കോട്ടയം: പി.ജെ ജോസഫിനെ കേരള കോണ്‍ഗ്രസ് ചെയര്‍മാനായി തെരഞ്ഞെടുത്തു. തൊടുപുഴയില്‍ ചേര്‍ന്ന ഭാരവാഹികളുടെ യോഗത്തിലായിരുന്നു തീരുമാനം. വര്‍ക്കിങ് ചെയര്‍മാനായി പി സി തോമസിനെയും എക്‌സിക്യൂട്ടീവ് ചെയര്‍മാനായി മോന്‍സ് ജോസഫിനെയും തെരഞ്ഞെടുത്തു. ചെയര്‍മാന്റെ അസാന്നിധ്യത്തില്‍ തീരുമാനങ്ങള്‍ എടുക്കാനുള്ള അധികാരം വര്‍ക്കിംഗ് ചെയര്‍മാനായിരിക്കും.
ഫ്രാന്‍സിസ് ജോര്‍ജ്, തോമസ് ഉണ്ണിയാടന്‍, ജോണി നെല്ലൂര്‍ എന്നിവര്‍ക്ക് ഡെപ്യൂട്ടി ചെയര്‍മാന്‍ സ്ഥാനം നല്‍കി. ടി യു കുരുവിളനെ ചീഫ് കോര്‍ഡിനേറ്ററായും ജോയ് എബ്രഹാമിനെ സെക്രട്ടറി ജനറലായും സി എബ്രഹാം ട്രെഷററായും തെരഞ്ഞെടുത്തു.
അതേസമയം, തെരഞ്ഞെടുപ്പ് യോഗത്തില്‍ നിന്ന് ഫ്രാന്‍സിസ് ജോര്‍ജ് വിട്ടുനിന്നു. മോന്‍സിനെ മാത്രം എക്‌സിക്യൂട്ടീവ് ചെയര്‍മാനായി തെരഞ്ഞെടുത്തതില്‍ ഫ്രാന്‍സിസ് ജോര്‍ജിന് അതൃപ്തിയുണ്ട്. അതൃപ്തിയുണ്ടെങ്കില്‍ സംസാരിച്ച് തീര്‍ക്കുമെന്ന് പി ജെ ജോസഫ് പറഞ്ഞു.
