ന്യൂഡല്ഹി: വിദേശത്ത് വച്ചു മരണപ്പെടുന്ന ഇന്ത്യക്കാരുടെ മൃതദേഹം നാട്ടിലെത്തിക്കുന്നതിന് തടസ്സങ്ങള് നീങ്ങി.പ്രവാസി ഇന്ത്യക്കാരുടെ മൃതദേഹങ്ങള് നാട്ടിലേക്ക് കൊണ്ടു വരാന്അനുമതി നല്കി കൊണ്ടുള്ള ഉത്തരവ് കേന്ദ്രസര്ക്കാര് പുറത്തിറക്കി. വിദേശകാര്യമന്ത്രാലയത്തിന്റെയും ആരോഗ്യമന്താലയത്തിന്റെയും അനുമതിയോടെ മൃതദേഹം നാട്ടിലെത്തിക്കാമെന്ന് ഉത്തരവില് പറയുന്നു. ഇതോടെ ഈ ദിവസങ്ങളില് ലോകത്തിന്റെ വിവിധ ഭാഗങ്ങളിലായി മരണപ്പെട്ട മലയാളികള് അടക്കമുള്ളവരുടെ മൃതദേഹങ്ങള് നാട്ടില് തിരിച്ച് എത്തിക്കാന് വഴിയൊരുങ്ങി.
എന്നാല്, കൊവിഡ് ബാധിച്ചു മരിച്ചവരുടെ മൃതദേഹം തിരിച്ചു കൊണ്ടു വരാന് സാധിക്കില്ല. കൊവിഡ് രോഗികള് മരണപ്പെട്ടാല് ഏറ്റവും അടുത്തുള്ള പ്രദേശത്ത് തന്നെ സംസ്കരിക്കുന്നതാണ് പതിവ്. ഇതിനിടെ വിദേശത്ത് കുടുങ്ങി കിടക്കുന്ന ഇന്ത്യക്കാരെ തിരികെ കൊണ്ടു വരാന് കേന്ദ്രസര്ക്കാര് നടപടികള് ആരംഭിച്ചു. ഇന്ന് കേന്ദ്ര ക്യാബിനറ്റ് സെക്രട്ടറി രാജീവ് ഗൌബേ വിവിധ സംസ്ഥാനങ്ങളിലെ ചീഫ് സെക്രട്ടറിയുമായി ഇക്കാര്യത്തില് പ്രാഥമിക ആശയവിനിമയം നടത്തി. വിദേശത്ത് നിന്നും തിരികെ വരുന്നവരെ നിരീക്ഷണത്തില് പാര്പ്പിക്കണമെന്ന് സംസ്ഥാനങ്ങള് ആവശ്യപ്പെട്ടിട്ടുണ്ട്.