എച്എംഡി ഗ്ലോബലിന്റെ ഉടമസ്ഥതയിലുള്ള ഫിന്നിഷ് സ്മാർട്ട്ഫോൺ ബ്രാൻഡ് നോക്കിയ കഴിഞ്ഞ ഓഗസ്റ്റിൽ വിൽപനയ്‌ക്കെത്തിച്ചതായിരുന്നു 5.3 സ്മാർട്ട്ഫോൺ. ഇപ്പോഴിതാ 5.3-യുടെ പിൻഗാമി നോക്കിയ 5.4 ആഗോള വിപണിയിലെത്തിയിരിക്കുകയാണ്. സൺസെറ്റ്, പോളാർ നൈറ്റ് എന്നിങ്ങനെ രണ്ട് കളർ ഓപ്ഷനുകളിലാണ് നോക്കിയ 5.4 വില്പനക്കെത്തിയിരിക്കുന്നത്. 4 ജിബി റാമും + 64 ജിബി സ്റ്റോറേജുമുള്ള അടിസ്ഥാന പതിപ്പിന് 189 യൂറോ (ഏകദേശം 16,900 രൂപ) ആണ് വില. 4 ജിബി റാമും + 128 ജിബി സ്റ്റോറേജും 6 ജിബി റാം + 64 ജിബി സ്റ്റോറേജ് ഓപ്ഷനുമുള്ള പതിപ്പുകളുടെ വില വ്യക്തമല്ല. ഡ്യുവൽ സിം (നാനോ) ഫോൺ ആയ നോക്കിയ 5.4 ആൻഡ്രോയിഡ് 10 ഓപ്പറേറ്റിംഗ് സിസ്റ്റത്തിലാണ് പ്രവർത്തിക്കുന്നത് (ആൻഡ്രോയിഡ് 11 ലേക്ക് അപ്ഗ്രേഡ് ചെയ്യാം). 6.39 ഇഞ്ച് എച്ച്ഡി+ ഐപിഎസ് എൽസിഡി ഡിസ്‌പ്ലേയാണ് ഫോണിന്. ഒക്ടാകോർ ക്വാൽകോം സ്‌നാപ്ഡ്രാഗൺ 662 SoC പ്രോസസ്സർ ആണ് ഫോണിന്.48 മെഗാപിക്സൽ പ്രൈമറി സെൻസർ, 5 മെഗാപിക്സിൽ അൾട്രാ-വൈഡ് ലെൻസ്, 2 മെഗാപിക്സൽ മാക്രോ ലെൻസ്, 2 മെഗാപിക്സൽ ഡെപ്ത് സെൻസർ എന്നിവയടങ്ങുന്ന ക്വാഡ് റിയർ ക്യാമറയാണ് നോക്കിയ 5.4-ന്. മുൻവശത്ത് 16 മെഗാപിക്സൽ സെൽഫി ക്യാമറ സെൻസറും ഫോണിലുണ്ട്.
4,000 എംഎഎച്ച് ബാറ്ററിയാണ് നോക്കിയ 5.4-ന്. 128 ജിബി വരെ ഓൺ‌ബോർഡ് സ്റ്റോറേജ് മൈക്രോ എസ്ഡി കാർഡ് വഴി വർദ്ധിപ്പിക്കാം. 4ജി എൽടിഇ, വൈ-ഫൈ, ബ്ലൂടൂത്ത്, ജിപിഎസ് / എ-ജിപിഎസ്, യുഎസ്ബി ടൈപ്പ്-സി, 3.5 എംഎം ഹെഡ്‌ഫോൺ ജാക്ക് എന്നിവയാണ് കണക്റ്റിവിറ്റി ഓപ്ഷനുകൾ. പിൻവശത്ത് ഘടിപ്പിച്ച ഫിംഗർപ്രിന്റ് സെൻസറും ഹാൻഡ് സെറ്റിനുണ്ട്. നോക്കിയ 5.4 ന് പുറമേ, നോക്കിയ ബ്രാൻഡ് ലൈസൻസിയായ എച്ച്എംഡി ഗ്ലോബൽ 18W ഫാസ്റ്റ് കാർ ചാർജറും 18W ഫാസ്റ്റ് വാൾ ചാർജറും ഉൾപ്പെടുന്ന പുതിയ ആക്‌സസറികൾ പ്രഖ്യാപിച്ചു. പുതിയ ഫോണിന് നോക്കിയ ക്ലിയർ കേസും നോക്കിയ 5.4 ഗ്രിപ്പ്, സ്റ്റാൻഡ് കേസ് എന്നിവയും ലഭ്യമാണ്.
