കൊച്ചി: കൊച്ചിയിലെ വൈഗ കൊലക്കേസ് പ്രതി സനുമോഹന്റെ കസ്റ്റഡി കാലാവധി നീട്ടാന് പൊലീസ് അപേക്ഷ നല്കിയേക്കും. നാളെ വൈകിട്ടാണ് കാലാവധി അവസാനിക്കുക. നാട്ടിലെ തെളിവെടുപ്പ് പൂര്ത്തിയാകാത്തതിനാലാണ് കൂടുതല് ദിവസം ആവശ്യപ്പെടുന്നത്.
കസ്റ്റഡിയില് കിട്ടിയ ശേഷം സനുമോഹനെ തമിഴ്നാട്, കര്ണാടക, മഹാരാഷ്ട്ര, എന്നിവിടങ്ങളില് തെളിവെടുപ്പിന് കൊണ്ടുപോയിരുന്നു. അതിനാല് നാട്ടിലെ തെളിവെടുപ്പ് പൂര്ത്തിയായിട്ടില്ല. സനുമോഹന്റെ ഭാര്യയോട് ഇന്ന് ചോദ്യം ചെയ്യലിന് ഹാജരാകാനും ആവശ്യപ്പെട്ടിട്ടുണ്ട്.
മൂന്ന് സംസ്ഥാനങ്ങളിലെ തെളിവെടുപ്പ് പൂര്ത്തിയാക്കി തിങ്കളാഴ്ചയാണ് സനുമോഹനെ കൊച്ചിയിലെത്തിച്ചത്. തുടര്ന്ന് കൊച്ചി ഡിസിപിയുടെ നേതൃത്വത്തിലുള്ള സംഘമാണ് സനുവിനെ ചോദ്യം ചെയ്തത്. വൈഗയെ കൊല്ലാന് സാമ്പത്തിക പ്രശ്നമല്ലാതെ മറ്റെന്തെങ്കിലും കാരണമുണ്ടോയെന്നാണ് പൊലീസ് പരിശോധിക്കുന്നത്.
പണം കൊടുക്കാനുള്ളവരെ കബളിപ്പിക്കാനാണ് മകളെ കൊന്നതെന്നും ആള്മാറാട്ടം നടത്തി ജീവിക്കാനായിരുന്നു പദ്ധതിയെന്നുമാണ് പൊലീസ് നിഗമനം. സനുമോഹന്റെ ഭാര്യയോട് ഇന്നലെ ചോദ്യം ചെയ്യാലിന് ഹാജരാകാന് ആവശ്യപ്പെട്ടിരുന്നെങ്കിലും ആരോഗ്യ പ്രശ്നങ്ങളുള്ളതിനാല് അടുത്ത ദിവസം എത്താമെന്നറിയിക്കുകയായിരുന്നു. പ്രതിയെ ഭാര്യയ്ക്കൊപ്പം ഇരുത്തി ചോദ്യം ചെയ്യാനും പൊലീസ് ആലോചിക്കുന്നുണ്ട്.