തിരഞ്ഞെടുപ്പ് പരാജയത്തിന് പിന്നാലെ സി.പി.ഐ സംസ്ഥാന കൗൺസിലിൽ നേതൃത്വത്തിനെതിരെ രൂക്ഷ വിമർശനം. മുൻ മുഖ്യമന്ത്രി പിണറായി വിജയന്റെ ചിത്രം മാത്രം ഉൾപ്പെടുത്തി നടത്തിയ പ്രചാരണം വ്യക്തികേന്ദ്രിതമായിരുന്നുവെന്നും, അത് തിരഞ്ഞെടുപ്പിൽ വലിയ തിരിച്ചടിയായെന്നും കൗൺസിൽ അംഗങ്ങൾ വിലയിരുത്തി. കമ്മ്യൂണിസ്റ്റ് രീതിക്ക് നിരക്കാത്ത ഈ ശൈലി ജനങ്ങളിൽ അവമതിപ്പുണ്ടാക്കിയെന്നും, ‘ഞാനല്ലാതെ മറ്റാര്’ എന്ന മട്ടിലുള്ള പ്രചാരണം ധാർഷ്ട്യം നിറഞ്ഞതായിരുന്നുവെന്നും യോഗത്തിൽ വിമർശനം ഉയർന്നു.
സ്ഥാനാർഥി നിർണയത്തിൽ ഗുരുതരമായ പിഴവുകൾ സംഭവിച്ചതായും, കീഴ്ഘടകങ്ങളുടെ അഭിപ്രായങ്ങൾ സംസ്ഥാന സെക്രട്ടേറിയറ്റ് പൂർണ്ണമായും അവഗണിച്ചുവെന്നും കൗൺസിലിൽ പരാതിയുണ്ട്. ഇതിന്റെ അടിസ്ഥാനത്തിൽ സംസ്ഥാന സെക്രട്ടേറിയറ്റ് പിരിച്ചുവിടണമെന്ന ആവശ്യവും അംഗങ്ങൾ ഉന്നയിച്ചു. സംസ്ഥാന സെക്രട്ടറി പലപ്പോഴും വൈകാരികമായി പ്രതികരിക്കുന്നത് പാർട്ടിക്കും മുന്നണിക്കും വിനയാകുന്നുണ്ടെന്നും, സെക്രട്ടറി പറയേണ്ട കാര്യങ്ങൾ മാത്രം സംസാരിക്കണമെന്നും കാനം രാജേന്ദ്രനെ മാതൃകയാക്കണമെന്നും യോഗത്തിൽ നിർദ്ദേശമുയർന്നു.
ഭരണപരമായ വീഴ്ചകളും തിരഞ്ഞെടുപ്പ് തോൽവിക്ക് കാരണമായതായി കൗൺസിൽ ചൂണ്ടിക്കാട്ടി. പി.എം. ശ്രീ കരാർ ഒപ്പിട്ടത് എൽ.ഡി.എഫ്.-ബി.ജെ.പി. ഡീൽ ആണെന്ന യു.ഡി.എഫ്. പ്രചാരണം ന്യൂനപക്ഷ വോട്ടുകൾ അകലാൻ കാരണമായി. ഇതിനുപുറമെ, സർക്കാർ ജീവനക്കാർക്ക് നൽകിയ പഴയ പെൻഷൻ വാഗ്ദാനം നിറവേറ്റാത്തതും, കർഷകരെ ദോഷകരമായി ബാധിച്ച നെല്ല് സംഭരണത്തിലെ പ്രതിസന്ധിയും തിരിച്ചടിയായി. പരമ്പരാഗത മേഖലകളെ സർക്കാർ പൂർണ്ണമായും അവഗണിച്ചതും വോട്ടുകളിൽ പ്രതിഫലിച്ചുവെന്ന് അംഗങ്ങൾ വ്യക്തമാക്കി.
പാർട്ടിക്കുള്ളിലെ ഈ തുറന്നടി രാഷ്ട്രീയ വൃത്തങ്ങളിൽ വലിയ ചർച്ചകൾക്കാണ് വഴിതെളിച്ചിരിക്കുന്നത്. തെറ്റുകൾ തിരുത്തി മുന്നോട്ട് പോകാൻ നേതൃത്വം തയ്യാറാകുമോ അതോ അസ്വാരസ്യങ്ങൾ കൂടുതൽ രൂക്ഷമാകുമോ എന്നത് വരും ദിവസങ്ങളിലെ പാർട്ടി നടപടികളിലൂടെ വ്യക്തമാകും. വ്യാഴാഴ്ചയും യോഗം തുടരുന്ന സാഹചര്യത്തിൽ കൂടുതൽ നിർണ്ണായകമായ തീരുമാനങ്ങൾ ഉണ്ടായേക്കുമെന്നാണ് വിലയിരുത്തൽ. നേതൃത്വത്തിനെതിരെയുള്ള ഈ പടപ്പുറപ്പാട് മുന്നണിയിലും വലിയ പ്രതിഫലനങ്ങൾ സൃഷ്ടിക്കുമെന്ന് ഉറപ്പാണ്.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
