ബീഹാർ നിയമസഭാ തിരഞ്ഞെടുപ്പിൽ എൻഡിഎ മുന്നണി ഉജ്ജ്വല വിജയം നേടിയതിന് പിന്നാലെ, പരാജയത്തിൻ്റെ കനത്തിൽ ഒതുങ്ങിപ്പോകാതെ രാഷ്ട്രീയ വേദിയിൽ അവിശ്വസനീയമായ ഒരത്ഭുത ഉയിർത്തെഴുന്നേൽപ്പ് പ്രകടിപ്പിച്ചിരിക്കുകയാണ് ജൻ സുരാജ് നേതാവ് പ്രശാന്ത് കിഷോർ. തിരഞ്ഞെടുപ്പിലെ ദയനീയ പ്രകടനത്തിന് ശേഷം ഒരു രാഷ്ട്രീയ നേതാവും പ്രതീക്ഷിക്കാത്ത തരത്തിലുള്ള ഊർജ്ജസ്വലതയോടെയാണ് അദ്ദേഹം പൊതുജനസമക്ഷം എത്തിയത്. “നിങ്ങൾ രാജിവയ്ക്കുന്നതുവരെ നിങ്ങൾ പരാജയപ്പെടില്ല” എന്ന ദൃഢമായ പ്രസ്താവനയോടെ ആരംഭിച്ച പികെയുടെ ആദ്യ പ്രതികരണം, ഈ തോൽവി തൊട്ടിലിൽനിന്ന് തന്നെ ബീഹാറിലെ പ്രതിപക്ഷത്തിൻ്റെ ഏറ്റവും ശക്തമായ ശബ്ദമാകാൻ അദ്ദേഹം ഒരുങ്ങുന്നുവെന്നതിൻ്റെ വ്യക്തമായ സൂചന നൽകി.
വമ്പിച്ച തിരഞ്ഞെടുപ്പ് പരാജയത്തിന് ശേഷവും, മുഖ്യ പ്രതിപക്ഷ പാർട്ടികളായ ആർജെഡിയിലെ തേജസ്വി യാദവും കോൺഗ്രസിലെ രാഹുൽ ഗാന്ധിയും പൊതുരംഗത്ത് നിന്ന് പൂർണ്ണമായും വിട്ടുനിന്നത് ബീഹാർ രാഷ്ട്രീയത്തിൽ ഒരു വലിയ ശൂന്യത സൃഷ്ടിച്ചു. ഈ നിർണ്ണായക സമയത്താണ്, ജൻ സുരാജിൻ്റെ നേതാവായ പ്രശാന്ത് കിഷോർ, വിജയിച്ച ജെഡി(യു)-ബിജെപി സഖ്യത്തെ നേരിട്ടുള്ള വെല്ലുവിളിയുമായി രംഗപ്രവേശം ചെയ്തത്. നിലവിൽ, ബീഹാറിലെ പ്രതിപക്ഷ നേതൃസ്ഥാനത്തേക്ക് ഉയർന്ന് വരുന്ന നേതാവായി’ പി.കെ. മാറിക്കഴിഞ്ഞു. ഇത് തിരഞ്ഞെടുപ്പിലെ തിരിച്ചടിയിലും തളരാതെ, നിതീഷ് കുമാർ സർക്കാരിനെതിരെ പോരാട്ടം പ്രഖ്യാപിച്ച പ്രശാന്ത് കിഷോറിൻ്റെ പുതിയ രാഷ്ട്രീയ യാത്രയുടെ ഒരു തുടക്കം മാത്രമാണ്.
