തിരുവനന്തപുരം : ഗാന്ധി ഘാതകര് തന്നെ ഗാന്ധിജിയെ സ്വന്തമാക്കാന് ശ്രമിക്കുകയാണെന്ന് മുഖ്യമന്ത്രി പിണറായി വിജയന്. ഗാന്ധിജിയുടെ വാചകങ്ങളെ ഇവര് തങ്ങള്ക്ക് അനുകൂലമായി വ്യാഖ്യാനിക്കാന് ശ്രമിക്കുകയാണെന്നും അദ്ദേഹം പറഞ്ഞു.
സ്വന്തം ജീവിതം തന്നെ ലോകത്തിനുള്ള സന്ദേശമാക്കിയ നേതാവ്. ഗാന്ധിജി ഉയര്ത്തിപ്പിടിച്ച മൂല്യങ്ങള് നൂറ്റാണ്ട് പിന്നിടുമ്പോഴും ഒളിമങ്ങാതെ തിളങ്ങി നില്ക്കുന്നു. എല്ലാ വിഭാഗം ജനങ്ങളേയും ഒന്നായി കാണാനുള്ള വിശാലമായ കാഴ്ചപ്പാട് ഉയര്ത്തിപ്പിടിച്ചായിരുന്നു ഗാന്ധിജിയുടെ ഓരോ ചുവടുവെപ്പും.
രാജ്യത്തെ ഇന്ന് ഗാന്ധിയില് നിന്നും പുറകോട്ട് നടത്താനാണ് ചിലര് ശ്രമിക്കുന്നത്. ഈ സാഹചര്യത്തില് ഇത്തവണത്തെ ഗാന്ധി ജയന്തി ദിനാഘോഷങ്ങള്ക്ക് പ്രസക്തി വര്ധിക്കുന്നു. രാഷ്ട്രപിതാവായ ഗാന്ധിജിയേയും ആശയങ്ങളേയും നിലനിര്ത്തുമെന്ന പ്രതിജ്ഞയാണ് ഈ ദിനത്തില് ഓരോ ഇന്ത്യക്കാരനും ഉറക്കെ ചൊല്ലേണ്ടതെന്നും മുഖ്യമന്ത്രി വ്യക്തമാക്കി.
മഹാത്മാഗാന്ധിയുടെ നൂറ്റിയമ്പതാം ജന്മവാര്ഷികം രാജ്യം വിപുലമായ പരിപാടികളോടെയാണ് ആഘോഷിക്കുന്നത്.