വിഴിഞ്ഞം തുറമുഖ കരാറിലെ ഓഹരി കൈമാറ്റവുമായി ബന്ധപ്പെട്ട് മുഖ്യമന്ത്രി നടത്തിയ പ്രസ്താവനകൾ പൂർണ്ണമായും വസ്തുതാവിരുദ്ധമാണെന്ന് പി. രാജീവ് വാർത്താസമ്മേളനത്തിൽ കുറ്റപ്പെടുത്തി. മുഖ്യമന്ത്രിയുടെ കസേരയിലിരുന്ന് ഇത്തരത്തിൽ വസ്തുതകൾ പരിശോധിക്കാതെ വെല്ലുവിളിക്കുന്നത് ശരിയല്ലെന്നും, അദ്ദേഹത്തിന്റെ ശരീരഭാഷയും പ്രതികരണങ്ങളും ഒരു ഭരണാധികാരിയുടേതിനേക്കാൾ പ്രതിപക്ഷ നേതാവിന്റേതിന് സമാനമാണെന്നും രാജീവ് വിമർശിച്ചു.
സംസ്ഥാനത്തിന്റെ താല്പര്യങ്ങൾ സംരക്ഷിക്കാൻ വിഴിഞ്ഞം കരാറിൽ ഉൾപ്പെടുത്തിയിരുന്ന ‘മുൻകൂർ അനുമതി’ എന്ന സുപ്രധാന വ്യവസ്ഥ ലംഘിക്കപ്പെട്ടത് അതീവ ഗൗരവമുള്ള കാര്യമാണെന്ന് അദ്ദേഹം പറഞ്ഞു. സർക്കാരിന്റെ മുൻകൂർ അനുമതി വാങ്ങുന്നതിന് മുൻപ് തന്നെ ഓഹരി കൈമാറ്റത്തിനുള്ള കരാറുകളിലേക്ക് പോയത് ദുരൂഹമാണ്. അദാനി ഗ്രൂപ്പിന്റെ ഈ നീക്കം സംസ്ഥാനത്തിന് ലഭിക്കേണ്ട ആനുകൂല്യങ്ങളെയും സുരക്ഷയെയും ദോഷകരമായി ബാധിക്കും. ഇതുമായി ബന്ധപ്പെട്ട് ഉയർന്നുവന്ന കൃത്യമായ ചോദ്യങ്ങളിൽ നിന്നും ഒഴിഞ്ഞുമാറാനാണ് മുഖ്യമന്ത്രി പുകമറ സൃഷ്ടിച്ച് ശ്രമിക്കുന്നതെന്നും രാജീവ് ആരോപിച്ചു.
ഭരണസംവിധാനത്തിലെ നിർണ്ണായക വകുപ്പുകളായ ധനം, നിയമം, പൊതുഭരണം എന്നിവ മുഖ്യമന്ത്രി തന്നെ നേരിട്ട് കൈകാര്യം ചെയ്യുന്നത് ജനാധിപത്യത്തിലെ ‘ക്രോസ് ചെക്കിംഗ്’ സംവിധാനത്തെ പൂർണ്ണമായി തകർക്കുമെന്നും അദ്ദേഹം മുന്നറിയിപ്പ് നൽകി. വകുപ്പുകൾ എടുക്കുന്ന തീരുമാനങ്ങൾ സ്വതന്ത്രമായി പരിശോധിക്കേണ്ട സംവിധാനങ്ങൾ ഒരാളിലേക്ക് കേന്ദ്രീകരിക്കുമ്പോൾ ‘കളക്ടീവ് റെസ്പോൺസിബിലിറ്റി’ എന്ന ജനാധിപത്യ മര്യാദയാണ് ലംഘിക്കപ്പെടുന്നത്. മുൻ ഇടതുപക്ഷ സർക്കാരുകളുടെ കാലത്തെ വകുപ്പ് വിഭജന രീതികൾ ഓർമ്മിപ്പിച്ച പി. രാജീവ്, മുഖ്യമന്ത്രിയുടെ മറുപടികൾ ഒട്ടും തൃപ്തികരമല്ലെന്നും മാധ്യമങ്ങളോട് വ്യക്തമാക്കി.
