വിശാഖപട്ടണം: ക്രിക്കറ്റ് മത്സരത്തിനിടെ ഒരു റണ്ണിനെച്ചൊല്ലിയുണ്ടായ തർക്കം കൊലപാതകത്തിൽ കലാശിച്ചു. മത്സരത്തിൽ അമ്പയറായിരുന്ന അജിത് (23) ആണ് ആക്രമണത്തിൽ കൊല്ലപ്പെട്ടത്. കൂടെയുണ്ടായിരുന്ന സഹ അമ്പയർ ചിരഞ്ജീവിക്കും ആക്രമണത്തിൽ പരിക്കേറ്റു.
കളിക്കിടെ ഒരു റണ്ണിന്റെ പേരിൽ കളിക്കാർ തമ്മിൽ വാക്കേറ്റമുണ്ടായിരുന്നു. അമ്പയർമാർ ഇടപെട്ട് ഈ പ്രശ്നം പരിഹരിച്ചെങ്കിലും, കാണികളിലൊരാളായ കിഷോർ (26) അമ്പയർമാരുടെ തീരുമാനത്തെ ചോദ്യം ചെയ്യുകയും അവർക്കെതിരെ തിരിയുകയും ചെയ്തു. ആക്രമണത്തിനിടെ അജിത്തിന് കുത്തേറ്റതായി പോലീസ് സ്ഥിരീകരിച്ചു. സ്വകാര്യ ഫോട്ടോഗ്രാഫറായ കിഷോറിന് കൊല്ലപ്പെട്ട അജിത്തുമായി മുൻപും തർക്കങ്ങൾ ഉണ്ടായിരുന്നതായും പോലീസ് അറിയിച്ചു.
