തിരുവനന്തപുരം: കേരളത്തില് ചിലയിടങ്ങളില് വോട്ടിംഗ് യന്ത്രങ്ങള്ക്ക് തകരാര്. മെഷിന് തകരാറ് കണ്ടെത്തിയതിനെത്തുടര്ന്ന് തെരഞ്ഞെടുപ്പ് വൈകി. കോഴിക്കോട്ടാണ് മോക് പോളിംഗിൽ ആദ്യം പാകപ്പിഴ കണ്ടെത്തിയത്. കൊല്ലത്തും വിവി പാറ്റ് യന്ത്രത്തിന് തകരാർ കണ്ടെത്തി. മലപ്പുറത്ത് പലയിടത്തും വൈദ്യുതിയില്ലാത്തതിനാൽ മെഴുകുതിരി വെട്ടത്തിലാണ് മോക് പോളിംഗ്.
കണ്ണൂര് കാഞ്ഞിരക്കൊല്ലിയിലെ 149-ാം ബൂത്തിലെ വോട്ടിംഗ് യന്ത്രം തകരാറിലായി. യന്ത്രത്തിന്റെ ബട്ടണ് അമര്ത്താനാവുന്നില്ല. പകരം വോട്ടിംഗ് യന്ത്രം എത്തിക്കാനുള്ള ശ്രമം നടക്കുകയാണ്. എറണാകുളം എളമക്കര ഗവ ഹൈസ്കൂളിലേയും കോതമംഗലം ദേവസ്വം ബോര്ഡ് ഹൈസ്കൂളിലേയും പോളിംഗ് ബൂത്തുകളില് വോട്ടിംഗ് യന്ത്രത്തിന് തകരാര് റിപ്പോര്ട്ട് ചെയ്യപ്പെട്ടിട്ടുണ്ട്.
കൊല്ലം പരവൂർ നഗരസഭയിലെ പാറയിൽക്കാവ് വാർഡിൽ എൺപത്തി ഒന്നാം നമ്പർ ബൂത്തിൽ വോട്ടിംഗ് മെഷീൻ പ്രവർത്തിക്കുന്നില്ല. പ്രേമചന്ദ്രൻ എന്ന പേരിന് നേരേയുള്ള ബട്ടൺ അമർത്തുമ്പോൾ പ്രവർത്തിക്കുന്നില്ല. കോഴിക്കോട്ടെ തിരുത്തിയാട് ആശ്വാസകേന്ദ്രത്തിൽ 152-ാം നമ്പർ ബൂത്തിൽ വിവിപാറ്റ് യന്ത്രത്തിന് തകരാറുണ്ടായതിനാൽ മോക് പോളിംഗ് വൈകി.
വടകര നാദാപുരം മുളക്കുന്നിൽ 33-ാം നമ്പർ ബൂത്തിലും പശുക്കടവ് 34നമ്പർ ബൂത്തിലും വോട്ടിംഗ് മെഷിനിൽ തകരാർ കണ്ടെത്തി. തൃശൂർ അരിമ്പൂരിലെ പോളിങ് സ്റ്റേഷനിൽ 5 മെഷീനുകളിൽ യന്ത്ര തകരാർ കണ്ടെത്തി.