പറഞ്ഞു. ഇന്നലെ വൈകുന്നേരമാണ് ഇത്തരത്തില് ഒരു വിവാദം ഉണ്ടെന്നും ഞങ്ങള് തെറ്റുകാരണെന്നും തിരിച്ചറിഞ്ഞതെന്നും അദ്ദേഹം പറഞ്ഞു.
പുതിയ സെന്സര് നിയമമനുസരിച്ച് സിനിമയുടെ ഒരു ഭാഗം മാറ്റുന്നുണ്ടെങ്കില്. സെന്സര് ബോര്ഡിന് അയച്ച് അംഗീകാരം വാങ്ങിയ ശേഷം മാത്രം ക്യൂബിലേക്കും മറ്റും അപ് ലോഡ് ചെയ്യാന് സാധിക്കുകയുള്ളു. ഇന്നലെ ഞായറാഴ്ച ആയത് കൊണ്ട് ഇതിന് സാധിച്ചിരുന്നില്ല. ഇന്ന് തിങ്കളാഴ്ച സെന്സറിംഗിന് മാറ്റിയ ഭാഗം കൊടുക്കുകയും സെന്സര് ചെയ്ത് ലഭിച്ചാല് മാറ്റിയ ഭാഗം ഇന്ന് രാത്രിയോടെ തന്നെ തിയേറ്ററുകളില് മാറ്റുകയും ചെയ്യുമെന്നും പൃഥ്വിരാജ് പറഞ്ഞു.