കുവൈത്ത്: അമിത ശബ്ദങ്ങൾ പുറപ്പെടുവിക്കുകയും സുരക്ഷകൾ ലംഘിക്കുകയും ചെയ്യുന്ന വാഹനങ്ങൾക്കെതിരെ കർശന നടപടികൾ സ്വീകരിക്കുമെന്ന് കുവൈത്ത് ആഭ്യന്തര മന്ത്രാലയം ജനറൽ ട്രാഫിക് വകുപ്പ്. അത്തരം നിയമലംഘനം നടത്തുന്ന ഡ്രൈവർക്കെതിരെ നിയമനടപടികൾ സ്വീകരിക്കുന്നതിനൊപ്പം വാഹനം 60 ദിവസത്തേക്ക് ട്രാഫിക് ഇംപൗണ്ട്മെന്റ് ഗാരേജിൽ കണ്ടുകെട്ടുകയും ചെയ്യുമെന്ന് ആഭ്യന്തര മന്ത്രാലയം മുന്നറിയിപ്പ് നൽകി.
അതേസമയം റോഡ് ഉപയോക്താക്കളുടെ സുരക്ഷ ഉറപ്പാക്കുകയും സമൂഹത്തിന്റെ സൗകര്യങ്ങളെ ബാധിക്കുന്ന പ്രതികൂല പ്രതിഭാസങ്ങൾ കുറയ്ക്കുകയും ചെയ്യുക എന്നതാണ് നിയമമെന്നും മന്ത്രാലയം പറഞ്ഞു. എല്ലാ ഡ്രൈവർമാരോടും ഗതാഗത നിയമങ്ങളും ചട്ടങ്ങളും പാലിക്കാൻ ആഭ്യന്തര മന്ത്രാലയം നിർദേശം നൽകി. നിയമലംഘകരെ അറസ്റ്റ് ചെയ്യുന്നതിനും അവർക്കെതിരെ നിയമപ്രകാരം ആവശ്യമായ നടപടികൾ സ്വീകരിക്കുന്നതിനുമുള്ള തീവ്രമായ ഗതാഗത പ്രചാരണങ്ങൾ സുരക്ഷാ സേവനങ്ങൾ തുടരുമെന്നും മന്ത്രാലയം വ്യക്തമാക്കി.
