ന്യൂഡല്ഹി: ഇന്ത്യയുടെ സ്വാതന്ത്ര്യത്തിനായി പൊരുതിയ പലരുടെയും ചരിത്രം മൂടിവെയ്ക്കപ്പെട്ടുവെന്ന് പ്രധാനമന്ത്രി നരേന്ദ്രമോദി പറഞ്ഞു. ഇന്ത്യാഗേറ്റില് നേതാജി സുഭാഷ് ചന്ദ്രബോസിന്റെ ഹോളോഗ്രാം പ്രതിമ അനാച്ഛാദനം ചെയ്യുകയായിരുന്നു പ്രധാനമന്ത്രി.
28 അടി ഉയരത്തിലും 6 അടി വീതിയിലും ഗ്രാനൈറ്റില് നിര്മ്മിക്കുന്ന പ്രതിമയുടെ നിര്മ്മാണം പൂര്ത്തിയാകുന്നതുവരെ ഈ താത്കാലിക പ്രതിമയാണ് ഇനി ഇന്ത്യാഗേറ്റിലുണ്ടാകുക. നേതാജി രാജ്യത്തിന്റെ വീരപുത്രനാണെന്ന് പ്രധാനമന്ത്രി പറഞ്ഞു. സ്വാതന്ത്ര്യത്തിന് ശേഷം പല തെറ്റുകളും രാജ്യം ചെയ്തുവെന്നും ആ തെറ്റുകള് തിരുത്തുകയാണെന്നും നരേന്ദ്ര മോദി പറഞ്ഞു.
റിപ്പബ്ളിക് ദിന പരേഡില് നേതാജിയുടെ ഫ്ലോട്ട് ഒഴിവാക്കി എന്ന് മമത ബാനര്ജി ആരോപിച്ചതിന് പിന്നാലെയാണ് പ്രതിമ നിര്മ്മാണം മോദി പ്രഖ്യാപിച്ചത്.