മധ്യേഷ്യയിൽ പടരുന്ന യുദ്ധസാഹചര്യം വിനോദസഞ്ചാര മേഖലയ്ക്ക് കടുത്ത വെല്ലുവിളിയായി മാറുകയാണ്. ടൂറിസം സീസൺ സജീവമാകുന്ന സമയത്തുണ്ടായ ഈ തിരിച്ചടി കോടിക്കണക്കിന് രൂപയുടെ സാമ്പത്തിക നഷ്ടമുണ്ടാക്കുമെന്നാണ് കണക്കാക്കപ്പെടുന്നത്. യുദ്ധവാർത്തകൾ ഭയന്ന് നിരവധി സഞ്ചാരികൾ യാത്രകൾ മാറ്റിവെക്കുകയും വിമാനങ്ങൾ കൂട്ടത്തോടെ റദ്ദാക്കപ്പെടുകയും ചെയ്യുന്നത് മേഖലയെ വലിയ അനിശ്ചിതത്വത്തിലേക്കാണ് നയിക്കുന്നത്.
നിലവിൽ ഈ രാജ്യങ്ങളിലുള്ള സഞ്ചാരികളെ സുരക്ഷിതമായി നാട്ടിലെത്തിക്കാനാണ് ട്രാവൽ ഏജൻസികൾ ഇപ്പോൾ മുൻഗണന നൽകുന്നത്. ദുബായ്, അബുദാബി, ദോഹ തുടങ്ങിയ പ്രധാന വിമാനത്താവളങ്ങൾ വഴിയുള്ള ഗതാഗതത്തെ യുദ്ധം സാരമായി ബാധിച്ചതോടെ പ്രമുഖ ജർമ്മൻ ടൂർ ഓപ്പറേറ്റർമാരായ ആൾട്ടൂർസ്, ഡെർട്ടൂർ എന്നിവർ മാർച്ച് 7 വരെയുള്ള യുഎഇ, ഒമാൻ യാത്രകൾ റദ്ദാക്കി. അടിയന്തര സാഹചര്യങ്ങളിലല്ലാതെ ഈ മേഖലയിലേക്ക് സഞ്ചാരികളെ അയക്കില്ലെന്ന് ബ്രിട്ടീഷ് ട്രാവൽ അസോസിയേഷനും വ്യക്തമാക്കിയിട്ടുണ്ട്. യാത്ര റദ്ദാക്കിയവർക്ക് പണം തിരികെ നൽകാനോ അല്ലെങ്കിൽ മറ്റൊരു തീയതിയിലേക്ക് യാത്ര മാറ്റാനോ ഉള്ള ക്രമീകരണങ്ങൾ കമ്പനികൾ ഒരുക്കുന്നുണ്ട്.
Also Read: ശ്രീലങ്കൻ തീരത്ത് രണ്ടാമതൊരു ഇറാനിയൻ കപ്പൽ കൂടി; നാവികരെ രക്ഷിക്കാൻ തീവ്രശ്രമം
കോവിഡ് പ്രതിസന്ധിക്ക് ശേഷം അതിവേഗം വളർന്ന ടൂറിസം മേഖലയ്ക്ക് ഈ യുദ്ധം വലിയ സാമ്പത്തിക പ്രഹരമാണ് നൽകുന്നത്. ഓക്സ്ഫോർഡ് ഇക്കണോമിക്സിന്റെ റിപ്പോർട്ട് പ്രകാരം യുദ്ധം നീണ്ടുപോയാൽ 2026-ൽ വിനോദസഞ്ചാരികളുടെ എണ്ണത്തിൽ 27 ശതമാനം വരെ കുറവുണ്ടാകാൻ സാധ്യതയുണ്ട്. ഇത് ഏകദേശം 56 ബില്യൺ ഡോളർ വരെയുള്ള വരുമാന നഷ്ടത്തിന് കാരണമാകുമെന്നാണ് ആശങ്ക. എന്നിരുന്നാലും, സ്ഥിതിഗതികൾ ശാന്തമായാൽ സഞ്ചാരികൾ വേഗത്തിൽ മടങ്ങിയെത്തുമെന്ന പ്രതീക്ഷയിലാണ് ടൂറിസം രംഗത്തുള്ളവർ.
