ഭീകരര്‍ക്ക് പാക്ക് സഹായം ഇപ്പോഴും ഉണ്ട്; ശക്തമായ തിരിച്ചടി നല്‍കണം: യുഎസ് സംഘടന

വാഷിങ്ടണ്‍: ഭീകരവാദ വിഷയത്തില്‍ പാക്കിസ്ഥാനെതിരെ രൂക്ഷ വിമര്‍ശനവുമായി പ്രമുഖ അമേരിക്കന്‍ സംഘടനയായ ഫൗണ്ടേഷന്‍ ഫോര്‍ ഡിഫന്‍സ് ഓഫ് ഡെമോക്രസീസ്. ഇന്ത്യയില്‍ അതിശക്തമായ ആക്രമണം നടത്തിയ ഭീകരസംഘടനകള്‍ക്ക് പാക്കിസ്ഥാന്‍ ഇപ്പോഴും സഹായം നല്‍കുന്നുണ്ടെന്ന് സംഘടനയുടെ മുതിര്‍ന്ന അംഗം ബില്‍ റോജിയോ പറഞ്ഞു.

ഭീകരര്‍ക്കു പിന്തുണ നല്‍കുന്ന പാക്കിസ്ഥാന്‍ പോലുള്ള രാജ്യങ്ങള്‍ക്കെതിരെ അതിശക്തമായ നടപടി സ്വീകരിക്കാന്‍ അമേരിക്ക തയാറാകണം. പാക്കിസ്ഥാന്‍ നടത്തുന്ന ചതിക്കും വഞ്ചനയ്ക്കും കൃത്യമായി തിരിച്ചടി നല്‍കാത്തതു കൊണ്ടാണ് അവര്‍ ഇപ്പോഴും ഈ നടപടി തുടരുന്നതെന്നും ബില്‍ പറഞ്ഞു.

ഭീകര സംഘടനയായ താലിബാന് പാക്കിസ്ഥാന്‍ നല്‍കുന്ന പിന്തുണയാണ് അഫ്ഗാനില്‍ അമേരിക്കന്‍ സൈന്യത്തിനു തിരിച്ചടിയുണ്ടാകാന്‍ കാരണം. അവിടെനിന്ന് സൈന്യത്തെ പിന്‍വലിക്കാനുള്ള നീക്കം അംഗീകരിക്കുന്നില്ലെന്നും ബില്‍ പറഞ്ഞു. ഇതു ശത്രുക്കളുടെ മുന്നേറ്റത്തിനു മാത്രമേ ഉപകരിക്കൂ. സൈനികമായും ബുദ്ധിപരമായും ആക്രമണം നടത്താനുള്ള പദ്ധതി തയാറാക്കണമെന്നും അദ്ദേഹം ആവശ്യപ്പെട്ടു.

Top