സൗരയൂഹത്തിന്റെ അതിരുകളിൽ നിഗൂഢതകൾ ഒളിപ്പിച്ചു കിടക്കുന്ന പ്ലൂട്ടോയെക്കുറിച്ച് ശാസ്ത്രലോകത്തെ ഞെട്ടിക്കുന്ന പുതിയ വെളിപ്പെടുത്തലുമായി നാസ രംഗത്തെത്തിയിരിക്കുന്നു. സൂര്യനിൽ നിന്ന് വളരെ അകലെ, എപ്പോഴും കഠിനമായ തണുപ്പും മഞ്ഞും നിറഞ്ഞ ഈ കുള്ളൻഗ്രഹത്തിന്റെ ഉപരിതലത്തിൽ അടുത്തിടെ ദ്രാവകം ഒഴുകിയിരുന്നതിന്റെ തെളിവുകളാണ് ഗവേഷകർ കണ്ടെത്തിയിരിക്കുന്നത്. പ്ലൂട്ടോയെക്കുറിച്ചുള്ള നമ്മുടെ മുൻ ധാരണകളെല്ലാം മാറ്റിമറിക്കുന്ന ഒന്നായാണ് ഈ ശാസ്ത്രീയ മുന്നേറ്റം വിലയിരുത്തപ്പെടുന്നത്.
2015-ൽ നാസയുടെ ‘ന്യൂ ഹൊറൈസൺസ്’ ബഹിരാകാശ പേടകം പ്ലൂട്ടോയ്ക്ക് അരികിലൂടെ കടന്നുപോയപ്പോൾ പകർത്തിയ ചിത്രങ്ങളും വിവരങ്ങളുമാണ് ഈ വിപ്ലവകരമായ കണ്ടെത്തലിന് അടിസ്ഥാനമായത്. ഈ പേടകം ശേഖരിച്ച ഡാറ്റകൾ സൂക്ഷ്മമായി വിശകലനം ചെയ്തപ്പോഴാണ് ഗ്രഹത്തിന്റെ ഉപരിതലത്തിൽ അസാധാരണമായ പ്രതിഭാസങ്ങൾ ഗവേഷകരുടെ ശ്രദ്ധയിൽപ്പെട്ടത്. പ്ലൂട്ടോയുടെ ഹൃദയാകൃതിയിലുള്ള ഭീമാകാരമായ ‘സ്പുട്നിക് പ്ലാനിറ്റിയ’ എന്ന മഞ്ഞുഗ്ലേസിയറിന്റെ വടക്കേ അറ്റത്തുള്ള വിള്ളലുകളിലൂടെ ദ്രാവക നൈട്രജൻ മുകളിലേക്ക് ഉയർന്നുവരുന്നുണ്ടെന്നാണ് പുതിയ പഠനം വ്യക്തമാക്കുന്നത്.
ഈ കുള്ളൻഗ്രഹത്തിന്റെ ചരിത്രത്തിൽ ആദ്യമായാണ് ഉപരിതലത്തിൽ ദ്രാവകം ഒഴുകിയതിന്റെ നേരിട്ടുള്ള തെളിവുകൾ ശാസ്ത്രജ്ഞർക്ക് ലഭിക്കുന്നത്. പ്ലൂട്ടോയുടെ ഉപരിതല ഘടന എപ്പോഴും മാറ്റത്തിന് വിധേയമാണെന്നും, അവിടെ സജീവമായ പല പ്രതിഭാസങ്ങളും ഇപ്പോഴും നടക്കുന്നുണ്ടെന്നുമാണ് ഈ കണ്ടെത്തൽ സൂചിപ്പിക്കുന്നത്. സൗരയൂഹത്തിന്റെ ശീതീകരിച്ച കോണുകളിൽ പോലും വിചചിത്രമായ ഭൗമശാസ്ത്രപരമായ പ്രവർത്തനങ്ങൾ നടക്കുന്നുണ്ടെന്നത് ശാസ്ത്രജ്ഞരെപ്പോലും അത്ഭുതപ്പെടുത്തുന്നുണ്ട്.
ടെക്സസ്, ഒക്ലഹോമ എന്നീ യു.എസ് സംസ്ഥാനങ്ങളുടെ വിസ്തൃതിയേക്കാൾ വലുപ്പമുള്ള ഭീമാകാരമായ ഉറഞ്ഞ നൈട്രജൻ ഗ്ലേസിയറാണ് സ്പുട്നിക് പ്ലാനിറ്റിയ. 2015-ലെ ഫ്ലൈബൈ ചിത്രങ്ങളിൽ ഈ പ്രദേശത്തിന്റെ വടക്കുഭാഗത്ത് നഗരത്തോളം വലുപ്പമുള്ള കൺവെക്ഷൻ സെല്ലുകളും അവയെ വേർതിരിക്കുന്ന നേർത്ത ഇരുണ്ട വരകളും വ്യക്തമായി കാണാൻ കഴിഞ്ഞിരുന്നു. മുൻകാലങ്ങളിൽ ഇവിടെ എന്തോ ദ്രാവകം ഒഴുകിയിട്ടുണ്ടാകാം എന്നതിന്റെ ആദ്യ സൂചനകളായിരുന്നു അവയെല്ലാം. എന്നാൽ ഇപ്പോൾ പുറത്തുവന്ന പുതിയ പഠനങ്ങൾ സൂചിപ്പിക്കുന്നത് ഈ ഇരുണ്ട അടയാളങ്ങൾ കാലാകാലങ്ങളിൽ ഇടയ്ക്കിടെ നനഞ്ഞ അവസ്ഥയിലാകാറുണ്ട് എന്നാണ്.
