ടി20 ലോകകപ്പിന്റെ ആദ്യ സെമി ഫൈനലിൽ നാളെ കൊൽക്കത്തയിലെ ഈഡൻ ഗാർഡൻസിൽ ദക്ഷിണാഫ്രിക്കയും ന്യൂസിലൻഡും നേർക്കുനേർ വരുന്നു. ടൂർണമെന്റിലുടനീളം തോൽവി അറിയാതെ മുന്നേറുന്ന ദക്ഷിണാഫ്രിക്കയും തകർപ്പൻ ഫോമിലുള്ള ന്യൂസിലൻഡും ഏറ്റുമുട്ടുമ്പോൾ പോരാട്ടം കടുക്കുമെന്ന് ഉറപ്പാണ്. എന്നാൽ കൊൽക്കത്തയിൽ മഴ ഭീഷണി നിലനിൽക്കുന്ന സാഹചര്യത്തിൽ, കളി തടസ്സപ്പെട്ടാൽ ഫൈനലിസ്റ്റുകളെ എങ്ങനെ നിശ്ചയിക്കും എന്നതിനെക്കുറിച്ചുള്ള ചർച്ചകളിലാണ് ക്രിക്കറ്റ് ലോകം. നിലവിലെ കാലാവസ്ഥാ റിപ്പോർട്ടുകൾ ആശ്വാസകരമാണെങ്കിലും അപ്രതീക്ഷിതമായി മഴയെത്തിയാൽ നേരിടാൻ ഐസിസി കർശനമായ നിയമങ്ങളാണ് ആവിഷ്കരിച്ചിരിക്കുന്നത്.
Also Read:യാത്രാവിലക്കും യുദ്ധവും വില്ലനാകുന്നു; ഫുട്ബോൾ ലോകകപ്പിൽ ഇറാൻ കളിക്കുമോ?
സൂപ്പർ 8 ഘട്ടത്തിൽ നിന്ന് വ്യത്യസ്തമായി സെമി ഫൈനലിനും ഫൈനലിനും ഐസിസി റിസർവ് ഡേ അനുവദിച്ചിട്ടുണ്ട്. നാളെ നിശ്ചിത സമയത്ത് കളി നടന്നില്ലെങ്കിൽ ആദ്യം അധികമായി അനുവദിച്ചിട്ടുള്ള 90 മിനിറ്റ് ഉപയോഗിച്ച് മത്സരം പൂർത്തിയാക്കാൻ ശ്രമിക്കും. അപ്പോഴും കളി സാധ്യമായില്ലെങ്കിൽ മത്സരം വ്യാഴാഴ്ചയിലേക്ക് മാറ്റും. ബുധനാഴ്ച കളി എവിടെയാണോ നിർത്തിയത് അവിടെ നിന്നുതന്നെ വ്യാഴാഴ്ച പുനരാരംഭിക്കും എന്നതാണ് പ്രത്യേകത. ആരാധകർക്ക് നിരാശ നൽകുന്ന രീതിയിൽ റിസർവ് ദിനത്തിലും കളി പൂർത്തിയാക്കാൻ സാധിച്ചില്ലെങ്കിൽ, വിജയികളെ തീരുമാനിക്കാൻ ടോസോ സൂപ്പർ ഓവറോ ഉണ്ടാകില്ല. പകരം സൂപ്പർ 8 ഘട്ടത്തിലെ പോയിന്റ് നിലയാകും മാനദണ്ഡമാക്കുക.
സൂപ്പർ 8 ഘട്ടത്തിലെ പ്രകടനം വിലയിരുത്തിയാൽ ദക്ഷിണാഫ്രിക്കയ്ക്കാണ് മുൻതൂക്കം. ഗ്രൂപ്പ് 1-ൽ കളിച്ച മൂന്ന് മത്സരങ്ങളും ജയിച്ച് 6 പോയിന്റോടെ ഒന്നാം സ്ഥാനക്കാരായാണ് അവർ സെമിയിലെത്തിയത്. എന്നാൽ ന്യൂസിലൻഡ് ഗ്രൂപ്പ് 2-ൽ 3 പോയിന്റുമായി രണ്ടാം സ്ഥാനക്കാരായാണ് യോഗ്യത നേടിയത്. അതിനാൽ മഴ മൂലം മത്സരം പൂർണ്ണമായും ഉപേക്ഷിക്കേണ്ടി വന്നാൽ ദക്ഷിണാഫ്രിക്ക നേരിട്ട് ഫൈനലിലേക്ക് പ്രവേശിക്കും. സൂപ്പർ 8-ൽ ഇന്ത്യയെ പരാജയപ്പെടുത്തിയ ആത്മവിശ്വാസത്തിൽ ദക്ഷിണാഫ്രിക്ക ഇറങ്ങുമ്പോൾ, ഗ്രൂപ്പ് ഘട്ടത്തിലെ തോൽവിക്ക് പകരം വീട്ടാനാണ് കെയ്ൻ വില്യംസണും സംഘവും ലക്ഷ്യമിടുന്നത്.