നവംബർ 20-ന് നിതീഷ് കുമാറിൻ്റെ നേതൃത്വത്തിലുള്ള പുതിയ മന്ത്രിസഭ പട്നയിലെ ഗാന്ധി മൈതാനത്ത് സത്യപ്രതിജ്ഞ ചെയ്തപ്പോൾ , പ്രശാന്ത് കിഷോർ (പി.കെ.) തികച്ചും പ്രതീകാത്മകമായ ഒരു പ്രതിഷേധ രീതിയാണ് തിരഞ്ഞെടുത്തത്. ആ ദിവസം അദ്ദേഹം 24 മണിക്കൂർ ‘മൗനവും ഉപവാസവും’ അനുഷ്ഠിക്കുമെന്ന് പ്രഖ്യാപിച്ചു. എന്നാൽ, ഈ ഉപവാസത്തിനായി പി.കെ. തിരഞ്ഞെടുത്ത സ്ഥലമാണ് ഈ നീക്കത്തെ കൂടുതൽ ശ്രദ്ധേയമാക്കുന്നത്. പശ്ചിമ ചമ്പാരനിലെ ഭിതിഹർവയിലുള്ള ഗാന്ധി ആശ്രമം. 1917-ൽ മഹാത്മാഗാന്ധി തൻ്റെ ചരിത്രപ്രധാനമായ സത്യാഗ്രഹം ആരംഭിച്ച അതേ മണ്ണിൽ ഉപവസിച്ചുകൊണ്ട്, നിതീഷ് സർക്കാരിൻ്റെ അധികാരമേൽക്കലിനെതിരെയുള്ള തൻ്റെ പ്രതിഷേധത്തിന് പ്രശാന്ത് സത്യാഗ്രഹത്തിൻ്റെ പാരമ്പര്യത്തിൻ്റെ വിശുദ്ധി നൽകുകയായിരുന്നു. 1917-ൽ മഹാത്മാ ഗാന്ധി ചമ്പാരൻ സത്യാഗ്രഹത്തിന് തുടക്കം കുറിച്ച ചരിത്രസ്ഥലത്ത് നിന്നാണ് പ്രശാന്ത് തന്റെ സമരത്തിന്റെ പുതിയഘട്ടത്തിന് തുടക്കം കുറിക്കുന്നത്. പട്നയിലെ ഗാന്ധി മൈതാനിയിൽ നടക്കുന്ന സത്യപ്രതിജ്ഞാ ചടങ്ങിനോടൊപ്പം നടക്കുന്ന ഈ സമരം, പ്രശാന്ത് തന്റെ പോരാട്ടത്തെ വെറും രാഷ്ട്രീയ നയപ്രഖ്യാപനമല്ലാതെ, മൂല്യാധിഷ്ഠിതമായ ഒരു സത്യാഗ്രഹപരമായ പ്രതിപക്ഷ നിലപാടാക്കി ഉയർത്തുന്നുവെന്നതിന്റെ സൂചനയാണ്.
തിരഞ്ഞെടുപ്പിൽ ജൻ സുരാജിന് ഒരു സീറ്റും നേടാനായില്ലെങ്കിലും, 3.34% വോട്ടുവിഹിതം നേടിയത് വലിയ നേട്ടമെന്ന് പ്രശാന്ത് വിലയിരുത്തി. 238 സ്ഥാനാർത്ഥികളിൽ 236 പേർ കെട്ടിവച്ച തുക നഷ്ടപ്പെടുത്തിയെങ്കിലും, 129 മണ്ഡലങ്ങളിൽ മൂന്നാം സ്ഥാനവും ഒരു മണ്ഡലത്തിൽ രണ്ടാം സ്ഥാനവും നേടിയത് പുതിയ പാർട്ടിക്ക് അപൂർവമായ പിന്തുണയാണെന്ന് അദ്ദേഹം ചൂണ്ടിക്കാട്ടി. പരാജയം ഏറ്റുപറഞ്ഞുകൊണ്ടുതന്നെ സർക്കാർ വാഗ്ദാനങ്ങളോട് കടുത്ത വെല്ലുവിളി ഉയർത്തിയത് അദ്ദേഹത്തിന്റെ രാഷ്ട്രീയ മാനസിക നിലപാടിനെയും നേതൃത്വ ദൗത്യത്തെയും കൂടുതൽ ശക്തമാക്കി.
വരാനിരിക്കുന്ന എൻഡിഎ സർക്കാരിൻ്റെ പ്രധാന തിരഞ്ഞെടുപ്പ് വാഗ്ദാനം നടപ്പിലാക്കുമോ എന്നതിനെ ആശ്രയിച്ചിരിക്കും തൻ്റെ രാഷ്ട്രീയ ഭാവിയെന്ന് പ്രശാന്ത് കിഷോർ പ്രഖ്യാപിച്ചു. ഒന്നര കോടി സ്ത്രീകൾക്ക് രണ്ട് ലക്ഷം രൂപ നൽകുമെന്ന പ്രഖ്യാപനം നിതീഷ് കുമാർ സർക്കാർ യാഥാർത്ഥ്യമാക്കിയാൽ താൻ “ബീഹാർ രാഷ്ട്രീയം എന്നെന്നേക്കുമായി ഉപേക്ഷിക്കുമെന്ന്” പ്രശാന്ത് തുറന്നുപറഞ്ഞു.
