ചന്ദ്രനിലും ചൊവ്വയിലും സ്ഥിരമായി താവളം നിർമ്മിച്ച് മനുഷ്യവാസത്തിന് കളമൊരുക്കാനുള്ള തയ്യാറെടുപ്പിലാണ് ലോകമെമ്പാടുമുള്ള ശാസ്ത്രലോകം. ഭൂമിക്ക് പുറത്ത് മനുഷ്യൻ എവിടെ, എങ്ങനെ ജീവിക്കും എന്ന പ്രസക്തമായ ചോദ്യത്തിന് കൃത്യമായ ഉത്തരവുമായി ഇന്ത്യൻ ബഹിരാകാശ സഞ്ചാരിയും ഗ്രൂപ്പ് ക്യാപ്റ്റനുമായ ശുഭാൻഷു ശുക്ല ഇപ്പോൾ രംഗത്തെത്തിയിരിക്കുകയാണ്. ‘ഭാരതീയ ഹാബിറ്റബിൾ എക്സ്പാൻഡബിൾ എക്സ്ട്രാ ടെറസ്ട്രിയൽ ഹാബിറ്റാറ്റ്’ അഥവാ ‘ഭീം’ എന്ന വിപ്ലവാത്മക ആശയത്തിന്റെ വിശദാംശങ്ങളാണ് അദ്ദേഹം ഔദ്യോഗികമായി പങ്കുവെച്ചിരിക്കുന്നത്.
ബെംഗളൂരുവിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിലെ അലോക് ലാബിലാണ് ഈ നൂതന പദ്ധതി വികസിപ്പിച്ചെടുത്തിട്ടുള്ളത്. റഷ്യയിലെ ബഹിരാകാശ പരിശീലനത്തിന് ശേഷം നാട്ടിൽ തിരിച്ചെത്തിയ ശുഭാൻഷു ശുക്ല നടത്തിയ പ്രത്യേക ഗവേഷണങ്ങളിൽ നിന്നാണ് ഈ ആശയം രൂപംകൊണ്ടിരിക്കുന്നത്. ഭാവിയിൽ ചന്ദ്രനിലും മറ്റ് അന്യഗ്രഹങ്ങളിലും മനുഷ്യർക്ക് സുരക്ഷിതമായി താമസിക്കാനും ജോലി ചെയ്യാനും ആവശ്യമായ അത്യാധുനിക സാങ്കേതികവിദ്യകളിലാണ് ഈ ഗവേഷണം പ്രധാനമായും ശ്രദ്ധ കേന്ദ്രീകരിച്ചിരിക്കുന്നത്.
Also Read: വൻ ബാറ്ററി കരുത്തുമായി പോക്കോ എക്സ്8 സീരീസ് ഉടൻ ഇന്ത്യയിൽ എത്തും; പ്രധാന ഫീച്ചറുകൾ പുറത്തുവിട്ടു!
ബഹിരാകാശ പര്യവേക്ഷണങ്ങളുടെ ഏറ്റവും വലിയ വെല്ലുവിളികളിലൊന്ന് ഭൂമിക്ക് പുറത്തുള്ള മനുഷ്യന്റെ ആവാസവ്യവസ്ഥയാണെന്ന് ശുക്ല വ്യക്തമാക്കുന്നു. മനുഷ്യൻ ഭാവിയിൽ ഭൂമിക്ക് പുറത്ത് സ്ഥിരതാമസമാക്കാൻ തയ്യാറെടുക്കുന്നതിന് പതിറ്റാണ്ടുകൾക്ക് മുൻപ് തന്നെ ഇത്തരം സാങ്കേതിക വിദ്യകൾ വികസിപ്പിച്ചെടുക്കേണ്ടത് അത്യന്താപേക്ഷിതമാണെന്നും അദ്ദേഹം ചൂണ്ടിക്കാട്ടുന്നു. ഇന്ത്യയുടെ അഭിമാനകരമായ ഈ ബഹിരാകാശ ഗവേഷണ പദ്ധതി ഭാവിയിലെ ബഹിരാകാശ ദൗത്യങ്ങൾക്ക് വലിയ മുതൽക്കൂട്ടായി മാറും.
