നൂറിൽ താഴെ സീറ്റുകളിലേക്ക് ടിഎംസി ഒതുങ്ങി, മമതയുടെ പരാജയം ഇന്ത്യയിൽ പ്രതിപക്ഷ തകർച്ചയുടെ തുടക്കമോ?

പശ്ചിമ ബംഗാൾ നിയമസഭാ തെരഞ്ഞെടുപ്പിൽ മമത ബാനർജിയുടെ തൃണമൂൽ കോൺഗ്രസ് നേരിട്ട അപ്രതീക്ഷിത പരാജയം ഇന്ത്യൻ രാഷ്ട്രീയത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്. കഴിഞ്ഞ തവണ 215 സീറ്റുകൾ നേടി കരുത്ത് തെളിയിച്ച ടിഎംസി, ഇത്തവണ നൂറിൽ താഴെ സീറ്റുകളിലേക്ക് ഒതുക്കപ്പെട്ടത് പാർട്ടിക്ക് വലിയ ആഘാതമായി. ബംഗാൾ രാഷ്ട്രീയത്തിലെ മമതയുടെ ചോദ്യം ചെയ്യപ്പെടാത്ത ആധിപത്യത്തിന് ഈ ഫലം വലിയൊരു തിരിച്ചടിയാണ് നൽകിയിരിക്കുന്നത്.

ദേശീയ തലത്തിൽ ബിജെപിക്കെതിരായ പോരാട്ടത്തിൽ മുൻനിരയിൽ നിന്നിരുന്ന നേതാവെന്ന നിലയിൽ മമതയുടെ പതനം പ്രതിപക്ഷ നിരയെ മൊത്തത്തിൽ ദുർബലപ്പെടുത്തുന്നു. അഖിലേഷ് യാദവ്, തേജസ്വി യാദവ് തുടങ്ങിയ പ്രമുഖ പ്രാദേശിക നേതാക്കൾ പലപ്പോഴും മമതയുടെ നിലപാടുകളെ പിന്തുണച്ച് രംഗത്തെത്തിയിരുന്നു. എന്നാൽ ബംഗാളിലെ ഈ തകർച്ചയോടെ, ദേശീയ രാഷ്ട്രീയത്തിൽ മമതയ്ക്കുണ്ടായിരുന്ന സ്വാധീനവും വിലപേശൽ ശേഷിയും ഗണ്യമായി കുറയുമെന്നാണ് വിലയിരുത്തപ്പെടുന്നത്.

പാർലമെന്റിലെ മൂന്നാമത്തെ വലിയ പ്രതിപക്ഷ കക്ഷിയായ ടിഎംസിയുടെ പരാജയം ഇന്ത്യ സഖ്യത്തിന്റെ ഭാവിയിലേക്കാണ് വിരൽ ചൂണ്ടുന്നത്. 2024-ലെ ലോക്‌സഭാ തിരഞ്ഞെടുപ്പിൽ ബംഗാളിലെ 42-ൽ 29 സീറ്റുകളും നേടിയാണ് മമത കരുത്ത് കാട്ടിയത്. എന്നാൽ നിയമസഭാ തിരഞ്ഞെടുപ്പിലെ ഈ വോട്ടുചോർച്ച വരാനിരിക്കുന്ന ലോക്‌സഭാ തിരഞ്ഞെടുപ്പുകളിൽ ബിജെപിക്ക് വലിയ മുൻതൂക്കം നൽകാൻ സാധ്യതയുണ്ടെന്ന് രാഷ്ട്രീയ നിരീക്ഷകർ ചൂണ്ടിക്കാട്ടുന്നു.

മുതിർന്ന പത്രപ്രവർത്തകൻ റഷീദ് കിദ്വായ് നിരീക്ഷിക്കുന്നത് പ്രകാരം, ഈ വിജയം ബംഗാളിലെ മുഴുവൻ സീറ്റുകളിലേക്കും കടന്നുകയറാൻ ബിജെപിക്ക് ആത്മവിശ്വാസം നൽകും. പ്രതിപക്ഷ നിരയിലെ ഐക്യമില്ലായ്മയും വ്യക്തമായ ഒരു ബദൽ രാഷ്ട്രീയം ഉയർത്തിക്കാട്ടാൻ കഴിയാത്തതും ബിജെപിയുടെ രാഷ്ട്രീയ അടിത്തറ കൂടുതൽ ശക്തമാക്കുന്നു. വ്യക്തമായ പ്രത്യയശാസ്ത്രപരമായ അടിത്തറയില്ലാതെ ചിതറിക്കിടക്കുന്ന പ്രതിപക്ഷ പാർട്ടികൾക്ക് ബിജെപിയുടെ സുസംഘടിതമായ തന്ത്രങ്ങളെ നേരിടാൻ കഴിയുന്നില്ല.

