തമിഴ്നാട്ടിന്റെ രാഷ്ട്രീയ ചരിത്രത്തിൽ ഒരുപാട് തിരഞ്ഞെടുപ്പുകൾ വന്നുപോയിട്ടുണ്ട്. സിനിമാതാരങ്ങൾ രാഷ്ട്രീയത്തിലിറങ്ങിയതും പുതുമയല്ല. എന്നാൽ 2026ലെ തമിഴ്നാട് നിയമസഭാ തെരഞ്ഞെടുപ്പ് അതിൽ നിന്നെല്ലാം വ്യത്യസ്തമായ ഒരു കഥയാണ് പറയുന്നത്. കാരണം, ഇത് ഒരു നടന്റെ വിജയകഥ മാത്രമല്ല, വർഷങ്ങളായി ഡി.എം.കെ–എ.ഐ.എ.ഡി.എം.കെ എന്ന രണ്ട് ശക്തികളുടെ നിയന്ത്രണത്തിലായിരുന്ന തമിഴ് രാഷ്ട്രീയത്തെ അപ്രതീക്ഷിതമായി പൊളിച്ചെഴുതിയ രാഷ്ട്രീയ പരീക്ഷണത്തിന്റെ കഥ കൂടിയാണ്. ആ പരീക്ഷണത്തിന്റെ മുഖമായി മാറിയത് നടൻ വിജയ് ആണെങ്കിൽ, അതിന്റെ തലച്ചോറായി പ്രവർത്തിച്ചത് ഒരു മുപ്പതുകാരനായ രാഷ്ട്രീയ തന്ത്രജ്ഞൻ കപിൽ സാഹുവാണ്.
സിനിമാ സ്ക്രീനിൽ ‘മാസ്’ ഹീറോയായി ആരാധിക്കപ്പെട്ട വിജയ്, രാഷ്ട്രീയത്തിലിറങ്ങുമ്പോൾ പലരും അതിനെ മറ്റൊരു താരപ്രവേശനമായി മാത്രമാണ് കണ്ടത്. “ഫാൻസ് ഉണ്ടെന്ന കൊണ്ട് വോട്ടുകൾ കിട്ടുമോ?”, “ദ്രാവിഡ രാഷ്ട്രീയത്തെ തകർക്കാൻ കഴിയുമോ?”, “സംഘടനയില്ലാത്ത ഒരു പാർട്ടി എങ്ങനെ തിരഞ്ഞെടുപ്പ് പോരാട്ടം നടത്തും?” ഇത്തരം ചോദ്യങ്ങൾ നിറഞ്ഞിരുന്നു തമിഴ്നാട്ടിലെ രാഷ്ട്രീയ ചർച്ചകളിൽ. എന്നാൽ ഫലപ്രഖ്യാപന ദിവസം എത്തിയപ്പോൾ, ആ സംശയങ്ങളൊക്കെ അപ്രത്യക്ഷമായി. 234 അംഗ നിയമസഭയിൽ 108 സീറ്റുകൾ നേടി തമിഴക വെട്രി കഴകം സംസ്ഥാനത്തെ ഏറ്റവും വലിയ ഒറ്റക്കക്ഷിയായി ഉയർന്നു. ഭൂരിപക്ഷത്തിൽ നിന്ന് പത്ത് സീറ്റുകൾ അകലെ നിന്നെങ്കിലും, തമിഴ് രാഷ്ട്രീയത്തിന്റെ കേന്ദ്രത്തിലേക്ക് വിജയ് എത്തിച്ചേർന്നിരുന്നു.
ഈ വിജയത്തിന്റെ പിന്നാമ്പുറ കഥയിലാണ് കപിൽ സാഹുവെന്ന പേര് ഉയർന്ന് വരുന്നത്. പൊതുവേദികളിൽ അധികം പ്രത്യക്ഷപ്പെടാത്ത, രാഷ്ട്രീയ റാലികളിൽ മുദ്രാവാക്യം വിളിക്കാത്ത, ക്യാമറകൾക്ക് മുന്നിൽ പ്രസംഗിക്കാത്ത ഒരാളാണ് അദ്ദേഹം. പക്ഷേ തിരഞ്ഞെടുപ്പ് രാഷ്ട്രീയത്തിന്റെ അകത്തളങ്ങളിൽ, കപിൽ സാഹുവിനെ ഇന്ന് ഏറ്റവും സൂക്ഷ്മമായി നിരീക്ഷിക്കപ്പെടുന്ന തന്ത്രജ്ഞരിൽ ഒരാളായി കണക്കാക്കുന്നു.
