ന്യൂഡല്ഹി: ശബരിമല പുനപരിശോധന ഹര്ജിക്കുള്ള സുപ്രീം കോടതി ഭരണഘടന ബെഞ്ച് രൂപീകരിച്ചു. മുമ്പ് കേസ് പരിഗണിച്ച ജസ്റ്റിസുമാരായ ഡി വൈ ചന്ദ്രചൂഡ്, റോഹിങ്ടന് നരിമാന്, ഇന്ദു മല്ഹോത്ര എന്നിവര് പുതിയ ബെഞ്ചിലില്ല.
ഈ മാസം 13ന് കേസ് പരിഗണിക്കും.2018 സെപ്റ്റംബര് 28നായിരുന്നു ശബരിമലയില് യുവതി പ്രവേശനം അനുവദിച്ചുള്ള സുപ്രീംകോടതി വിധി. വിധിക്കെതിരെയുള്ള പുനഃപരിശോധനകളില് തീരുമാനമെടുക്കാതെ ഭരണഘടനപരമായ വിഷയങ്ങള് കഴിഞ്ഞ നവംബര് 14ന് വിശാല ബെഞ്ചിന്റെ പരിഗണനക്ക് വിട്ടു. ശബരിമല കേസുകള് ഇതുവരെ പരിഗണിച്ച ജഡ്ജിമാരെയെല്ലാം ഒഴിവാക്കിയാണ് ഇപ്പോഴത്തെ ഒമ്പതംഗ ഭരണഘടന ബെഞ്ച്.
ചീഫ് ജസ്റ്റിസ് എസ് എ ബോബ്ഡേ അദ്ധ്യക്ഷനായ പുതിയ ബെഞ്ചില് ജസ്റ്റിസുമാരായ ആര് ഭാനുമതി, അശോക്ഭൂഷണ്, നാഗേശ്വര് റാവു, എം എം ശാന്തനഗൗഡര്, എസ് അബ്ദുള് നസീര്, ആര് സുഭാഷ് റെഡ്ഡി, ബി ആര് ഗവായ്, സൂര്യകാന്ത് എന്നിവരാണ് അംഗങ്ങള്.