ദുബായ്: നഗര ഗതാഗത വികസനത്തിലും ആഗോള വ്യോമയാന മേഖലയിലും സമാനതകളില്ലാത്ത ചരിത്രനേട്ടവുമായി യു.എ.ഇ. രാജ്യത്ത് ഇലക്ട്രിക് എയർ ടാക്സി സർവീസുകൾ യാഥാർത്ഥ്യമാക്കുന്നതിനായുള്ള ലോകത്തിലെ ആദ്യത്തെ വാണിജ്യ വെർട്ടിപോർട്ടായ ‘വി.ഡി.എക്സിന്’ യു.എ.ഇ ഔദ്യോഗികമായി പ്രവർത്തനാനുമതി നൽകി. യു.എ.ഇ ജനറൽ സിവിൽ ഏവിയേഷൻ അതോറിറ്റിയാണ് ഈ സുപ്രധാന പ്രഖ്യാപനം നടത്തിയത്. എമിറേറ്റിൽ അത്യാധുനിക പറക്കും ടാക്സി സേവനങ്ങൾ ഉടൻ ആരംഭിക്കുന്നതിലേക്ക് വഴിതുറക്കുന്ന നിർണായക ചുവടുവെപ്പാണിത്.
ദുബായ് അന്താരാഷ്ട്ര വിമാനത്താവളത്തോട് ചേർന്ന് സ്ഥിതി ചെയ്യുന്ന ഈ വെർട്ടിപോർട്ട്, ഇനി വരാനിരിക്കുന്ന പറക്കും ടാക്സികളുടെ ലോകത്തെ തന്നെ മുൻനിര കേന്ദ്രമായി പ്രവർത്തിക്കും. ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റിയുടെ പൂർണ്ണ സഹകരണത്തോടെ പ്രമുഖ ബ്രിട്ടീഷ് ഇൻഫ്രാസ്ട്രക്ചർ കമ്പനിയായ ‘സ്കൈപോർട്സ് ഇൻഫ്രാസ്ട്രക്ചർ’ ആണ് ഈ ഇലക്ട്രിക് വെർട്ടിക്കൽ ടേക്ക്-ഓഫ് ആൻഡ് ലാൻഡിങ് സൗകര്യം വികസിപ്പിച്ചെടുത്തത്.
Also Read: അജ്മാൻ നഗരവികസനത്തിന് 180 കോടി ദിർഹത്തിന്റെ ‘AM 30×30’ പദ്ധതി
ഏകദേശം 3100 ചതുരശ്ര മീറ്റർ വിസ്തീർണ്ണത്തിൽ നാല് നിലകളിലായാണ് അതീവ ആധുനിക സൗകര്യങ്ങളോടെ വി.ഡി.എക്സ് വെർട്ടിപോർട്ട് ഒരുക്കിയിട്ടുള്ളത്. ഒരേസമയം എയർ ടാക്സികൾക്ക് കൈകാര്യം ചെയ്യാവുന്ന രണ്ട് പ്രമുഖ ടേക്ക്-ഓഫ്, ലാൻഡിങ് ഏരിയകൾ, അതിവേഗ ചാർജിങ് സംവിധാനങ്ങൾ, അത്യാധുനിക പാസഞ്ചർ ടെർമിനൽ എന്നിവ ഇതിന്റെ പ്രത്യേകതയാണ്. വാണിജ്യ പ്രവർത്തനങ്ങൾ പൂർണ്ണതോതിൽ ആരംഭിക്കുന്നതോടെ പ്രതിവർഷം 1,70,000 യാത്രക്കാർക്ക് വരെ മികച്ച സേവനം നൽകാൻ ഈ കേന്ദ്രത്തിന് സാധിക്കും. വെർട്ടിപോർട്ടിന്റെ അടിസ്ഥാന സൗകര്യങ്ങൾ, സുരക്ഷാ ക്രമീകരണങ്ങൾ, പ്രവർത്തന നടപടിക്രമങ്ങൾ, അടിയന്തര സാഹചര്യങ്ങളെ നേരിടാനുള്ള തയ്യാറെടുപ്പുകൾ എന്നിവ കർശനമായി വിലയിരുത്തിയ ശേഷമാണ് ജി.സി.എ.എ അനുമതി പത്രം കൈമാറിയത്.
ലോകത്തിലെ ആദ്യത്തെ അംഗീകൃത വാണിജ്യ വെർട്ടിപോർട്ട് എന്ന പദവി യു.എ.ഇക്ക് ലഭിച്ചത് ആഗോള വ്യോമയാന രംഗത്ത് ഒരു പുതിയ യുഗത്തിന്റെ തുടക്കമാണെന്ന് ജി.സി.എ.എ ഡയറക്ടർ ജനറൽ സെയ്ഫ് മുഹമ്മദ് അൽ സുവൈദി വ്യക്തമാക്കി. വരാനിരിക്കുന്ന എയർ ടാക്സി പദ്ധതികൾക്ക് ഇത് ശക്തമായ അടിത്തറ നൽകുമെന്നും അദ്ദേഹം കൂട്ടിച്ചേർത്തു. സുരക്ഷിതവും പരിസ്ഥിതി സൗഹൃദവുമായ നഗര ഗതാഗതത്തിന് പുതിയൊരു ആഗോള മാനദണ്ഡം സ്ഥാപിക്കാൻ വി.ഡി.എക്സിന് സാധിക്കുമെന്ന് സ്കൈപോർട്സ് ഇൻഫ്രാസ്ട്രക്ചർ സി.ഇ.ഓ ഡങ്കൻ വാക്കറും പ്രത്യാശ പ്രകടിപ്പിച്ചു.
Also Read: വേനലും ആഘോഷമാക്കാം; വമ്പൻ ഓഫറുകളുമായി ‘ദുബായ് ഡെസ്റ്റിനേഷൻസ്’ ആറാം പതിപ്പിന് തുടക്കം!
നിലവിൽ ഡൗൺടൗൺ ദുബായ്, ദുബായ് മറീന, പാം ജുമൈറ എന്നിവിടങ്ങളിലായി മറ്റ് മൂന്ന് വെർട്ടിപോർട്ടുകളുടെ നിർമ്മാണ പ്രവർത്തനങ്ങളും ദ്രുതഗതിയിൽ പുരോഗമിക്കുന്നുണ്ട്. ഈ ശൃംഖല പൂർത്തിയാകുന്നതോടെ ദുബായ് മെട്രോ സ്റ്റേഷനുകളുമായി ഇവയെ തടസ്സമില്ലാതെ ബന്ധിപ്പിക്കും. കാർബൺ പുറന്തള്ളൽ ഗണ്യമായി കുറയ്ക്കാനും വലിയ തോതിൽ വിദേശ നിക്ഷേപങ്ങൾ ആകർഷിക്കാനും അയ്യായിരത്തിലധികം പുതിയ തൊഴിലവസരങ്ങൾ സൃഷ്ടിക്കാനും ഈ പറക്കും കാർ സർവീസുകളിലൂടെ സാധിക്കുമെന്നാണ് വിലയിരുത്തൽ.
