നിങ്ങളുടെ ഇൻസ്റ്റാഗ്രാം ഫീഡ് സ്ക്രോൾ ചെയ്യുമ്പോൾ പെട്ടെന്നതാ വരുന്നു കരയുന്ന ഒരു സമൂസ! തന്നെ കടിച്ചുതിന്നരുതെന്ന് കൈകൂപ്പി യാചിക്കുന്ന ആ സമൂസയെ കണ്ട് നിങ്ങൾ ഒന്ന് പകച്ചുനിന്നേക്കാം. തൊട്ടുപിന്നാലെ, ചാവലിനെ (ചോറിനെ) വഞ്ചിച്ച് ഒരു ടാക്കോയ്ക്കൊപ്പം ഒളിച്ചോടുന്ന രാജ്മയുടെ ഹൃദയഭേദകമായ പ്രണയകഥ. പശ്ചാത്തലത്തിൽ വന്യമായ നാടകീയ സംഗീതം. ഈ വീഡിയോകൾ കാണുമ്പോൾ “എന്തൊരു അസംബന്ധം!” എന്ന് നിങ്ങൾക്ക് തോന്നിയേക്കാം, എങ്കിലും അടുത്ത എപ്പിസോഡിനായി നിങ്ങൾ കാത്തിരിക്കും. നിങ്ങൾ അറിയാതെ തന്നെ ‘AI സ്ലോപ്പ്’ എന്ന ഡിജിറ്റൽ ചതുപ്പിലേക്ക് വീണിരിക്കുകയാണ്.
എന്താണ് ഈ ‘AI സ്ലോപ്പ്’? ലളിതമായി പറഞ്ഞാൽ, കൃത്രിമബുദ്ധി ഉപയോഗിച്ച് മിനിറ്റുകൾക്കുള്ളിൽ നിർമ്മിച്ചെടുക്കുന്ന, ഗുണനിലവാരം കുറഞ്ഞതും എന്നാൽ വൻതോതിൽ ഉൽപ്പാദിപ്പിക്കപ്പെടുന്നതുമായ ഉള്ളടക്കത്തെയാണ് ‘എഐ സ്ലോപ്പ്’ എന്ന് വിളിക്കുന്നത്. ഇവയ്ക്ക് വലിയ കലാപരമായ മൂല്യമൊന്നുമില്ല. കാഴ്ചക്കാരന്റെ ശ്രദ്ധ സെക്കൻഡുകൾക്കുള്ളിൽ പിടിച്ചുപറ്റാൻ വേണ്ടി മാത്രം ഡിസൈൻ ചെയ്തവയാണിവ. മനുഷ്യന്റെ അധ്വാനം വളരെ കുറഞ്ഞ രീതിയിൽ, അൽഗോരിതങ്ങളെ തൃപ്തിപ്പെടുത്താൻ വേണ്ടി മാത്രം സൃഷ്ടിക്കപ്പെടുന്ന ഇത്തരം വീഡിയോകൾ സോഷ്യൽ മീഡിയയുടെ പുതിയ മുഖമായി മാറിയിരിക്കുന്നു.
Also Read: മഞ്ഞുയുഗത്തിലെ ആത്മമിത്രങ്ങൾ; മനുഷ്യനും നായയും തമ്മിലുള്ള 16,000 വർഷത്തെ രഹസ്യം പുറത്ത്
ഈ വിചിത്ര തരംഗം ആഗോളതലത്തിൽ ശ്രദ്ധിക്കപ്പെട്ടത് ‘ഫ്രൂട്ട് ലവ് ഐലൻഡ്’ എന്ന എഐ സീരീസിലൂടെയാണ്. ബനാനിറ്റോ എന്നും സ്ട്രോബെറിന എന്നും പേരുള്ള പഴങ്ങൾ ഒരു ഡേറ്റിംഗ് റിയാലിറ്റി ഷോയിലെന്നപോലെ പ്രണയിക്കുകയും വഴക്കിടുകയും ചെയ്യുന്നത് ദശലക്ഷക്കണക്കിന് ആളുകളാണ് കണ്ടത്. ഇതിന് പിന്നാലെയാണ് ഇന്ത്യൻ സ്രഷ്ടാക്കൾ ഈ ട്രെൻഡിനെ ‘ദേശി’ വൽക്കരിച്ചത്.
