മൂലധന നേട്ട നികുതി ഒഴിവാക്കുമോ? ഓഹരി വിപണിയിൽ വൻ കുതിപ്പ്! നിക്ഷേപകരുടെ സമ്പത്ത് 5 ലക്ഷം കോടി ഉയർന്നു

ദീർഘകാല മൂലധന നേട്ട നികുതിയും ഓഹരി ഇടപാടുകൾക്കുള്ള നികുതിയും പുനഃപരിശോധിക്കുന്നതിനെക്കുറിച്ച് കേന്ദ്ര ധനമന്ത്രി നിർമല സീതാരാമൻ നടത്തിയ പരാമർശങ്ങളാണ് വിപണിയിൽ പ്രതീക്ഷ വർധിപ്പിച്ചത്

മൂലധന നേട്ട നികുതി ഒഴിവാക്കുമോ? ഓഹരി വിപണിയിൽ വൻ കുതിപ്പ്! നിക്ഷേപകരുടെ സമ്പത്ത് 5 ലക്ഷം കോടി ഉയർന്നു
മൂലധന നേട്ട നികുതി ഒഴിവാക്കുമോ? ഓഹരി വിപണിയിൽ വൻ കുതിപ്പ്! നിക്ഷേപകരുടെ സമ്പത്ത് 5 ലക്ഷം കോടി ഉയർന്നു

ഓഹരി വിപണിയിൽ നികുതി ഇളവുണ്ടാകുമെന്ന പ്രതീക്ഷയും ഐ.ടി. ഓഹരികളിലെ കുതിപ്പും ചേർന്നപ്പോൾ ചൊവ്വാഴ്ച വ്യാപാരത്തിൽ വൻ തിരിച്ചുവരവ്. സെൻസെക്സ് 1,100 പോയിന്റ് ഉയർന്ന് 73,034-ലും നിഫ്റ്റി 350-ലധികം പോയിന്റ് നേട്ടത്തോടെ 22,721.95-ലും വ്യാപാരം അവസാനിപ്പിച്ചു. ഒറ്റ ദിവസത്തിനിടെ നിക്ഷേപകരുടെ സമ്പത്തിൽ അഞ്ച് ലക്ഷം കോടി രൂപയുടെ വർധനയുണ്ടായി. ബോംബെ സ്റ്റോക്ക് എക്സ്ചേഞ്ചിൽ ലിസ്റ്റ് ചെയ്ത കമ്പനികളുടെ ആകെ വിപണിമൂല്യം 470 ലക്ഷം കോടി രൂപയായി ഉയർന്നു.

ദീർഘകാല മൂലധന നേട്ട നികുതിയും ഓഹരി ഇടപാടുകൾക്കുള്ള നികുതിയും പുനഃപരിശോധിക്കുന്നതിനെക്കുറിച്ച് കേന്ദ്ര ധനമന്ത്രി നിർമല സീതാരാമൻ നടത്തിയ പരാമർശങ്ങളാണ് വിപണിയിൽ പ്രതീക്ഷ വർധിപ്പിച്ചത്. ബ്ലൂംബെർഗ് ന്യൂ ഇക്കണോമി ഫോറത്തിൽ സംസാരിക്കവേ, ഈ നികുതികളുമായി ബന്ധപ്പെട്ട ചർച്ചകൾ നടന്നുവരികയാണെന്ന് മന്ത്രി വ്യക്തമാക്കിയിരുന്നു. വിദേശ നിക്ഷേപകർ തുടർച്ചയായി പണം പിൻവലിക്കുന്ന സാഹചര്യത്തിൽ, ദീർഘകാല ഓഹരി നിക്ഷേപത്തിനുള്ള നികുതി ഒഴിവാക്കുന്നത് നിക്ഷേപകരെ വിപണിയിൽ നിലനിർത്താൻ സഹായിക്കുമെന്ന് എസ്.ബി.ഐ. റിസർച്ചിന്റെ റിപ്പോർട്ടും ശുപാർശ ചെയ്തിരുന്നു. എന്നാൽ നികുതി ഒഴിവാക്കുന്നതായി ഔദ്യോഗിക പ്രഖ്യാപനം ഉണ്ടായിട്ടില്ല.

