പ്രീമിയം മിഡ്-റേഞ്ച് സ്മാർട്ട്ഫോൺ ശ്രേണിയിലേക്ക് പുതിയ രണ്ട് കരുത്തൻ മോഡലുകളുമായി വിവോ. വിവോ എസ്60, എസ്60ഇ എന്നീ ഫോണുകളാണ് കമ്പനി വിപണിയിലെത്തിച്ചിരിക്കുന്നത്. മുൻതലമുറയായ എസ്50 സീരീസിനെ അപേക്ഷിച്ച് മികച്ച ക്യാമറ സംവിധാനവും വമ്പൻ ബാറ്ററിയും ഈ പുതിയ ഫോണുകളുടെ പ്രധാന ആകർഷണങ്ങളാണ്. ഒപ്പം, കൈകാര്യം ചെയ്യാൻ എളുപ്പമുള്ള കോംപാക്റ്റ് ഡിസൈനും വിവോ നിലനിർത്തിയിട്ടുണ്ട്.
ബാറ്ററിയാണ് താരം
7,200mAh ശേഷിയുള്ള കരുത്തുറ്റ ബാറ്ററിയാണ് ഈ സീരീസിലെ ഏറ്റവും വലിയ സവിശേഷത. 90W ഫാസ്റ്റ് ചാർജിംഗ് പിന്തുണയോടെയാണ് ഫോൺ എത്തുന്നത്. ഇത്രയും വലിയ ബാറ്ററി ഉൾപ്പെടുത്തിയിട്ടും ഫോണിന്റെ കനം വെറും 7.92 മില്ലിമീറ്ററും ഭാരം ഏകദേശം 199 ഗ്രാം മാത്രവുമാണ് എന്നത് ശ്രദ്ധേയമാണ്. 1.5K റെസല്യൂഷനിലുള്ള 6.59 ഇഞ്ച് ഫ്ലാറ്റ് ഡിസ്പ്ലേയും 144Hz റിഫ്രഷ് റേറ്റും മികച്ച ദൃശ്യാനുഭവം ഉറപ്പുനൽകുന്നു. മെറ്റൽ ഫ്രെയിമും ഗ്ലാസ് റിയർ പാനലും ഫോണിന് പ്രീമിയം ലുക്ക് നൽകുന്നു.
Also Read:അംഗോളയുടെ നിഗൂഢ വനങ്ങളിൽ ഒളിഞ്ഞിരുന്ന അത്ഭുതങ്ങൾ; ശാസ്ത്രലോകത്തെ അമ്പരപ്പിച്ച പുതിയ കണ്ടെത്തലുകൾ
ചിപ്സെറ്റിലെ വ്യത്യാസം
രണ്ട് മോഡലുകളും തമ്മിലുള്ള പ്രധാന വ്യത്യാസം പ്രോസസറിലാണ്. വിവോ എസ്60-ൽ ക്വാൽകോമിന്റെ സ്നാപ്ഡ്രാഗൺ 8s ജെൻ 3 ചിപ്സെറ്റാണ് ഉപയോഗിച്ചിരിക്കുന്നത്. എസ്60ഇ പതിപ്പിൽ മീഡിയാടെക്കിന്റെ ഡൈമെൻസിറ്റി 7500 പ്രോസസറാണ് നൽകിയിരിക്കുന്നത്. മികച്ച സെൽഫികൾക്കായി രണ്ട് ഫോണുകളിലും 50 മെഗാപിക്സൽ ഫ്രണ്ട് ക്യാമറയുണ്ട്.
എസ്60-ൽ 50MP പ്രൈമറി ക്യാമറ, 8MP അൾട്രാ-വൈഡ് ലെൻസ്, 3x ഓപ്റ്റിക്കൽ സൂമോടുകൂടിയ 50MP സോണി IMX882 പെരിസ്കോപ്പ് ടെലിഫോട്ടോ ക്യാമറ എന്നിവ ഉൾപ്പെടുന്ന ട്രിപ്പിൾ ക്യാമറ സംവിധാനമാണുള്ളത്. എസ്60ഇ-യിൽ 50MP പ്രൈമറി ക്യാമറയും 8MP അൾട്രാ-വൈഡ് ലെൻസുമാണ് ലഭിക്കുക. 3D അൾട്രാസോണിക് ഫിംഗർപ്രിന്റ് സ്കാനർ, സ്റ്റീരിയോ ഡ്യുവൽ സ്പീക്കറുകൾ എന്നിവയ്ക്കൊപ്പം IP68, IP69 ഡസ്റ്റ്-വാട്ടർ റെസിസ്റ്റൻസ് റേറ്റിംഗുകളും ഫോണുകൾക്കുണ്ട്.
വിലയും ലഭ്യതയും
ചൈനയിൽ സ്റ്റാറി സീ, എർലി സമ്മർ ഗ്രീൻ, മിഡ്സമ്മർ നൈറ്റ് എന്നീ നിറങ്ങളിൽ ഫോണുകൾ ലഭ്യമാണ്. എസ്60ഇ-യുടെ പ്രാരംഭ വില 2,899 യുവാനും എസ്60 അടിസ്ഥാന മോഡലിന്റെ വില 3,599 യുവാനുമാണ്. എന്നാൽ, ഇന്ത്യ ഉൾപ്പെടെയുള്ള ആഗോള വിപണികളിലേക്ക് ഈ ഫോണുകൾ എന്നാണ് എത്തുക എന്ന കാര്യത്തിൽ കമ്പനി ഔദ്യോഗിക പ്രഖ്യാപനം നടത്തിയിട്ടില്ല.