Also Read: ഹിറ്റ്ലറെ വിറപ്പിച്ച തടവുചാട്ടം; രണ്ടാം ലോകയുദ്ധത്തിലെ ഇതിഹാസ തുരങ്കകഥ
കഴിഞ്ഞ ജൂലൈ 31-ന് ‘ദി പ്ലാനറ്ററി സയൻസ് ജേണൽ’ എന്ന പ്രസിദ്ധീകരണത്തിലാണ് ഈ പുതിയ പഠനം പുറത്തുവന്നത്. പ്ലൂട്ടോയെക്കുറിച്ച് പഠിക്കുന്ന ഗ്രഹശാസ്ത്രജ്ഞരും ഭൂമിയിലെ ഹിമാനിശാസ്ത്രത്തിൽ വിദഗ്ദ്ധരായ ശാസ്ത്രജ്ഞരും ചേർന്ന് സംയുക്തമായാണ് ഈ ഗവേഷണം പൂർത്തിയാക്കിയത്. ഗ്ലേസിയറിന് അടിയിൽ നിന്ന് ദ്രാവക നൈട്രജൻ മുകളിലേക്ക് തള്ളിവരുമ്പോഴാണ് ഇത്തരം മാറ്റങ്ങൾ ഉപരിതലത്തിൽ ദൃശ്യമാകുന്നതെന്ന് ഇവർ വിശദീകരിക്കുന്നു.
ഭൂമിയിൽ മഴ പെയ്യുമ്പോഴോ അല്ലെങ്കിൽ അടിയിൽ നിന്ന് ദ്രാവകം പുറത്തേക്ക് വരുമ്പോഴോ ഹിമാനികളുടെ ഉപരിതലം ഇരുണ്ടുപോകാറുള്ളതുപോലെയാണ് പ്ലൂട്ടോയുടെ വടക്കൻ സ്പുട്നിക് പ്ലാനിറ്റിയയിലെ ഉപരിതല പാറ്റേണുകളും കാണപ്പെടുന്നത്. എന്നാൽ പ്ലൂട്ടോയിലെ അതിശൈത്യവും അന്തരീക്ഷാവസ്ഥയും കാരണം അവിടെ ദ്രാവക നൈട്രജന്റെ മഴ പെയ്യുക എന്നത് തികച്ചും അസാധ്യമാണ്. അതുകൊണ്ടുതന്നെ, ഈ ദ്രാവകം ആകാശത്തുനിന്നല്ല, മറിച്ച് ഗ്ലേസിയറിന് അടിയിൽ നിന്ന് മുകളിലേക്ക് ഒഴുകിയെത്തുകയാണെന്നാണ് ശാസ്ത്രജ്ഞരുടെ ഉറച്ച നിഗമനം.
ന്യൂ ഹൊറൈസൺസ് മിഷന്റെ പ്രധാന അന്വേഷകനും കൊളറാഡോയിലെ സൗത്ത് വെസ്റ്റ് റിസർച്ച് ഇൻസ്റ്റിറ്റ്യൂട്ടിലെ ഗവേഷകനുമായ അലൻ സ്റ്റേൺ പറയുന്നത് പ്ലൂട്ടോ നമ്മെ ഒരിക്കലും അത്ഭുതപ്പെടുത്തുന്നത് അവസാനിപ്പിക്കുന്നില്ല എന്നാണ്. ദ്രാവകങ്ങൾ അടുത്തിടെ പ്ലൂട്ടോയുടെ ഉപരിതലത്തിൽ എത്തിയിട്ടുണ്ടെന്നത് ഈ കുള്ളൻഗ്രഹത്തിൽ എപ്പോഴും മാറ്റങ്ങൾ സംഭവിക്കുന്ന സങ്കീർണ്ണമായ കാലാവസ്ഥാ സംവിധാനങ്ങൾ നിലനിൽക്കുന്നുണ്ടെന്നതിന്റെ വ്യക്തമായ സൂചനയാണ് നൽകുന്നത്.
പ്ലൂട്ടോയെക്കുറിച്ചുള്ള നാസയുടെ ഈ പുതിയ കണ്ടെത്തൽ സൗരയൂഹത്തിന്റെ ഉത്ഭവത്തെയും പരിണാമത്തെയും കുറിച്ചുള്ള നമ്മുടെ അറിവുകളെ കൂടുതൽ വിശാലമാക്കും. ജീവന്റെ സാന്നിധ്യം ചിന്തിക്കാൻ പോലും കഴിയാത്ത ഇത്തരം അതിശൈത്യമുള്ള ലോകങ്ങളിലും വിചിത്രമായ ദ്രാവക പ്രവാഹങ്ങളും ഭൗമശാസ്ത്രപരമായ സജീവതയും സാധ്യമാണെന്ന് ഈ പഠനം തെളിയിക്കുന്നു. ഭാവിയിൽ ബഹിരാകാശ ഗവേഷണ രംഗത്ത് വലിയ ചർച്ചകൾക്കും കൂടുതൽ പര്യവേക്ഷണങ്ങൾക്കും ഈ സുപ്രധാന കണ്ടെത്തൽ വഴിയൊരുക്കുമെന്നുറപ്പാണ്.
