ഇന്ത്യൻ വാഹന വിപണിയിലേക്ക് പുതിയൊരു വിദേശ വാഹന നിർമാതാക്കൾ കൂടിയെത്തുന്നു. വിയറ്റ്നാമിൽ നിന്നുമുള്ള വിൻഫാസ്റ്റ് എന്ന ഇലക്ട്രിക് വാഹന നിർമാതാക്കളാണ് ഇന്ത്യയിൽ ചുവടുറപ്പിക്കാൻ പോകുന്നത്. ജനുവരി 17 ന് ഡൽഹിയിൽ ആരംഭിക്കുന്ന ഭാരത് മൊബിലിറ്റി എക്സ്പോയിൽ വിൻഫാസ്റ്റിന്റെ വാഹനങ്ങൾ പ്രദർശനത്തിനെത്തുമെന്ന് കമ്പനി പ്രഖ്യാപിച്ചു കഴിഞ്ഞു.
വിൻഫാസ്റ്റ് വിഎഫ് 7, വിഎഫ് 9 എന്നീ എസ് യു വി കളാണ് പ്രദർശനത്തിനെത്തുന്നത്. അഞ്ച് സീറ്റർ ഇലക്ട്രിക് എസ് യു വി വിഭാഗത്തിലേക്കു വി എഫ് 7 എത്തുമ്പോൾ ആറ്, ഏഴ് സീറ്റിങ് ലേ ഔട്ടിലാണ് വി എഫ് 9 വരുന്നത്. ഇക്കോ, പ്ലസ് എന്നീ രണ്ട് വേരിയന്റുകളുണ്ട് വി എഫ് 7 ൽ. 75.3 കിലോവാട്ട് ബാറ്ററി പായ്ക്കാണുള്ളത്. ഇക്കോ വേരിയന്റിന് 450 കിലോമീറ്റർ റേഞ്ചും പ്ലസിന് 431 കിലോമീറ്റർ റേഞ്ചുമാണ് കമ്പനി ഉറപ്പു നൽകുന്നത്. 204 എച്ച് പി പവറും 310 എൻ എം ടോർക്കും നൽകുന്ന സിംഗിൾ മോട്ടോറാണ് ഇക്കോ വേരിയന്റിനു കരുത്ത് പകരുന്നത്. പ്ലസ് വേരിയന്റിൽ 345 ബി എച്ച് പി പവറും 500 എൻ എം ടോർക്കും നൽകുന്ന രണ്ടു മോട്ടോറുകളാണുള്ളത്.
Also Read: നെക്സയുടെ ബെസ്റ്റ് സെല്ലിങ് മോഡലായി മാറി ഫ്രോങ്സ്
വി എഫ് 9 എന്ന ഫ്ലാഗ്ഷിപ് എസ് യു വിയും ഇക്കോ,പ്ലസ് എന്നീ രണ്ടു വേരിയന്റുകളിൽ ലഭ്യമാകും. 123 കിലോവാട്ട് ബാറ്ററി പായ്ക്കിലെത്തുന്ന ഈ വാഹനത്തിന് 531 കിലോമീറ്ററാണ് കമ്പനി അവകാശപ്പെടുന്ന റേഞ്ച്. 6.6 സെക്കൻഡിൽ 100 കിലോമീറ്റർ വേഗം കൈവരിക്കാൻ കഴിയും. തമിഴ്‌നാട്ടിലാണ് വിൻഫാസ്റ്റിന്റെ ഇന്ത്യയിലെ പ്ലാന്റ്. സ്‌കോഡയുടെ മുൻമേധാവിയായിരുന്ന സാക് ഹോളീസിനാണ് വിൻഫാസ്റ്റ് ഇന്ത്യയുടെ ചുമതല.