ഈ വാഗ്ദാനം നിറവേറ്റാൻ അദ്ദേഹം നിതീഷ് സർക്കാരിന് ആറ് മാസത്തെ അന്ത്യശാസനം നൽകി. സമയം അവസാനിക്കുമ്പോൾ വാഗ്ദാനം പാലിക്കപ്പെടാതെ വന്നാൽ, ജൻ സുരാജ് തെരുവുപോരാട്ടത്തിന് ഇറങ്ങുമെന്നും അദ്ദേഹം മുന്നറിയിപ്പ് നൽകി. സ്ത്രീകൾക്ക് ഈ സഹായം ലഭിക്കുന്നുണ്ടെന്ന് ഉറപ്പുവരുത്തുന്നതിനായി അദ്ദേഹം ഒരു ഹെൽപ്പ്ലൈൻ നമ്പർ പുറത്തിറക്കുകയും ചെയ്തു. പണം ആവശ്യപ്പെട്ട് സർക്കാർ ഓഫീസുകളിൽ സമ്മർദ്ദം ചെലുത്താൻ പാർട്ടി പ്രവർത്തകരെ നിയോഗിക്കുമെന്നും അദ്ദേഹം ഉറപ്പുനൽകി. ഈ നീക്കങ്ങളിലൂടെ, കേവലം പ്രസ്താവനകളിൽ ഒതുങ്ങാതെ, ജനങ്ങളുടെ പ്രശ്നങ്ങളിൽ യാഥാർത്ഥ്യബോധത്തോടെ ഇടപെടുന്ന ശക്തനായ ഒരു പ്രതിപക്ഷ നേതാവായി പി.കെ. സ്വയം അടയാളപ്പെടുത്തുന്നു.
തിരഞ്ഞെടുപ്പ് പരാജയത്തിന് ശേഷം രാഹുൽ ഗാന്ധിയും തേജസ്വി യാദവും മൗനം പാലിക്കുന്ന സാഹചര്യത്തിൽ പികെയുടെ ശക്തമായ സാന്നിദ്ധ്യം ഏറെ ശ്രദ്ധ നേടി. ഈ രാഷ്ട്രീയ ശൂന്യതയിൽ ജനങ്ങളോട് നേരിട്ട് ഇടപെട്ട് സംസാരിക്കുന്ന ഒരു നേതാവായി പ്രശാന്ത് ഉയർന്നുവന്നത് ബീഹാറിന്റെ ഭാവി രാഷ്ട്രീയത്തിൽ വലിയ മാറ്റങ്ങൾ സൃഷ്ടിക്കുമെന്ന് വിലയിരുത്തപ്പെടുന്നു.
“അർഷ് പർ അല്ലെങ്കിൽ ഫാർഷ് പർ” എന്ന തന്റെ പഴയ പ്രസ്താവന ഓർമ്മിപ്പിച്ചുകൊണ്ട്, വിജയം ലഭിച്ചാലും ഇല്ലെങ്കിലും തന്റെ പോരാട്ടം തുടരാനാണ് താൻ ഒരുങ്ങുന്നതെന്ന് പ്രശാന്ത് വ്യക്തമാക്കി. തൊഴിലില്ലായ്മ, പ്രക്ഷുബ്ധ കുടിയേറ്റം, യുവാക്കളുടെ ആത്മാഭിമാനം തുടങ്ങിയ പ്രശ്നങ്ങളെക്കുറിച്ച് സംസാരിച്ച പ്രശാന്ത് , ഈ തിരഞ്ഞെടുപ്പ് ഒരു ‘ഞെട്ടലായിരുന്നെങ്കിലും’ പോരാട്ടം ഇനി കൂടുതൽ ശക്തമാകുമെന്നും ഉറപ്പു നൽകി. “സലാഹിന്റെ കാലം കഴിഞ്ഞു, ഇപ്പോൾ സമരത്തിന്റെ സമയം തുടങ്ങുന്നു” എന്ന വരികളിലൂടെ, അദ്ദേഹം തന്റെ കരിയറിലെ ഏറ്റവും പ്രധാനപ്പെട്ട രാഷ്ട്രീയ പോരാട്ടത്തിനാണ് തുടക്കം കുറിക്കുന്നത്.
