ഓക്‌ലൻഡ്: ന്യൂസിലൻഡിൽ ഇന്ത്യൻ ദമ്പതികൾ കുത്തേറ്റ് മരിച്ച സംഭവത്തിൽ യുവാവ് അറസ്‌റ്റിൽ. ഒക്‌ലൻഡ് സ്വദേശിയായ 29കാരനാണ് പിടിയിലായത്. യുവാവിൻ്റെ പേരുവിവരങ്ങൾ പോലീസ് ഇതുവരെ പുറത്തുവിട്ടിട്ടില്ല.
കൊലക്കുറ്റം, കൊലപാതക ശ്രമം എന്നീ കുറ്റങ്ങളാണ് യുവാവിനെതിരെ ചുമത്തിയിരിക്കുന്നതെന്ന് പോലീസ് പറഞ്ഞു. ഇന്ത്യൻ ദമ്പതികളായ ഹെർമൻ ബൻഗേറ, ഭാര്യ എലിസബത്ത് എന്നിവരാണ് കഴിഞ്ഞ വെള്ളിയാഴ്‌ച കുത്തേറ്റ് മരിച്ചത്. ഇവരുടെ ഒരു കുടുംബ സുഹൃത്തിന് കൂടി കുത്തേറ്റു. ഇയാളെ ഓക്‌ലൻഡിലെ സിറ്റി ഹോസ്‌പിറ്റലിലേക്ക് മാറ്റി.
കുത്തേറ്റതിന് പിന്നാലെ രാവിലെ 11.30ഓടെ ദമ്പതികൾ അടിയന്തര സഹായത്തിന് ഫോൺ ചെയ്‌തിരുന്നു. സംഘം എത്തിയപ്പോഴേക്കും ഇരുവരും മരിച്ചിരുന്നു. അതേസമയം യുവാവിനെ കൊലപാതകത്തിന് പ്രേരിപ്പിച്ചത് എന്താണെന്ന് വ്യക്തമായിട്ടില്ല. ഇത് സംബന്ധിച്ച സൂചനകൾ പോലീസ് നൽകിയിട്ടില്ല. ചോദ്യം ചെയ്യൽ അടക്കമുള്ള അന്വേഷണ നടപടികൾ തുടരുകയാണ്.
