അഹമ്മദാബാദ്.എഫ്എല്‍2027, എഫ്‌സി5 ഇനത്തില്‍ പെട്ട ഉരുളക്കിഴങ്ങ് കൃഷി ചെയ്തതിന് കര്‍ഷകര്‍ക്കെതിരെ കേസ് നല്‍കിയ പെപ്‌സികോ കമ്പനി അവശേഷിച്ച രണ്ട് കേസുകള്‍ കൂടി പിന്‍വലിച്ചു. അഹമ്മദാബാദിലെ വാണിജ്യ കോടതിയിലും സബര്‍കന്തയില്‍ മോദസ ജില്ലാ കോടതിയിലും അഞ്ച് കര്‍ഷകര്‍ക്കെതിരെ സമര്‍പ്പിച്ച കേസുകളാണ് കമ്പനി കഴിഞ്ഞ ദിവസം പിന്‍വലിച്ചത്.എന്നാല്‍ തങ്ങള്‍ക്കെതിരെ കേസ് കൊടുത്ത കമ്പനി മാപ്പ് പറഞ്ഞ് നഷ്ടപരിഹാരം നല്‍കണമെന്നാണ് കര്‍ഷകരുടെ ആവശ്യം.
എഫ്എല്‍2027, എഫ്‌സി5 ഇനത്തില്‍ പെട്ട ഉരുളക്കിഴങ്ങ് ഇനങ്ങളുടെ പൂര്‍ണ്ണ അവകാശം തങ്ങള്‍ക്കാണെന്നാണ് കോടതിയില്‍ സമര്‍പ്പിച്ച ഹര്‍ജിയില്‍ പെപ്‌സികോ അവകാശപ്പെട്ടത്. എന്നാല്‍ ജനങ്ങള്‍ കര്‍ഷകരെ പിന്തുണച്ചതോടെ പെപ്‌സികോ നിലപാടില്‍ അയവരുത്തുകയായിരുന്നു.
പ്രതിസ്ഥാനത്തുള്ള കര്‍ഷകര്‍ വാണിജ്യാടിസ്ഥാനത്തില്‍ കൃഷി ചെയ്യുന്നവരല്ലെന്നും അതിനാല്‍ തന്നെ കേസ് കോടതിയില്‍ നിലനില്‍ക്കില്ലെന്നുമാണ് കര്‍ഷകരുടെ അഭിഭാഷകന്‍ ആനന്ദ് യാഗ്‌നിക് പറഞ്ഞത്‌.
