ദുബായ്: വേനൽക്കാലം കൂടുതൽ ആകർഷകവും സജീവവുമാക്കാൻ ലക്ഷ്യമിട്ട് ‘ദുബായ് ഡെസ്റ്റിനേഷൻസ്’ ക്യാമ്പെയ്ന്റെ ആറാം പതിപ്പിന് തുടക്കമായി. ദുബായ് ഗവൺമെന്റ് മീഡിയ ഓഫീസിന്റെ സർഗ്ഗാത്മക വിഭാഗമായ ‘ബ്രാൻഡ് ദുബായ്’ ആണ് ഈ വേനൽക്കാല ക്യാമ്പെയ്നുമായി രംഗത്തെത്തിയിരിക്കുന്നത്. ദുബായ് സാമ്പത്തിക-വിനോദസഞ്ചാര വകുപ്പുമായി സഹകരിച്ച് നടത്തുന്ന ഈ പ്രചാരണം വരും മാസം ഓഗസ്റ്റ് 31 വരെ നീണ്ടുനിൽക്കും.
വേനൽച്ചൂടിൽ നിന്നും മാറി സഞ്ചാരികൾക്ക് ആസ്വദിക്കാൻ കഴിയുന്ന ഇൻഡോർ തീം പാർക്കുകൾ, വാട്ടർ പാർക്കുകൾ, ബീച്ചുകൾ, ആഡംബര ഹോട്ടലുകൾ എന്നിവ കേന്ദ്രീകരിച്ചാണ് ഇത്തവണത്തെ പ്രചാരണം പുരോഗമിക്കുന്നത്. താമസക്കാർക്കും സന്ദർശകർക്കുമായി ദുബായിലെ പ്രധാന വിനോദ കേന്ദ്രങ്ങളിലും ഹോട്ടലുകളിലും വൈവിധ്യമാർന്ന ഓഫറുകളുടെയും ഡിസ്കൗണ്ടുകളുടെയും നീണ്ടനിരയാണ് ക്യാമ്പെയ്ന്റെ ഭാഗമായി ഒരുക്കിയിരിക്കുന്നത്. പൊതു-സ്വകാര്യ മേഖലകളുടെ സംയുക്ത പങ്കാളിത്തത്തോടെയാണ് ഈ പദ്ധതി നടപ്പിലാക്കുന്നത്. ആഗോളതലത്തിൽ ഏറ്റവും മികച്ച വേനൽക്കാല ടൂറിസം കേന്ദ്രങ്ങളിലൊന്നായി ദുബായിയെ ഉയർത്തിക്കാട്ടുകയാണ് ഇതിലൂടെ ലക്ഷ്യമിടുന്നത്.
ദുബായ് സാമ്പത്തിക അജണ്ടയുടെ (D33) ലക്ഷ്യങ്ങൾക്ക് അനുസൃതമായി, വർഷത്തിൽ 365 ദിവസവും സഞ്ചാരികളെ ആകർഷിക്കുന്ന ലോകത്തെ മുൻനിര നഗരമായി ദുബായിയെ മാറ്റാനാണ് ഈ സമ്മർ ക്യാമ്പെയ്ൻ ലക്ഷ്യമിടുന്നതെന്ന് ദുബായ് ഫെസ്റ്റിവൽസ് ആൻഡ് റീട്ടെയിൽ എസ്റ്റാബ്ലിഷ്മെന്റ് സിഇഒ അഹമ്മദ് അൽ ഖാജ വ്യക്തമാക്കി. സന്ദർശകരുടെ പ്രതീക്ഷകൾക്ക് മുകളിൽ നിൽക്കുന്ന ലോകോത്തര സൗകര്യങ്ങളും സേവനങ്ങളുമാണ് ദുബായ് ഒരുക്കിയിരിക്കുന്നതെന്നും അദ്ദേഹം കൂട്ടിച്ചേർത്തു. യു.എ.ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ കാഴ്ചപ്പാടിന് അനുസൃതമായി, ലോകത്ത് സന്ദർശിക്കാനും ജോലി ചെയ്യാനും ജീവിക്കാനും ഏറ്റവും അനുയോജ്യമായ സുരക്ഷിത നഗരമായി ദുബായിയെ മാറ്റാനാണ് തങ്ങൾ ശ്രമിക്കുന്നതെന്ന് ബ്രാൻഡ് ദുബായ് ഡയറക്ടർ ഷൈമ അൽ സുവൈദി പറഞ്ഞു. ഈ വേനൽക്കാല ഓഫറുകളെയും വിനോദ കേന്ദ്രങ്ങളെയും കുറിച്ചുള്ള കൂടുതൽ വിവരങ്ങൾ അറിയാൻ താല്പര്യമുള്ളവർക്ക് https://dubaidestinations.ae/en എന്ന ഔദ്യോഗിക വെബ്സൈറ്റ് സന്ദർശിക്കാവുന്നതാണ്.