ഇന്ത്യൻ എഐ സ്ലോപ്പ് പ്രപഞ്ചത്തിൽ കഥാപാത്രങ്ങൾ നമ്മുടെ അടുക്കളയിലെ ഭക്ഷണസാധനങ്ങളാണ്. ചായയും പാർലെ-ജിയും തമ്മിലുള്ള പിരിയാത്ത ബന്ധം, വടയും പാവും തമ്മിലുള്ള പ്രണയം, അവയ്ക്കിടയിൽ വില്ലനായി എത്തുന്ന സമോസ ഇങ്ങനെയൊക്കെയുള്ള കഥകൾക്ക് ഇന്ത്യൻ പ്രേക്ഷകർക്കിടയിൽ വൻ സ്വീകാര്യതയാണ് ലഭിക്കുന്നത്. ഇത് കേവലം വിനോദം മാത്രമല്ല, നമ്മൾ വളർന്നുവന്ന സിനിമാ-സീരിയൽ സംസ്കാരത്തിന്റെ ഒരു ഡിജിറ്റൽ പരിഹാസം കൂടിയായി ഇതിനെ കാണാം. ഇന്ത്യൻ പ്രേക്ഷകർക്ക് നാടകീയമായ കഥപറച്ചിലിനോട് പണ്ടേയുള്ള താല്പര്യമാണ് എഐ സ്ലോപ്പ് വീഡിയോകൾ ഇത്രത്തോളം ജനകീയമാകാൻ പ്രധാന കാരണം. ദൂരദർശൻ കാലം മുതൽ നമ്മൾ കണ്ടുശീലിച്ച വിശ്വാസവഞ്ചനയും കുടുംബവഴക്കുകളും നിറഞ്ഞ മെലോഡ്രാമകൾ ഒരു സമൂസയോ രാജ്മയോ പ്രകടിപ്പിക്കുമ്പോൾ അത് വിചിത്രമായ ഒരു കൗതുകം നൽകുന്നു.
പ്രണയം, അമ്മയുടെ സ്നേഹം തുടങ്ങിയ അടിസ്ഥാന വികാരങ്ങളെ ഇത്തരം വീഡിയോകൾ കൈകാര്യം ചെയ്യുന്നത് കൊണ്ട് തന്നെ, ലോജിക് മാറ്റിനിർത്തി വൈകാരികമായി പ്രതികരിക്കാൻ പ്രേക്ഷകർ പ്രേരിതരാകുന്നു. കൂടാതെ, 30 മുതൽ 60 സെക്കൻഡ് വരെയുള്ള ഇവയുടെ ദൈർഘ്യം കുറഞ്ഞ ശ്രദ്ധാശേഷിയുള്ള ഇന്നത്തെ ഡിജിറ്റൽ യുഗത്തിൽ കാഴ്ചക്കാരെ ഒട്ടും ബോറടിപ്പിക്കാതെ അടുത്ത വീഡിയോയിലേക്ക് നയിക്കുകയും ചെയ്യുന്നു.
സോഷ്യൽ മീഡിയ അൽഗോരിതങ്ങൾ പ്രവർത്തിക്കുന്നത് ‘എൻഗേജ്മെന്റ്’ അടിസ്ഥാനമാക്കിയാണ്. നിങ്ങൾ ഈ വീഡിയോകളെ ഇഷ്ടപ്പെട്ടാലും വെറുത്താലും അതിൽ കമന്റ് ചെയ്യുകയോ മറ്റൊരാൾക്ക് ഷെയർ ചെയ്യുകയോ ചെയ്താൽ അൽഗോരിതം അതിനെ പ്രോത്സാഹിപ്പിക്കും. “ഇതെന്തൊരു ഭ്രാന്ത്!” എന്ന് പറഞ്ഞ് നിങ്ങൾ ഒരാൾക്ക് അയച്ചുകൊടുക്കുമ്പോൾ സത്യത്തിൽ നിങ്ങൾ ആ വീഡിയോയുടെ റീച്ച് വർദ്ധിപ്പിക്കുകയാണ് ചെയ്യുന്നത്. അമിത വികാരങ്ങളും വിചിത്രമായ ദൃശ്യങ്ങളും ഉള്ളതുകൊണ്ട് തന്നെ ഇത്തരം വീഡിയോകൾ പെട്ടെന്ന് വൈറലാകുന്നു.