ബംഗാൾ ഫലത്തിന് പിന്നാലെ പ്രതിപക്ഷ നേതാക്കൾക്ക് രാഷ്ട്രീയമായ വേട്ടയാടലുകൾ നേരിടേണ്ടി വരുമെന്ന് മാധ്യമപ്രവർത്തക നീർജ ചൗധരി അഭിപ്രായപ്പെടുന്നു. പ്രമുഖ നേതാക്കളുടെ പരാജയം പ്രതിപക്ഷ ഇടത്തെ ശൂന്യമാക്കിയിരിക്കുകയാണ്. ബിജെപിക്കെതിരെ സമ്മർദ്ദം ചെലുത്താൻ ശ്രമിച്ചാൽ ഭരണകൂടത്തിൽ നിന്നുള്ള പ്രത്യാക്രമണങ്ങൾ നേരിടാൻ കഴിയാത്ത വിധം പ്രതിപക്ഷ പാർട്ടികൾ ദുർബലമായിട്ടുണ്ടെന്നും അവർ വിലയിരുത്തുന്നു.

ഉത്തർപ്രദേശ്, മഹാരാഷ്ട്ര, ഗുജറാത്ത് തുടങ്ങിയ സംസ്ഥാനങ്ങളിലെ വിജയങ്ങൾക്ക് പിന്നാലെ ബംഗാളും പിടിച്ചെടുക്കാനായത് ബിജെപിയുടെ ആധിപത്യം ഊട്ടിയുറപ്പിക്കുന്നു. ശക്തമായ ഒരു പ്രതിപക്ഷമില്ലാത്ത രാഷ്ട്രീയ സാഹചര്യം സൃഷ്ടിക്കാനാണ് ബിജെപി ശ്രമിക്കുന്നത്. പ്രതിപക്ഷ പാർട്ടികൾ തങ്ങളുടെ വ്യക്തിപരമായ താൽപ്പര്യങ്ങൾ മാറ്റിവെച്ച് പൊതുവായ ഒരു തന്ത്രം രൂപീകരിച്ചില്ലെങ്കിൽ ഇന്ത്യൻ രാഷ്ട്രീയം കൂടുതൽ ഏകപക്ഷീയമായി മാറുമെന്ന് വിദഗ്ധർ മുന്നറിയിപ്പ് നൽകുന്നു.

Also Read; മരണത്തെ തോൽപ്പിക്കാൻ സ്വിഫ്റ്റ്; ബഹിരാകാശത്ത് നാസയുടെ ‘അതിസാഹസിക’ രക്ഷാദൗത്യം

പ്രതിപക്ഷ പാർട്ടികൾ തമ്മിലുള്ള ഏകോപനമില്ലായ്മ വലിയൊരു ആശങ്കയായി പ്രൊഫസർ ഡി.എം. ദിവാകർ ചൂണ്ടിക്കാട്ടുന്നു. 2023-ൽ പട്‌നയിൽ ഒത്തുചേർന്ന ഇന്ത്യ സഖ്യത്തിലെ പ്രമുഖ നേതാക്കൾക്ക് ആഭ്യന്തര തർക്കങ്ങൾ കാരണം മുന്നോട്ട് പോകാൻ കഴിഞ്ഞില്ല. കടലാസിൽ മാത്രം ഒതുങ്ങുന്ന സഖ്യങ്ങൾ തിരഞ്ഞെടുപ്പ് ഗോദയിൽ ബിജെപിയുടെ ചിട്ടയായ പ്രവർത്തനങ്ങൾക്ക് മുന്നിൽ പരാജയപ്പെടുകയാണ്.

നിലവിലെ സാഹചര്യം പ്രതിപക്ഷത്തെ വലിയൊരു വഴിത്തിരിവിലാണ് എത്തിച്ചിരിക്കുന്നത്. കോൺഗ്രസ് നേതൃപരമായ പങ്ക് വഹിക്കണമെന്ന് ഒരു വിഭാഗം വാദിക്കുമ്പോഴും, പ്രാദേശിക പാർട്ടികൾക്കിടയിലെ ഭിന്നത ഐക്യനീക്കങ്ങളെ ബാധിക്കുന്നു. ഓരോ തിരഞ്ഞെടുപ്പ് കഴിയുമ്പോഴും ബിജെപി അടുത്ത ഘട്ടത്തിലേക്ക് നീങ്ങുമ്പോൾ, തിരിച്ചടികളിൽ നിന്ന് പാഠം ഉൾക്കൊള്ളാൻ പ്രതിപക്ഷത്തിന് കഴിയുന്നില്ലെന്നതാണ് കിദ്‌വായ് ഉൾപ്പെടെയുള്ളവരുടെ നിഗമനം.