Also Read: പഴയ നാണയങ്ങളും നോട്ടുകളും വിറ്റാൽ ലക്ഷങ്ങൾ കിട്ടുമോ! സമൂഹമാധ്യമങ്ങളിലെ വാഗ്ദാനങ്ങൾക്ക് പിന്നിലെ സത്യമെന്ത്?

വിപണിയിലെ മുന്നേറ്റത്തിന് ഐ.ടി. ഓഹരികളുടെ കുതിപ്പും രൂപയുടെ മൂല്യത്തിലുണ്ടായ തിരിച്ചുവരവും ആഗോള കടപ്പത്രങ്ങളുടെ ആദായത്തിലെ കുറവും ക്രൂഡ് ഓയിൽ വിലയിലുണ്ടായ ഇടിവും പിന്തുണ നൽകി. നിഫ്റ്റി ഐ.ടി. സൂചിക അഞ്ചു ശതമാനത്തിലധികം ഉയർന്നു. റിയൽറ്റി, എഫ്.എം.സി.ജി., വാഹന, ധനകാര്യ സേവന, ലോഹ, പൊതുമേഖലാ ബാങ്ക് സൂചികകൾ ഏകദേശം ഒരു ശതമാനം നേട്ടമുണ്ടാക്കി. ഫാർമ സൂചിക മാത്രമാണ് നഷ്ടത്തിൽ അവസാനിച്ചത്. മികച്ച രണ്ടാം പാദ ഫലം പുറത്തുവിട്ടതിനു പിന്നാലെ എച്ച്.സി.എൽ. ടെക് എട്ടു ശതമാനം ഉയർന്നു. ടി.സി.എസ്. ഏഴ് ശതമാനവും ടെക് മഹീന്ദ്രയും ഇൻഫോസിസും അഞ്ച് ശതമാനവും നേട്ടമുണ്ടാക്കി.

ഹിന്ദുസ്ഥാൻ യൂണിലിവർ, ട്രെന്റ്, ബജാജ് ഫിൻസെർവ്, ബജാജ് ഫിനാൻസ്, ടൈറ്റൻ, എം.ആൻഡ്.എം., ബി.ഇ.എൽ., ഭാരതി എയർടെൽ, എസ്.ബി.ഐ., അൾട്രാടെക് സിമന്റ്, എച്ച്.ഡി.എഫ്.സി. ബാങ്ക്, ടാറ്റ സ്റ്റീൽ, ഐ.ടി.സി., എൽ.ആൻഡ്.ടി., ഐ.സി.ഐ.സി.ഐ. ബാങ്ക്, ഏഷ്യൻ പെയിന്റ്സ്, ആക്സിസ് ബാങ്ക് തുടങ്ങിയ ഓഹരികളും നേട്ടത്തിലായിരുന്നു. അതേസമയം, കൊട്ടക് മഹീന്ദ്ര ബാങ്ക്, ഇറ്റേണൽ, മാരുതി സുസുക്കി എന്നിവ നഷ്ടം നേരിട്ടു. നികുതി സംബന്ധിച്ച ചർച്ചകൾ വിപണിക്ക് കൂടുതൽ പ്രതീക്ഷ നൽകിയെങ്കിലും യഥാർഥ ഇളവുകൾ പ്രഖ്യാപിച്ചിട്ടില്ലെന്നതിനാൽ തുടർനടപടികൾ നിർണായകമാണ്. നികുതി നയത്തിലെ മാറ്റങ്ങളും വിദേശ നിക്ഷേപകരുടെ നീക്കങ്ങളും വരും ദിവസങ്ങളിലും വിപണിയുടെ ദിശയെ സ്വാധീനിച്ചേക്കും.

Share Email
Top