ഇന്ത്യൻ പൊളിറ്റിക്കൽ ആക്ഷൻ കമ്മിറ്റി ഐപിഎസി എന്ന പ്രശാന്ത് കിഷോറിന്റെ പ്രശസ്ത രാഷ്ട്രീയ കൺസൾട്ടൻസി സംവിധാനത്തിലൂടെയാണ് സാഹുവിന്റെ രാഷ്ട്രീയ ജീവിതം ആരംഭിച്ചത്. ഡാറ്റ, വോട്ടർമാരുടെ മനോഭാവം, ബൂത്ത് തല കണക്കുകൾ, സോഷ്യൽ മീഡിയ നാരേറ്റീവ്, തിരഞ്ഞെടുപ്പ് മനശ്ശാസ്ത്രം ഇതെല്ലാം ഒരുമിച്ച് ചേർത്ത് രാഷ്ട്രീയ വിജയത്തിന്റെ സമവാക്യം നിർമ്മിക്കുന്ന രീതിയാണ് ഐപിഎസി ഇന്ത്യൻ രാഷ്ട്രീയത്തിന് പരിചയപ്പെടുത്തിയിരുന്നത്. അതിന്റെ ഭാഗമായിരുന്ന സാഹു പിന്നീട് സ്വതന്ത്ര രാഷ്ട്രീയ കൺസൾട്ടന്റായി മാറി. വെറും മുപ്പത് വയസുള്ളയാളായിട്ടും ഒമ്പത് സംസ്ഥാനങ്ങളിലെ തിരഞ്ഞെടുപ്പ് പ്രചാരണങ്ങൾ കൈകാര്യം ചെയ്ത അനുഭവം അദ്ദേഹത്തിനുണ്ടായിരുന്നു.
കപിൽ സാഹു
കോൺഗ്രസ് മുതൽ ആം ആദ്മി പാർട്ടി വരെയും, സിക്കിം ഡെമോക്രാറ്റിക് ഫ്രണ്ട് മുതൽ കർണാടകയിലെ പ്രമുഖ നേതാക്കളുവരെയും വിവിധ രാഷ്ട്രീയ ശക്തികളുമായി അദ്ദേഹം പ്രവർത്തിച്ചിട്ടുണ്ട്. ഡൽഹിയിൽ ആം ആദ്മി പാർട്ടിയുടെ പ്രചാരണങ്ങളിൽ പങ്കെടുത്ത അനുഭവം അദ്ദേഹത്തിന് നഗര യുവാക്കളെ എങ്ങനെ രാഷ്ട്രീയമായി ആകർഷിക്കാമെന്നുള്ള വ്യക്തമായ ധാരണ നൽകി. സിക്കിമിൽ നടത്തിയ പ്രചാരണങ്ങൾ ചെറിയ സംസ്ഥാനങ്ങളിലെ സാമൂഹിക ബന്ധങ്ങളും പ്രാദേശിക വികാരങ്ങളും തിരഞ്ഞെടുപ്പിൽ എത്ര നിർണായകമാണെന്ന് പഠിപ്പിച്ചു. ഈ അനുഭവങ്ങളുടെ സംയോജനമാണ് പിന്നീട് തമിഴ്നാട്ടിൽ അദ്ദേഹത്തിന് ഏറ്റവും വലിയ ആയുധമായത്.
വിജയ് രാഷ്ട്രീയ പാർട്ടി പ്രഖ്യാപിച്ചപ്പോൾ ഏറ്റവും വലിയ വെല്ലുവിളി സംഘടനയില്ലായ്മയായിരുന്നു. ഒരു വലിയ ആരാധകവൃന്ദം ഉണ്ടായിരുന്നുവെങ്കിലും, അത് രാഷ്ട്രീയ കേഡറാക്കാൻ കഴിഞ്ഞിരുന്നില്ല. ബൂത്ത് തല കമ്മിറ്റികളില്ല, വാർഡ് അടിസ്ഥാന ഘടനകളില്ല, തിരഞ്ഞെടുപ്പ് യന്ത്രങ്ങളില്ല ഒരു രാഷ്ട്രീയ പാർട്ടിക്ക് ആവശ്യമായ അടിസ്ഥാന ഘടകങ്ങൾ ഒന്നും ടിവികെയ്ക്ക് ഉണ്ടായിരുന്നില്ല. എന്നാൽ സാഹു അതിനെ ദൗർബല്യമായി കാണാതെ അവസരമായി മാറ്റി.
