തിരുവനന്തപുരം: രാജ്യവ്യാപകമായി നടക്കുന്ന ആറാമത് ദേശീയ കടുവാ കണക്കെടുപ്പിന് കേരളത്തിൽ തുടക്കമായി. കണക്കെടുപ്പിന്റെ മുന്നൊരുക്കങ്ങൾ തിരുവനന്തപുരത്തെ വനംവകുപ്പ് ആസ്ഥാനത്ത് നവംബർ 4-ന് നടന്ന യോഗം വിലയിരുത്തി. ഹെഡ് ഓഫ് ഫോറസ്റ്റ് ഫോഴ്സ് രാജേഷ് രവീന്ദ്രൻ ഐ.എഫ്.എസ്, ചീഫ് വൈൽഡ് ലൈഫ് വാർഡൻ ഡോ. പ്രമോദ് ജി. കൃഷ്ണൻ ഐ.എഫ്.എസ് എന്നിവരാണ് പ്രവർത്തനങ്ങൾക്ക് നേതൃത്വം നൽകുന്നത്. 2025 ഡിസംബർ 1 മുതൽ 2026 ഏപ്രിൽ വരെയുള്ള കാലയളവിൽ മൂന്ന് ഘട്ടങ്ങളിലായാണ് കടുവകളുടെ എണ്ണം തിട്ടപ്പെടുത്തുന്ന ഈ സുപ്രധാന ദൗത്യം നടപ്പാക്കുന്നത്. കണക്കെടുപ്പിനായുള്ള പരിശീലനങ്ങളുടെ സമയക്രമവും ഉപകരണങ്ങൾ വാങ്ങുന്നതിലെ പുരോഗതിയും യോഗം വിലയിരുത്തി.
മൂന്ന് ഘട്ടങ്ങളിലായി വിവരശേഖരണം
കണക്കെടുപ്പിൻ്റെ ആദ്യഘട്ടം 2025 ഡിസംബർ 1-ന് ആരംഭിച്ച് എട്ട് ദിവസം നീണ്ടുനിൽക്കും. ഈ ഘട്ടത്തിൽ പെരിയാർ, പറമ്പിക്കുളം കടുവാ സങ്കേതങ്ങൾ ഉൾപ്പെടെ സംസ്ഥാനത്തെ 37 ഫോറസ്റ്റ് ഡിവിഷനുകളിലായുള്ള 673 ബ്ലോക്കുകളിൽ ട്രാൻസെക്ടുകളിലും നിർദ്ദിഷ്ട പാതകളിലും സഞ്ചരിച്ച് വിവരങ്ങൾ ശേഖരിക്കും. കടുവ ഉൾപ്പെടെയുള്ള മാംസഭോജികളുടെയും സസ്യഭോജികളുടെയും സാന്നിധ്യം, വനമേഖലയുടെ ഗുണമേന്മ സംബന്ധിച്ച വിവരങ്ങൾ എന്നിവ M-STrIPES എന്ന മൊബൈൽ ആപ്ലിക്കേഷൻ ഉപയോഗിച്ചാണ് രേഖപ്പെടുത്തുന്നത്. ഒന്നാം ഘട്ടത്തിൽ ശേഖരിച്ച ഈ വിവരങ്ങളുടെ വിശദമായ വിശകലനമാണ് രണ്ടാം ഘട്ടം.
മൂന്നാം ഘട്ടമായ ക്യാമറ ട്രാപ്പിംഗ് കേരളത്തിലെ രണ്ട് കടുവാ സങ്കേതങ്ങളായ പെരിയാറിലും പറമ്പിക്കുളത്തും സമീപ വനങ്ങളിലുമാണ് നടപ്പാക്കുന്നത്. ഇതിനായി തിരഞ്ഞെടുത്തിട്ടുള്ള, 2 ചതുരശ്ര കിലോമീറ്റർ വലിപ്പമുള്ള 1,860 ഗ്രിഡുകളിൽ ക്യാമറ ട്രാപ്പുകൾ സ്ഥാപിക്കും. ഇതിലൂടെ ലഭിക്കുന്ന ചിത്രങ്ങളും ശാസ്ത്രീയ വിവരങ്ങളും കടുവകളുടെ വ്യക്തിഗത തിരിച്ചറിയലിനും കൃത്യമായ എണ്ണം കണക്കാക്കുന്നതിനും ഏറെ സഹായകരമാകും.
ഡാറ്റാ സമർപ്പണവും ലക്ഷ്യങ്ങളും
ഫീൽഡ് ഡാറ്റാ ശേഖരണവും ക്യാമറ ട്രാപ്പിംഗ് പ്രവർത്തനങ്ങളും 2026 മാർച്ച് വരെ തുടരും. ലഭ്യമായ എല്ലാ ഡാറ്റകളും പെരിയാർ, പറമ്പിക്കുളം ഫൗണ്ടേഷനുകൾ ശേഖരിച്ച്, വിശകലനവും സംയോജനവും പൂർത്തിയാക്കി 2026 ഏപ്രിലിനകം ദേശീയ കടുവ സംരക്ഷണ അതോറിറ്റിക്ക് (NTCA) സമർപ്പിക്കും. കടുവകളുടെ എണ്ണം കണക്കാക്കുന്നതോടൊപ്പം മറ്റ് മാംസഭോജികളുടെ സാന്നിധ്യം, ഇരജീവികളുടെ ബാഹുല്യം, ആവാസ വ്യവസ്ഥയുടെ ഗുണനിലവാരം, മനുഷ്യ ഇടപെടലുകളുടെ സ്വാധീനം തുടങ്ങിയ ഘടകങ്ങളും ഈ പ്രക്രിയയിൽ ശാസ്ത്രീയമായി വിലയിരുത്തും. മുമ്പ് 2022-ൽ നടന്ന കണക്കെടുപ്പിൽ കേരളത്തിൽ 213 കടുവകളാണ് ഉണ്ടായിരുന്നത്. ഈ കണക്ക് മെച്ചപ്പെടുത്തുക എന്ന ലക്ഷ്യത്തോടെയാണ് പുതിയ ദൗത്യത്തിന് കേരളം ഒരുങ്ങുന്നത്.
