ന്യൂഡല്ഹി: കേന്ദ്രസര്ക്കാരിന്റെ ദേശീയ ധനസമാഹരണ പദ്ധതിയെ വിമര്ശിച്ച കോണ്ഗ്രസ് നേതാവ് രാഹുല് ഗാന്ധിക്ക് മറുപടിയുമായി ധനമന്ത്രി നിര്മലാ സീതാരാമന്. ധനസമാഹരണം എന്താണെന്ന് രാഹുലിന് അറിയുമോയെന്ന് നിര്മലാ സീതാരാമന് ചോദിച്ചു. കൈക്കൂലി വാങ്ങി രാജ്യത്തെ വിഭവങ്ങള് വിറ്റുതുലച്ചത് കോണ്ഗ്രസാണെന്നും ധനമന്ത്രി കുറ്റപ്പെടുത്തി.
പദ്ധതി കഴിഞ്ഞ 70 കൊല്ലം ഭരിച്ച സര്ക്കാരുകള് ഉണ്ടാക്കിയ നേട്ടങ്ങളെ നശിപ്പിക്കുന്നതിനായി രൂപപ്പെടുത്തിയതാണെന്നും ഇന്ത്യയുടെ രത്നങ്ങളെയാണ് മോദി സര്ക്കാര് വിറ്റു തുലയ്ക്കുന്നതെന്നും രാഹുല് കുറ്റപ്പെടുത്തിയിരുന്നു. തന്റെ ചില വ്യവസായി സുഹൃത്തുക്കളെ സഹായിക്കാനാണ് മോദി ഇത്തരം തീരുമാനങ്ങള് നടപ്പിലാക്കുന്നത്. സ്വകാര്യവത്കരണത്തിന് കോണ്ഗ്രസ് എതിരല്ലെന്നും എന്നാല് തങ്ങളുടെ നയത്തിന് ഒരു യുക്തിയുണ്ടായിരുന്നുവെന്നും രാഹുല് ചൂണ്ടിക്കാട്ടിയിരുന്നു. പദ്ധതി നിയമാനുസൃതമായ കൊള്ളയാണെന്നും സംഘടിതമായ കവര്ച്ചയാണെന്നും കോണ്ഗ്രസ് ഉള്പ്പെടെയുള്ള പ്രതിപക്ഷ പാര്ട്ടികളും വിമര്ശിച്ചിരുന്നു.