തമിഴ്നാട്ടിലെ പഴയ രാഷ്ട്രീയ രീതികളിൽ നിന്ന് പൂർണമായും വ്യത്യസ്തമായ ഒരു ക്യാമ്പെയിൻ മോഡലാണ് അദ്ദേഹം രൂപപ്പെടുത്തിയത്. യുവാക്കളെ കേന്ദ്രീകരിച്ചുള്ള സമ്പർക്കം, കൃത്യമായി നിയന്ത്രിച്ച ഡിജിറ്റൽ നാരേറ്റീവ്, വീടുതോറും കടന്നുകയറുന്ന മണ്ഡലതല പ്രവർത്തനം ഈ മൂന്ന് തൂണുകളിലായിരുന്നു ടിവികെയുടെ മുഴുവൻ പ്രചാരണം നിലകൊണ്ടത്. സോഷ്യൽ മീഡിയയിൽ വിജയ്യുടെ സിനിമാ ഇമേജിനെ രാഷ്ട്രീയ ബ്രാൻഡാക്കി മാറ്റുന്നതിൽ ടിവികെ അതിശയകരമായ വിജയം നേടി. പഴയ രാഷ്ട്രീയ പ്രസംഗങ്ങളേക്കാൾ ചെറു വീഡിയോ ക്ലിപ്പുകളും, മീമുകളും, വികാരാധിഷ്ഠിതമായ സന്ദേശങ്ങളുമായിരുന്നു പാർട്ടി ഉപയോഗിച്ചത്. പ്രത്യേകിച്ച് ആദ്യമായി വോട്ട് ചെയ്യുന്ന യുവാക്കളെ ലക്ഷ്യമിട്ടായിരുന്നു പ്രചാരണം. “ദ്രാവിഡ പാർട്ടികൾക്കപ്പുറം ഒരു പുതിയ തമിഴ്നാട്” എന്ന ആശയം വളരെ സൂക്ഷ്മമായി യുവാക്കളുടെ മനസ്സിലേക്ക് എത്തിക്കപ്പെട്ടു.
അതേസമയം, ഡിജിറ്റൽ പ്രചാരണം മാത്രം മതിയാകില്ലെന്ന് സാഹു വ്യക്തമായി മനസ്സിലാക്കിയിരുന്നു. തിരഞ്ഞെടുപ്പുകൾ ഒടുവിൽ ജയിക്കപ്പെടുന്നത് ബൂത്ത് തലത്തിലാണ് എന്നതാണ് അദ്ദേഹത്തിന്റെ വിശ്വാസം. അതുകൊണ്ടുതന്നെ, ടിവികെ ഓരോ മണ്ഡലത്തിലും പ്രാദേശിക പ്രവർത്തകരെ കണ്ടെത്തി പരിശീലിപ്പിക്കാൻ തുടങ്ങി. ആരാധക കൂട്ടായ്മകളെ രാഷ്ട്രീയ പ്രവർത്തകരാക്കി മാറ്റുന്ന പ്രക്രിയയാണ് പിന്നീട് പാർട്ടിയുടെ വലിയ ശക്തിയായി മാറിയത്. ഈ തിരഞ്ഞെടുപ്പ് യാത്ര എളുപ്പമൊന്നുമല്ലായിരുന്നു. കരൂരിലെ തിരക്കിൽ 41 പേർ മരിച്ച ദുരന്തം പാർട്ടിക്ക് വലിയ തിരിച്ചടിയായി. അതിനുപുറമേ വിജയ്യുടെ വ്യക്തിജീവിതവുമായി ബന്ധപ്പെട്ട വിവാദങ്ങളും രാഷ്ട്രീയ ആക്രമണങ്ങളും ഉയർന്നു. പല രാഷ്ട്രീയ നിരീക്ഷകരും ഇത് ടിവികെയുടെ വളർച്ച തടയും എന്ന് കരുതിയിരുന്നു. എന്നാൽ ഈ പ്രതിസന്ധികളെ മുഴുവൻ പാർട്ടി തന്ത്രപരമായി കൈകാര്യം ചെയ്തു. വിഷയങ്ങളിൽ നീണ്ടുനിൽക്കുന്ന പ്രതികരണങ്ങളോ വികാരാധിഷ്ഠിത പ്രതികരണങ്ങളോ നൽകാതെ, വീണ്ടും പ്രധാന നാരേറ്റീവിലേക്ക് ശ്രദ്ധ തിരിക്കുകയായിരുന്നു സാഹുവിന്റെ ടീം ചെയ്തത്.