Also Read: ഇംഗ്ലണ്ടിലെ ‘കാനഡ’; വന്യതയുടെ നൂറു വർഷങ്ങൾ പിന്നിട്ട് കീൽഡർ വനം
എഐ സ്ലോപ്പ് വീഡിയോകൾ കേവലം തമാശയ്ക്കപ്പുറം അപകടകരമായ പ്രവണതകളാണ് സമൂഹത്തിൽ വളർത്തുന്നത്. കാലഹരണപ്പെട്ട സ്ത്രീവിരുദ്ധതയും ലിംഗവിവേചനവും ‘നാടകം’ എന്ന ലേബലിൽ ഇവ വീണ്ടും പ്രചരിപ്പിക്കുന്നു സ്ത്രീ കഥാപാത്രങ്ങളെ പലപ്പോഴും വഞ്ചകരായോ ഭൗതികവാദികളായോ ചിത്രീകരിക്കുന്നത് ഇതിന് ഉദാഹരണമാണ്. കൂടാതെ, ശരീരപ്രകൃതിയെ പരിഹസിക്കുന്ന പ്ലോട്ടുകളിലൂടെ ബോഡി ഷെയ്മിംഗിനെ സ്വാഭാവികവൽക്കരിക്കാനും അതിശയോക്തി കലർന്ന ഉത്തേജനങ്ങൾ വഴി വായനക്കാർക്കും കാഴ്ചക്കാർക്കുമുണ്ടാകേണ്ട ശ്രദ്ധാശേഷി നശിപ്പിക്കാനും ഇത്തരം ഉള്ളടക്കങ്ങൾ കാരണമാകുന്നു. ഇതിലൊക്കെയുപരിയായി, മനുഷ്യവികാരങ്ങളെ കൃത്രിമമായി ഉത്തേജിപ്പിക്കാനുള്ള എഐയുടെ ഈ ശേഷി ഭാവിയിൽ തെറ്റായ വിവരങ്ങൾ പ്രചരിപ്പിക്കാനോ, രാഷ്ട്രീയമായ പ്രൊപ്പഗണ്ടകൾക്കും വൈകാരിക ചൂഷണങ്ങൾക്കുമായി ഉപയോഗിക്കപ്പെട്ടേക്കാം എന്നത് വലിയൊരു ഭീഷണിയാണ്.
എഐ സ്ലോപ്പ് വീഡിയോകൾ ഒരുതരം ‘ഡിജിറ്റൽ ജങ്ക് ഫുഡ്’ പോലെയാണ്. അത് കഴിക്കാൻ എളുപ്പമാണ്, രുചികരമായി തോന്നാം, പക്ഷേ അത് ആരോഗ്യത്തിന് നല്ലതല്ല. വിനോദത്തിനായി ഇവ കാണുന്നതിൽ തെറ്റില്ലെങ്കിലും, നമ്മുടെ ചിന്താശേഷിയെയും വിവേചനബുദ്ധിയെയും ഇവ സ്വാധീനിക്കാൻ അനുവദിക്കരുത്. അടുത്ത തവണ കരയുന്ന ഒരു സമൂസ നിങ്ങളുടെ സ്ക്രീനിൽ വരുമ്പോൾ ഓർക്കുക അത് നിങ്ങളുടെ ശ്രദ്ധയെ ചൂഷണം ചെയ്യാൻ അൽഗോരിതം ഒരുക്കിയ ഒരു വല മാത്രമാണ്.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
