പട്ന: ലോക്സഭാ തിരഞ്ഞെടുപ്പില് ജനതാ ദള് യുണൈറ്റിഡിന്റെ തിരഞ്ഞെടുപ്പ് പ്രചാരണ ചുമതല വഹിക്കില്ലെന്ന് പാര്ട്ടി ഉപാധ്യക്ഷന് പ്രശാന്ത് കിഷോര്. പഠിക്കുകയും സഹകരിച്ച് പ്രവര്ത്തിക്കുകയുമാണ് തന്റെ ചുമതലയെന്ന് അദ്ദേഹം ട്വീറ്റിലൂടെ അറിയിച്ചു. പ്രശാന്ത് കിഷോറിന് പകരം പരിചയ സമ്പന്നനും മുതിര്ന്ന നേതാവുമായ ആര്സിപി സിങിനായിരിക്കും പ്രചാരണ ചുമതല നല്കുക.
പ്രധാനമന്ത്രി നരേന്ദ്ര മോദിയുടേയും നിതീഷ് കുമാറിന്റേയും നേതൃത്വത്തില് ബിഹാറില് എന്ഡിഎ ശക്തമായി പോരാടും. തന്റെ രാഷ്ട്രീയ ജീവിതത്തിന്റെ ഈ പ്രാരംഭഘട്ടത്തില് പഠിക്കുകയും സഹകരിക്കുകയുമാണ് തന്റെ കടമയെന്നും അദ്ദേഹം വ്യക്തമാക്കി.പാര്ട്ടിയിലെ മുതിര്ന്ന നേതാക്കളുടെ അനിഷ്ടമാണ് പ്രശാന്ത് കിഷോര് പ്രചാരണ ചുമതല ഏറ്റെടുക്കാത്തതെന്നാണ് സൂചന.
കഴിഞ്ഞ വര്ഷമാണ് അദ്ദേഹം ജെഡിയുവില് ചേര്ന്നത്.പാര്ട്ടിയില് ചേര്ന്ന ഉടനെ നിതീഷ് കുമാര് അദ്ദേഹത്തെ പാര്ട്ടിയുടെ ഉപാധ്യക്ഷനാക്കുകയും സുപ്രധാന ചുമതലകള് ഏല്പ്പിക്കുകയും ചെയ്തിരുന്നു. ഇത് മുതിര്ന്ന നേതാക്കളില് അഭിപ്രായഭിന്നതക്കിടയാക്കിയിട്ടുണ്ടെന്നാണ് റിപ്പോര്ട്ടുകള്.