ന്യൂഡല്ഹി: മുന് രാഷ്ട്രപതി പ്രണബ് മുഖര്ജിയുടെ ആരോഗ്യനില ഗുരുതരമായി തുടരുന്നു. അദ്ദേഹം കോമയിലാണെന്ന് ഡല്ഹി ആര്മി റിസര്ച്ച് ആന്ഡ് റഫറല് ആശുപത്രി അറിയിച്ചു. ആശുപത്രിയില് പ്രവേശിപ്പിക്കപ്പെട്ട 84-കാരനായ പ്രണബ് മുഖര്ജിക്ക് നേരത്തെ പരിശോധനയില് കോവിഡും സ്ഥിരീകരിച്ചിരുന്നു. തലച്ചോറില് രക്തം കട്ട പിടിച്ചതിനെ തുടര്ന്ന് അടിയന്തര ശസ്ത്രക്രിയക്ക് വിധേയനാക്കിയ അദ്ദേഹത്തിന്റെ ആരോഗ്യസ്ഥിതിയില് പുരോഗതിയില്ലെന്ന് ആശുപത്രി അറിയിച്ചു.
വെന്റിലേറ്റര് സഹായത്തോടെ തുടരുന്ന പ്രണബിന്റെ രക്തചംക്രമണം അടക്കമുള്ളവയില് സ്ഥിരതയുണ്ടെന്നു ഡോക്ടര്മാര് ഇന്നലെ അറിയിച്ചിരുന്നു. പ്രണബിന്റെ ധമനികളിലെയും ഹൃദയത്തിലെയും രക്തയോട്ടം അടക്കമുള്ള കാര്യങ്ങളില് (ഹീമോഡൈനാമിക്കലി) യന്ത്രസഹായത്താല് സ്ഥിരതയുണ്ടെന്നു സൈനിക ആശുപത്രി ബുധനാഴ്ച പ്രസ്താവനയില് വ്യക്തമാക്കിയിരുന്നു.