അതിലും നിർണായകമായിരുന്നു വിജയ് എടുത്ത മറ്റൊരു തീരുമാനം , 234 മണ്ഡലങ്ങളിലും ഒറ്റയ്ക്ക് മത്സരിക്കുക. തമിഴ്നാട്ടിലെ രാഷ്ട്രീയ സംസ്കാരത്തിൽ ഇത് വലിയ സന്ദേശമായിരുന്നു. സഖ്യത്തിന്റെ തുണയില്ലാതെ ഒറ്റയ്ക്ക് മത്സരിച്ചുകൊണ്ട് വിജയ് ഒരു “വോട്ട് സ്പ്ലിറ്റർ” അല്ല, മറിച്ച് ഭരണത്തിനായി എത്തിയ ശക്തിയാണ് എന്ന സന്ദേശം വോട്ടർമാരിലേക്ക് എത്തിച്ചു. അത് യുവാക്കളിലും നഗര മധ്യവർഗ്ഗത്തിലും വലിയ സ്വാധീനം സൃഷ്ടിച്ചു.
ചെന്നൈ ഉൾപ്പെടെയുള്ള നഗര മേഖലകളിൽ ടിവികെ നടത്തിയ മുന്നേറ്റം പ്രത്യേക ശ്രദ്ധ നേടി. ദ്രാവിഡ പാർട്ടികളോടുള്ള പാരമ്പര്യ രാഷ്ട്രീയബന്ധം ഇല്ലാത്ത യുവാക്കൾ വിജയ്യുടെ പ്രചാരണത്തെ ഒരു “മാറ്റത്തിന്റെ സാധ്യത”യായി കാണാൻ തുടങ്ങി. രാഷ്ട്രീയത്തേക്കാൾ പ്രതീക്ഷയുടെ ഭാഷയാണ് ടിവികെ ഉപയോഗിച്ചത്. അതാണ് പാർട്ടിയുടെ ഏറ്റവും വലിയ നേട്ടമായത്.
ഇന്ന് തമിഴ്നാട്ടിലെ രാഷ്ട്രീയ ചർച്ചകളിൽ വിജയ് മാത്രമല്ല, കപിൽ സാഹുവും പ്രധാന കഥാപാത്രമാണ്. കാരണം, ഈ വിജയം ഒരു സിനിമാതാരത്തിന്റെ ജനപ്രീതി മാത്രം കൊണ്ട് ഉണ്ടായതല്ല. കൃത്യമായ രാഷ്ട്രീയ എഞ്ചിനീയറിംഗ്, ഡാറ്റ അടിസ്ഥാനമാക്കിയ പ്രചാരണം, യുവമനസ്സുകളെ വായിച്ചെടുത്ത തന്ത്രം, അടിത്തട്ടിൽ നിന്ന് കെട്ടിപ്പടുത്ത സംഘടന ഇവയുടെ കൂട്ടായ ഫലമാണ്.
തമിഴ്നാട് രാഷ്ട്രീയം ഇതുവരെ ദ്രാവിഡ പാർട്ടികളുടെ നിയന്ത്രണത്തിലായിരുന്നു. എന്നാൽ 2026ലെ തെരഞ്ഞെടുപ്പ് ഒരുപക്ഷേ ഒരു പുതിയ അധ്യായത്തിന്റെ തുടക്കമായേക്കാം. ആ മാറ്റത്തിന്റെ മുഖമായി വിജയ് ഉയർന്നപ്പോൾ, അതിന്റെ പിന്നിലെ അദൃശ്യ ശിൽപി എന്ന നിലയിൽ കപിൽ സാഹുവിന്റെ പേര് ഇന്ത്യൻ രാഷ്ട്രീയത്തിൽ ഇനി കൂടുതൽ ശക്തമായി കേൾക്കപ്പെടും.
